Sirdaryo viloyati Shirin shahridagi Mirzo Ulug‘bek mahallasi yoshlar yetakchisi Shahzod Tojiqulov ishsizlik bilan kurashgandan uning oldini olgan yaxshi, deb hisoblaydi. Shu bois mahallasida istiqomat qilayotgan bitiruvchilarning bandligini taʼminlash uchun yangicha loyihaga qo‘l urdi. Natijada loyihada ishtirok etgan barcha bitiruvchilarning bandligi taʼminlandi. Bu loyiha siz uchun ham qiziq bo‘lsa, loyiha muallifining tajribasi bilan tanishing.
Shahzod TOJIQULOV, Shirin shahridagi Mirzo Ulug‘bek mahallasi yoshlar yetakchisi:
– Faoliyatim davomida 24 nafar maktab bitiruvchisini yoshlarga yaratilayotgan imkoniyatlar bilan yaqindan tanishtirish maqsadida Guliston shahriga safar uyushtirdik. Ular Guliston davlat universitetidagi sharoitlar, o‘quv va amaliyot xonalari, talabalar turar joylari bilan tanishib, yosh kadrlar bandligini taʼminlash maqsadida yo‘lga qo‘yilgan karyera markazida ham bo‘lishdi. Ay-Ti parkning Sirdaryo viloyati bo‘limida Ay-Ti va dasturlash sohalarida yaratilayotgan imkoniyatlar, logistika markazi faoliyati bilan tanishdi. Ulardan qay biri IELTSdan 6,5 ball olib, ingliz tilida so‘zlasha olsa, 800 AQSh dollari miqdorida maoshli ishga qabul qilinishi va ish vaqti kechki paytda bo‘lganligi sababli ham o‘qib, ham ishlashi mumkinligi haqida takliflar berildi. Hozir 4 nafar yosh shu markazga ishga joylashish uchun ingliz tilini o‘rganishni boshlab yuborgan.
Qiziqishiga ko‘ra, yana bir guruh yoshlarni tadbirkorlik va hunarmandlik yo‘nalishlarida o‘zini sinab ko‘rishi uchun “Tadbirkorlar va hunarmandlar markazi”ga olib bordik. U yerda viloyatimizdagi korxonalar ishlab chiqargan mahsulotlar ko‘rgazmasi bilan tanishishdi. So‘ng viloyat Savdo-sanoat palatasi xodimlari yosh tadbirkorlarga davlatimiz tomonidan yaratib berilayotgan imkoniyatlar va imtiyozli kreditlar haqida tushuncha berdi.
Yoshlarimiz “Ishga marhamat” monomarkazida bo‘lib, 25 xil yo‘nalishdagi qisqa muddatli kasb-hunarga o‘qitish kurslari bilan tanishdi, bu yerda o‘qiyotgan yoshlar bepul yotoqxona va o‘quv muddati davomida oylik stipendiya bilan taʼminlanishidan ham xabardor etildi. Harbiy sohaga qiziqishi bo‘lgan yoshlarni esa Shirin shahrida joylashgan harbiy qismdagi sharoitlar bilan tanishtirdik.
Hozir ularning 6 nafari oliy taʼlim muassasasida o‘qiyapti. 4 nafari monomarkaz va qurilish kollejlarida o‘qiyotgan bo‘lsa, 5 nafari muddatli harbiy xizmatga tayyorgarlik ko‘rmoqda. 2 nafar yosh usta hunarmandlarga shogird tushdi, 6 nafari esa kelajakda o‘z tadbirkorligini yo‘lga qo‘yish maqsadida xususiy tadbirkorlik subyektlariga ishga joylashdi. Yana 3 nafari dasturlash va Ay-Ti sohasini o‘rganmoqda.
Mahalla yoshlar yetakchisi sifatida o‘z faoliyatimni boshlaganimda imkoniyati cheklangan yoshlar bilan ishlashga alohida ahamiyat beraman, deb niyat qilgan edim. Shu maqsadda Shirin shahar tibbiyot birlashmasi bilan hamkorlikda hududimizda istiqomat qiluvchi 17 nafar nogiron yoshlar holidan doimiy xabar olib, birlamchi tibbiy dori vositalari uzluksiz tarqatilishini o‘z nazoratimga oldim. Davolanishga muhtoj 2 nafar yoshni “Yoshlar daftari”ga ro‘yxatga olib, “Yoshlar daftari” jamg‘armasi hisobidan ularning davolanishi uchun zarur bo‘lgan 6 million so‘mlik mablag‘ ajratib berildi. Natijada ularning ikkisi ham sog‘ligini tiklab oldi.
Mahallamiz yoshlarining voleybolga qiziqishi juda baland. Ammo mahallamizda bu sport bilan shug‘ullanish uchun sharoit yo‘q edi. Shuning uchun hududimizda ochiq voleybol maydonchasi qurish va 24 soat davomida yoshlarga bepul xizmat qilish chorasini izladim. Hozir maydoncha qurilib, yoshlarning bo‘sh vaqtini mazmunli o‘tkazishga xizmat qilmoqda. Shu bilan birga, 16-21 yosh toifasidagi voleybolchi yoshlarimiz “Besh tashabbus olimpiadasi”ning viloyat bosqichida ham faol qatnashdi.
Tadbirkorlik qilish istagidagi yoshlarimizni ham qo‘llab-quvvatlab kelyapmiz. Natijada bir nafar yosh “Har bir oila – tadbirkor” dasturi orqali 15 million so‘m imtiyozli kredit olib, tikuvchilik bo‘yicha tadbirkorlikni boshladi va o‘zi bilan birga yana ikki nafar yoshning ham bandligini taʼminlashga erishdi. Yana bir yosh 30 million so‘mlik imtiyozli kredit olib, umumiy ovqatlanish shoxobchasi faoliyatini yo‘lga qo‘ydi. Bundan tashqari, bir nechta yoshlarimizga subsidiya asosida ish qurollari ajratib, bandligini taʼminlashga erishdik.
Hali amalga oshirmoqchi bo‘lgan loyihalarim juda ko‘p va bularning barchasi mahallamiz yoshlarining orzu-istaklari ro‘yobiga xizmat qiladi.
