KO‘KDALA BRENDI
Ko‘kdala tumani yerlari o‘zining hosildorligi bilan ajralib turadi. Bu esa mahalladagi ishsiz yoshlarning daromad olishiga, yangi ish o‘rinlari yaratilishiga imkon bermoqda.
– Mahallamizdagi 26 nafar yoshga 70 sotixdan 50 yil muddatga yer ajratib berdik, – deydi Bekmurod Toshev. – Ajratilgan yerlarda yoshlar o‘zlarining tokzorlarini yaratishdi. Hozir tok qatorlari oralab poliz ekinlarini ekib, daromad olishmoqda. Qaysidir yosh bu joylarga pomidor urug‘ini qadab, hosilini yig‘a boshladi, yana qaysi biri qovun ekib bozorga olib chiqdi. Ayniqsa, tokzorlarga tarvuz ekkan yoshlarimiz har sotixidan 1 million so‘m miqdorda daromad olib ulgurdi. Yetishtirgan tarvuzlari Ko‘kdala brendiga aylandi. Tokzorlardan poliz maydoni sifatida foydalanish jarayoni uzum hosil bergunga qadar davom etadi.
MAHALLA KUTUBXONASI
“Sho‘rbozor” mahallasida ishsiz yosh qizlarning bandligini taʼminlashga ham alohida e’tibor qaratilmoqda. Bunda yoshlar yetakchisi mahalla qizlari uchun o‘zlariga yaqin hududdan ish topishga harakat qilgan. Harakat natijasida 19 nafar qiz “Samo” tikuvchilik korxonasida ishlay boshladi.
Bekmurod mahalla yoshlarining bo‘sh vaqtini mazmunli o‘tkazish maqsadida “Besh tashabbus olimpiadasi”ning har bir yo‘nalishida musobaqalar tashkil qilib kelmoqda. Bu haqda mahalla yoshlar yetakchisi shunday dedi:
– Mahallamizdagi yoshlar ko‘proq kitob o‘qishi uchun “Kitobxonlik” to‘garagini yo‘lga qo‘ydim. To‘garak aʼzolari bilan birga yil so‘ngiga qadar 200 ta kitob o‘qishni maqsad qilganmiz, – deydi Bekmurod Toshev. – Biz kitobxonlik orqali barcha sohalarni rivojlantirish imkoniyatiga ega bo‘lamiz. Chunki barcha illatlarning sababi ilmsizlikdir. Shu bilan birga, “Yoshlar kutubxonasi”ni tashkil etganman. Sport, sanʼat, adabiyot yo‘nalishida musobaqalar va “Zakovat” intellektual o‘yini ham muntazam o‘tkazib borilmoqda.
Yaqinda o‘tkazilgan Yoshlar festivalida ham sport, sanʼat, adabiyot yo‘nalishi, “Zakovat” intellektual o‘yinlaridan iborat musobaqalar tashkil qildik. Festivalda mini futbol musobaqasi g‘olibi bo‘lgan jamoa aʼzolariga 8 ta televizor, ayollar o‘rtasidagi voleybol musobaqasida g‘olib bo‘lgan jamoaga 8 ta tikuv mashinasi, sanʼat va adabiyot yo‘nalishi g‘oliblari uchun Toshkent viloyatidagi “Bo‘stonliq” oromgohiga 3 kunlik sayohatga yo‘llanma, “Zakovat” intellektual o‘yini g‘oliblariga zamonaviy planshetlar topshirildi. Yosh kitobxonlarimiz kitoblar to‘plamiga ega bo‘lishdi.
Bugun 200 nafardan ortiq sho‘rbozorlik yoshlar uchun mnemonika, mental arifmetika, kitobxonlik, futbol, mini futbol, taekvondo kabi to‘garaklar ishlab turibdi.
– Menga berilgan vakolat va bildirilgan ishonchni oqlab, mahallamda katta o‘zgarishlar qilishga vaʼda beraman, – deydi qahramonimiz.
Biz Bekmurodning ezgu maqsadi yo‘lida bor kuch-g‘ayrati, ilm-salohiyatidan foydalanishiga ishonamiz.Uning ishlarida omad tilaymiz.