Dunyo bo‘yicha har yili turli yo‘nalishlar bo‘yicha davlatlar reytingi e’lon qilinadi. Bu mamlakatning imijini shakllantirishda muhim ahamiyat kasb etadi. Reytingda bir qator omillar e’tiborga olinadi. Masalan, tabiiy boyliklar, aholining yashash tarzidan mamnunligi, korrupsion holatlar, so‘z erkinligi, fuqarolarning to‘kis hayoti ta’minlanishi va boshqalar. Xo‘sh, yangi O‘zbekiston nufuzli tashkilotlar tomonidan e’lon qilinayotgan shu kabi reytinglarda qanday o‘rinlarni band qilmoqda?
Gallup”ning an’anaviy “World Happiness Report – 2022” baxtlilikni ko‘rsatuvchi reytingida O‘zbekiston 146 mamlakat orasida 53-o‘rinni egalladi. Bu 2021-yilgi ko‘rsatkichdan 11 pog‘ona past. Shuningdek, O‘zbekiston MDHga a’zo davlatlar orasida yetakchilikni boy bergan. Finlandiya reytingda besh yildan beri yetakchilik qilmoqda. U eng baxtli davlat deb topilgan. Keyingi o‘rinlarni Daniya, Islandiya, Shvetsariya, Niderlandiya, Lyuksemburg, Shvetsiya, Norvegiya, Isroil va Yangi Zelandiya egallagan.
Shuningdek, “Chegarasiz reportyorlar” xalqaro nohukumat tashkiloti tomonidan tuziladigan So‘z erkinligi indeksining 2022-yilgi reytingida O‘zbekiston o‘z ko‘rsatkichlarini birdan 24 pozitsiyaga yaxshilab, 157-o‘rindan 133-o‘ringa ko‘tarildi.
OZIQ-OVQAT XAVFSIZLIGI INDEKSI
Global oziq-ovqat xavfsizligi indeksining (The Global Food Security Index) o‘ninchi nashri e’lon qilindi. O‘zbekiston reytingda 113 ta davlat ichida 53,8 ball to‘plab, 78-o‘rinni egalladi. To‘plangan ball O‘zbekistonga oziq-ovqat xavfsizligi o‘rtacha darajada bo‘lgan davlatlar guruhida o‘z o‘rnini saqlab qolish imkonini bergan.
Global indeks oziq-ovqat xavfsizligi holatini to‘rtta mezon bo‘yicha tekshiradi: oziq-ovqat mavjudligi, miqdori, sifati va xavfsizligi, tabiiy resurslarning xilma-xilligi va barqarorligi.
O‘zbekiston oziq-ovqat mavjudligi bo‘yicha 49,3 ball bilan 81-o‘rinni, miqdori bo‘yicha 51,3 ball bilan 76-o‘rinni, sifati va xavfsizligi bo‘yicha 65,1 ball bilan 60-o‘rinni, tabiiy resurslarning xilma-xilligi va barqarorligi bo‘yicha 55,4 ball bilan 30-o‘rinni egallagan. Reytingda birinchi o‘rinni 84 ball bilan Irlandiya, ikkinchi o‘rinni 81,3 ball bilan Avstriya, uchinchi o‘rinni 81 ball bilan Buyuk Britaniya, to‘rtinchi o‘rinni 80,9 ball bilan Finlandiya va beshinchi o‘rinni 80,4 ball bilan Shvetsariya band qilgan.
RAQOBATBARDOSH SANOAT
Birlashgan Millatlar Tashkilotining Sanoatni rivojlantirish tashkiloti (UNIDO, Avstriya) tomonidan “Raqobatbardosh sanoat unumdorligi indeksi – 2022” hisoboti e’lon qilindi. Hisobotda O‘zbekiston 154 mamlakat orasida 89-o‘rinni egallagan va so‘nggi hisobotga ko‘ra, reytingda 5 pog‘onaga ko‘tarilib, bu indeks metodologiyasiga muvofiq, sanoat rivojlanishining o‘rta kvintiliga ega mamlakatlar toifasiga o‘tish imkoniyatini yaratadi. Mamlakatimizda amalga oshirilgan islohotlar natijasida, indeksning oxirgi hisobotiga ko‘ra, O‘zbekiston 8 ta indikatorning 6 tasida ijobiy o‘zgarishlarni qayd etgan, shu bilan birga, 2 ta indikatorda pasaygan.
TOSHKENT DUNYODAGI ENG QIMMAT SHAHARLAR REYTINGIDA
“Numbeo” tadqiqot xizmati tahlilchilari dunyoning eng yirik shaharlarida yashash narxini hisoblab, bu bo‘yicha reytingni e’lon qildi. Tadqiqotchilar reytingni tuzishda uy-joy ijarasi, oziq-ovqat va restoranlardagi narxlarni hisoblab chiqqan. Ro‘yxatdan jami 510 ta shahar o‘rin olgan, Bermud orollari poytaxti Hamilton birinchi o‘rinda qayd etilgan.
O‘zbekistondan faqat Toshkent shahri reytingga kiritilgan bo‘lib, u 465-o‘rinni egallagan. Yashash narxi bo‘yicha Top-10 shaharlardagi aksariyat o‘rinlarni Shvetsariya shaharlari egallagan. Rossiya shaharlari orasida Sankt-Peterburg 279-o‘rin, Moskva 287-o‘rin, Olmaota va Nursulton (Qozog‘iston) mos ravishda 466 va 475-o‘rin, Bishkek (Qirg‘iziston) 477-o‘rindan joy olgan.
“Numbeo”ning jinoyatchilik darajasi bo‘yicha mamlakatlar reytingida O‘zbekiston 142 mamlakat ichida 104-o‘rinda ko‘rsatilgan. Mamlakat indeksi 33,68 ni tashkil qildi. Reytingga ko‘ra, O‘zbekistonning ko‘rsatkichlari Belarus, Qirg‘iziston, Qozog‘iston, Rossiya va boshqa davlatlarga qaraganda yaxshiroq. Jinoyatchilikning eng yuqori darajasi Venesuela, Papua- Yangi Gvineya va Afg‘onistonga to‘g‘ri kelmoqda. Jinoyatchilik eng past darajasi Qatarda.
O‘ZBEKISTON TINCHLIKSEVARLIK GLOBAL INDEKSIDA YUQORILADI
“Global Peace Index – 2022” reytingida O‘zbekiston 7 pog‘onaga yuqorilab, 163 davlat orasida 86-o‘rinni egalladi. Hisobotga ko‘ra, O‘zbekiston “Rossiya va Yevroosiyo” guruhida eng katta yaxshilanishni ko‘rsatdi – 1,5 foiz.
Qo‘shni mamlakatlar orasida Qozog‘iston 97-o‘rinda, Qirg‘iziston 91-o‘rinda, Tojikiston 92-o‘rinda, Turkmaniston 104-o‘rinda joylashgan. Eng tinchliksevar davlatlar deb Islandiya, Yangi Zelandiya va Irlandiya topildi. Indeksi eng past bo‘lib turgan mamlakatlar: Afg‘oniston, Yaman, Suriya, Rossiya va Janubiy Sudan.
Xalqaro reytinglardagi yaxshi natijalar mamlakatning investitsiyaviy jozibadorligini oshiradi. Sohalarga faol investitsiyalarning kirib kelishi esa shubhasiz mamlakat taraqqiyotiga xizmat qiladi. Ammo reytinglarda qanchalik yuqori o‘rinlarda bo‘lmaylik, muhimi, xalqaro hamjamiyat e’tirof etayotgan islohotlar amalda to‘laqonli o‘zini namoyon etmasa, bari befoyda. Axir qilinayotgan ishlar qandaydir reytinglarda yuqori natijalarni egallash uchun emas, avvalo, vatandoshlarimizning turmush tarzini yaxshilashga qaratilgan bo‘lishi kerak.