7 yosh. Hayot faslining eng yodda qolarli davrlaridan biri. Bu yoshda bolalar maktabga chiqishadi, yangi o‘rtoqlar orttirishadi, yozishni, o‘qishni o‘rganishadi. Lekin shunday bolalar borki, bu yoshida o‘z yo‘nalishini topib, xalqaro musobaqalarda yuqori o‘rinlarni egallamoqda.
Kichkinagina jussasi bilan katta yutuqlarga erishgan Ibrohim Jumanazarov shunday yoshlardan. U joriy yilning 15–25-iyun kunlari shaxmat bo‘yicha Maldiv orollarida 8-18 yoshlilar o‘rtasida bo‘lib o‘tgan G‘arbiy Osiyo chempionatida 1 ta kumush, 2 ta bronza medalni qo‘lga kiritdi.
Kuni kecha 7 yoshli chempion poytaxtimizdagi Yoshlar ijod saroyida 15 million so‘m pul mukofoti bilan taqdirlandi. Tadbirda Ibrohim singari G‘arbiy Osiyo chempionatida g‘olib va sovrindorlikni qo‘lga kiritgan yana bir nechta yosh shaxmatchilarga jami 186 million so‘m pul mukofotlari taqdim etildi. Ularning ko‘zidagi quvonchni yurak-yuragingizdan his qilar ekansiz, xalqimiz orasida keng tarqalgan “Rag‘bat – kelajak mevasi” degan naql qay darajada to‘g‘ri ekaniga yana bir bor amin bo‘lasiz.
Har qanday vaziyatda ham doimo sen bilan birga bo‘ladigan inson bu, albatta, ota-onadir. Ular biz uchun bizdan ko‘ra ko‘proq qayg‘urishadi, g‘alabaga erishsak, bizdan ko‘ra ko‘proq xursand bo‘ladilar va shunday farzandi bor ekanligini og‘zidan bol tomib gapirib yuradilar. Bugun yosh shaxmatchilar erishgan yutug‘idan ota-onalarining boshi osmonda.
Mahmudaxon ISMOILOVA, G‘arbiy Osiyo chempionati g‘olibi Abdumajid Botiraliyevning onasi:
– O‘g‘lim 6 yoshdan buyon shaxmat bilan shug‘ullanib keladi. G‘arbiy Osiyo chempionatida 3 ta oltin medalni qo‘lga kiritib, yurtimiz sharafini munosib himoya qilganidan juda xursandman. Erishgan yutuqlari uchun bugun u 31 million so‘m pul mukofoti bilan taqdirlandi. Men chempionning onasi sifatida boshqa ota-onalarga muvaffaqiyat yo‘lida sabrli bo‘lishlarini, farzandini doimo qo‘llab-quvvatlashi kerakligini aytgan bo‘lar edim.
Yosh chempionlarni taqdirlash marosimidan so‘ng mamlakatimizda shaxmatni yanada rivojlantirish masalalariga bag‘ishlangan matbuot anjumani o‘tkazildi. Unda O‘zbekiston Shaxmat federatsiyasi raisi Alisher Sa’dullayev hamda O‘zbekiston Shaxmat federatsiyasi raisining birinchi o‘rinbosari Husan Turdialiyev so‘zga chiqib, yoshlar o‘rtasida sportning shaxmat turini yanada keng targ‘ib qilish, mahallalarda havaskor va professional shaxmatchilar avlodini shakllantirish, yosh shaxmatchilarning xalqaro turnirlarda munosib ishtirok etishiga shart-sharoit yaratish va ularni har tomonlama qo‘llab-quvvatlash tizimini yaratishda olib borilayotgan ishlar bo‘yicha ma’lumot berdi. Yosh shaxmatchilar, ularning ota-onalari hamda ommaviy axborot vositalari xodimlari bilan samimiy muloqot o‘tkazildi.
Alisher SA’DULLAYEV, O‘zbekiston Shaxmat federatsiyasi raisi:
– Bugun oldimizdagi asosiy maqsad Hindistonning Chennay shahrida bo‘lib o‘tadigan Butunjahon shaxmat olimpiadasiga terma jamoamizning munosib ishtirokini ta’minlashdir. Bu yil biz uchun mas’uliyatli yil bo‘ladi. Sababi 28-iyul–8-avgust kunlari Hindistonning Chennay shahrida FIDE bo‘yicha Bosh assambleya yig‘ilishida 2026-yilgi Butunjahon shaxmat olimpiadasi mezbonligi uchun ariza topshirgan nomzodlar o‘rtasida tender va taqdimot marosimlarida O‘zbekiston delegatsiyasi ham ishtirok etadi. Agar biz ushbu tenderda g‘alaba qozonsak, bu voqea O‘zbekiston shaxmati kelajagi uchun tashlangan katta qadam bo‘lar edi. Barchamizga yaxshi ma’lumki, yaqinda FIDEning yangi reytingi e’lon qilinganda O‘zbekiston o‘z tarixida ilk bor kuchli 20 talikdan joy olib, 19-o‘rinni qayd etdi. Agar biz shaxmatni rivojlantirishga maksimal darajada ahamiyat qaratib, hozirgiday tizimli rag‘batlantirish ishlarini davom ettirib, bor imkoniyatimizni ishga solsak, oldimizga qo‘ygan maqsadimizni intizomli tashkil etsak, albatta, kuchli 3 talikka ham kirishimiz mumkin.
Ko‘tarinki kayfiyatda tashkil etilgan tadbir so‘ngida tashkilotchilar ommaviy axborot vositalari xodimlarini qiziqtirgan savollarga javob berdilar.