Namangan tumanidagi “Chag‘ir” mahallasi yoshlar yetakchisi Obobokir Tursunov mahalla yoshlariga ko‘mak berish uchun bor imkoniyatini ishga solayotgan yetakchilardan biri. U mahalla yoshlarining og‘irini yengillatish maqsadida hudud aholisi uchun “Chag‘ir MFY yoshlar yetakchisi” telegram kanalini yo‘lga qo‘ydi. Bu kanal orqali mahallada yordamga, ko‘makka muhtoj yoshlarning ijtimoiy himoyasi uchun ham mablag‘lar yig‘iladi.
Mahalla yoshlaridan biri Islombek Abdumajidov ayni shu telegram kanali orqali to‘plangan mablag‘ evaziga o‘z sog‘ligini tiklab oldi. Gap shundaki, Islombek Rossiyaga ishlagani borib, qurilayotgan imoratning 7-qavatidan tushib ketadi va og‘ir jarohat oladi. Tayanch harakat tizimi va bel dumg‘aza qismi jiddiy shikastlanadi. Islomning davolanishi uchun kerakli bo‘lgan mablag‘ni to‘lashga esa oilasining qurbi yetmasdi. Boquvchisini yo‘qotgan bu oilaga mahalla ahli mazkur telegram kanali orqali zarur pullarni yig‘ib berdi. Hozirgi kunda Islombek sog‘ayib ketdi. Telegram kanal orqali esa boshqa yordamga muhtoj yoshlar uchun mablag‘lar kelib tushishi davom etmoqda.
Obobokir Tursunov mahalladagi nogironligi bor yoshlarga alohida ahamiyat beradi. Ularning orzu-istaklariga quloq tutadi, xohishlarini amalga oshirish uchun yana saxovatpesha kishilarga yuzlanadi. Mahalladagi Xudoyberdi Sayfiddinov ham imkoniyati cheklangan yoshlardan. Mahalla yetakchisi u bilan suhbatlashib, uning eng katta orzusi qulay jihozlangan o‘z xonasiga ega bo‘lish ekanligini biladi. Bu masalada tuman hokimligiga murojaat qilib, kerakli uy jihozlarini ajratishga ko‘ndirdi. Mahalladagi yoshlar bilan Xudoyberdi uchun ajratilgan xonani taʼmirladi va o‘zi istagandek jihozlab berdi.
Dehqonchilik qilish istagidagi yoshlarga o‘n yil muddatga imtiyozli kredit asosida auksion orqali yer ajratilayotganidan xabaringiz bor. Baʼzan auksionda ishtirok etib, yerli bo‘lish uchun ketadigan xarajatlar ham ayrim yoshlarga og‘irlik qiladi. “Chag‘ir” mahallasida ham ana shu xarajatni topishga qiynalayotgan yoshlar uchrab turadi. Bunday yoshlarga esa Obobokir baʼzan o‘z hisobidan, baʼzan esa mahalla tadbirkorlarini jalb qilib, muammoni hal etib kelmoqda.
Bahodir Olimjonov ayni ko‘mak sabab yerli bo‘lgan yoshlardan hisoblanadi. U 300 ming so‘mlik yordam puli evaziga o‘n yil muddatga 10 sotix yer olib, foydalanishga kirishdi. Bahodir ushbu yerdan unumli foydalanib, kungaboqar urug‘ini qadadi. Hozirgi kunda 2 yarim million so‘m daromad ko‘rib, ikkinchi ekinga loviya ekish harakatida.
Obobokir Tursunov asli jismoniy tarbiya o‘qituvchisi bo‘lgani bois mahallada sportga qiziqishi bor yoshlarga qo‘lidan kelgancha ko‘maklashib kelmoqda. Ayniqsa, mahallaning iqtidorli yoshlaridan biri Shohsanam Usmonaliyevaning voleybol o‘yiniga qiziqishini ko‘rib, unga oliy toifali murabbiy Saminjon Tursunovdan saboq olish imkoniyatini yaratib berdi. Natijada Shohsanam sportning voleybol turi bo‘yicha yuksak natijalarni qo‘lga kiritib kelmoqda. “Besh tashabbus olimpiadasi”da ham ishtirok etib, jamoasi bilan yaxshi natijalarni qo‘lga kiritdi.
Obobokirning jonkuyarligi, fidoyi va tirishqoqligi beeʼtibor qolmadi. U tuman va viloyat hokimligi tomonidan eng saxovatpesha yetakchi sifatida eʼtirof etildi. Uning mehnatlari eʼtirofga loyiq, albatta.
Bunday jonkuyar yetakchilar bor ekan, mahalla yoshlari kelajakda vatanparvar, fidoyi, mehr-oqibatli farzandlar bo‘lib yetishadi.