“Open budget” loyihasi aholi punktlari va tumandagi o‘tkir va yirik muammolarni hal etishda samara beryapti. Jizzax viloyati G‘allaorol tumanidagi “Alamli” mahallasi yoshlar yetakchisi O‘tkir Husanov ham mazkur loyihada o‘z tashabbusi bilan ishtirok etib, g‘olib bo‘ldi. Uning tashabbusida tumandagi barcha mahalla yoshlar yetakchilarining ish xonasini zarur texnik va moddiy jihozlar bilan taʼmirlash ko‘zda tutilgan edi. Natija esa barcha g‘allaorollik yoshlar manfaatiga xizmat qilmoqda.
O‘tkir HUSANOV, G‘allaorol tumanidagi “Alamli” mahallasi yoshlar yetakchisi:
– “Ochiq byudjet” loyihasiga tumandagi 29 ta mahalla yoshlar yetakchilarining xonasiga so‘nggi rusumdagi kompyuter va rangli printer, yoshlar bo‘sh vaqtida o‘qishi uchun har bir mahallaga 100 donadan badiiy kitob hamda yoshlarni mamlakatimizning turli tarixiy-madaniy go‘shalariga sayohatga olib borish uchun mini avtobus bilan taʼminlash tashabbusini kiritgan edim. Taklifni tumanimiz yoshlari faol qo‘llab-quvvatlab, 6 mingga yaqin ovoz yig‘ildi – g‘olib bo‘ldik. Hozir barcha mahallalardagi yoshlar yetakchilarining xonasi eng zamonaviy kompyuter jamlanmalari va badiiy kitoblar bilan jihozlandi. Yaqin kunlarda mini avtobuslar ham yetib keladi.
100 dona kitob taqdim qilingandan keyin mahalla binosida mo‘jazgina kutubxona tashkil qildik. Kutubxonamizga keluvchi kitobxonlar soni ham kundan kunga ortib boryapti. Men esa bu kitoblarning sonini ko‘paytirish harakatiga tushdim. Buning uchun xatlov maqsadida qaysi xonadonga kirib borsam, ularda o‘qib bo‘lingan badiiy kitoblar bor-yo‘qligi bilan qiziqdim. Agar ortiqcha badiiy kitob bo‘lsa, mahalla kutubxonasiga sovg‘a qilishini iltimos qilardim. To‘g‘risi, ko‘pchilikning o‘z kitobini berib yuborishga ko‘zi qiymas edi. Lekin bu mahallamiz yoshlarining tafakkuri o‘sishiga xizmat qilishini aytganimdan keyin bajonidil rozi bo‘lardi. Shu tariqa kutubxonamizdagi kitoblar sonini 200 taga yetkazdik.
Bundan tashqari, mahallamiz binosida yoshlar bo‘sh vaqtlarida sport bilan shug‘ullanishi uchun stol tennisi maydonchasi va zamonaviy cholg‘u asboblaridan foydalanish imkonini beruvchi musiqa xonalari barpo qilganmiz.
Yaqinda Nukus tajribasi misolida mahallamiz yoshlarini qayta xatlovdan o‘tkazishni boshladik. Nukus tajribasi deyishimizga sabab bunday xatlov jarayoni ilk bor Nukusda boshlangan. Uning avvalgi xatlovlardan farqli jihati, “Yoshlar daftari”ga ro‘yxatga olinayotgan yoshlarning muammosi shu paytning o‘zida hal etilmoqda. Buning uchun esa katta miqdorda mablag‘ ajratilgan bo‘lib, bizning mahallamizdan ham 13 nafar yoshni shu xatlov jarayonida “Yoshlar daftari”ga kirishi uchun tavsiya qildim. Ularning muammosi yangi yilga qadar hal qilinishi belgilab qo‘yilgan.
Mahallada bir nechta yosh tadbirkorlar o‘z faoliyatini yo‘lga qo‘ydi. Shunday tadbirkorlardan biri Jahongir Meliyev. U maktabni tamomlab, mahalladagi plastik romlar yasaydigan ustaga shogird tushgandi. Bir necha yil davomida ustozidan sohaning barcha sir-asrorlarini o‘rgandi. Lekin mustaqil ish boshlashi uchun mablag‘i yetmagani sabab mahalla yoshlar yetakchisidan yordam so‘ragan.
Jahongir O‘tkir Husanovning maslahati bilan 24 million so‘m imtiyozli kredit olib, o‘z ustaxonasini tashkil etdi. 3 nafar ishsiz yoshning bandligini taʼminladi. Oyiga 5 million so‘m atrofida sof daromad olayotgan tadbirkor faoliyatini yanada kengaytirish niyatida.
Sarvinoz Yo‘ldosheva esa 28 million so‘m imtiyozli kredit olib, zamonaviy tikuv mashinalarini xarid qildi. Dastlab uyida ish boshlagan Sarvinoz hozir tuman markazidagi bozor hududida o‘z tikuvchilik sexini tashkil etdi. Shu bilan birga, mahalladagi tikuvchilikka qiziqqan yoshlarga hunar sirlarini o‘rgatib kelmoqda.
Bundan tashqari, subsidiya asosida ish qurollari, asbob-uskunalar taqdim etish, xizmat ko‘rsatish obyektlariga ishga joylashtirish orqali ishsiz yoshlarning bandligi taʼminlanmoqda. O‘ziga yuklatilgan vazifani sidqidildan ado etib kelayotgan O‘tkir Husanov viloyatdagi hamkasblari orasida “Eng namunali yoshlar yetakchisi” deb topilib, mazkur tanlovning respublika bosqichiga yo‘llanma oldi.