– 27 yoshdaman. Oilaviy ahvolimiz og‘irligi, otam yo‘qligi, onam nogironligi sababli oilamizda yolg‘iz boquvchi o‘zimman. Shu paytga qadar ro‘zg‘or tebratish uchun har ishga qo‘l urib ko‘rdim. Dehqonchilik, quruvchilikda o‘zimni sinadim. Mahallamizdagi eshik-deraza uchun plastik rom yasovchi ustaga shogird tushib, hunar o‘rgandim. O‘tgan yili “Yoshlar daftari”ga ro‘yxatga kirdim. Shu boisdan mahalladan yordam so‘rab murojaat qildim.
Mahallamizga yoshlar yetakchisi tayinlangandan keyin menga yordam ajratilish jarayoni tezlashib, fevral oyida subsidiya asosida plastik rom kesuvchi uskuna olib berishdi. Ustozimning yo‘l-yo‘riqlari bilan mustaqil ravishda o‘z ishimni yo‘lga qo‘ygan edim. Shu bilan birga, ikki nafar mahallamizdagi yoshlarni ham ishli qildim.
Mart oyida mahallamiz yoshlar yetakchisi Gulmira Sheraliyevaga murojaat qilib, dehqonchilik bilan shug‘ullanish istagim borligini aytdim. U kishi auksiondan yer olishim mumkinligini tushuntirdi. Auksionda qatnashib, 10 yil muddatga 15 sotix yerga ega bo‘ldim. Dehqonchilik ishlarimga ukam va singlim yordam berib kelmoqda. Menga ajratilgan joy juda sersuv va serhosilligi uchun hozir ekilgan jo‘xori urug‘ining hosilini yig‘ib olish arafasida turibmiz. Makkajo‘xoridan qolgan joyga ikkinchi hosil urug‘ini qadash niyatimiz bor.
Bugun berilayotgan yordamlar, haqiqatdan, bizga o‘xshagan yoshlarning dardiga malham bo‘layotgani bor gap. Bundan minnatdormiz.