Bugungi qahramonimiz “Everest Innovative School”ning 6-sinf o‘quvchisi Samandar Ismoilov. 12 yoshli Samandar yaxshi dasturchi sifatida eʼtirof etilmoqda. U yaratgan bot va murakkab dasturlash ishlari bunga sababdir.
Bot yaratishni 7 yoshida internet orqali o‘rgangan qahramonimiz keyinchalik o‘z ustida ko‘proq ishladi. Dasturlar yaratishni, bir so‘z bilan aytganda, internet sir-asrorini “ISYSTEM ACADEMY”da o‘rganib, “Back End Java” va “Data Sciense” (sunʼiy intellekt) bo‘yicha bilimlarini yanada mustahkamlamoqda. “CIC school” uchun telegram-bot yaratib, o‘zining birinchi millionini ishlab topgan Samandar hozir Yoshlar ishlari agentligi tashabbusi bilan yo‘lga qo‘yilgan “Ibrat farzandlari” loyihasi uchun telegram-bot yaratish ustida ish olib bormoqda.
Qahramonimiz shu vaqtgacha “CIC School”, “Everest Innovative School” uchun telegram-bot yaratgan. Kundalik.com uchun yaratgan alternativ botning qulayliklari va funksiyalari odatdagidan tubdan farq qiladi. “Himmat Project” uchun ishlab chiqqan har bir harakatni tahlil qilib beruvchi administrator tizimi, “Hamroh Books” tomonidan o‘tkazilgan tanlovlarni nazorat qilish uchun yaratilgan telegram-bot uning eng yaxshi ishlaridan hisoblanadi.
Ayni vaqtlarda “Middle Backend” kampaniyasida developer (kompyuterga maʼlum bir dastur tilini taqdim etish orqali kompyuter dasturlarini yoki ilovalarni yaratadigan kishi) sifatida “Upwork”, “Fiver” birjalarida “freelancer” sifatida ish yuritmoqda. Qahramonimizning oylik daromadi 400- 500 AQSh dollarini tashkil etadi.
– O‘g‘limning kompyuterga qiziqishini 6 yoshida payqaganmiz, – deydi onasi Madina Mingboyeva. – U kichik bo‘lishiga qaramasdan telefon va ijtimoiy tarmoqlarni yaxshi tushunar edi. Shu sabab unga qo‘limizdan kelgancha imkoniyat yaratib berdik. O‘ylaymanki, kelajakda bundan ham katta yutuqlarga erishadi. Agar siz ham farzandingizni qaysidir soha borasida yuqori marralarga erishishini xohlasangiz, uning qiziqishini inobatga olib, moddiy va maʼnaviy qo‘llab-quvvatlashingiz kerak. Shunda, albatta, natija aʼlo bo‘ladi.
– Bo‘sh vaqtimda iloji boricha gadjetlardan chalg‘ishga harakat qilaman. Chunki shusiz ham kunimning 8-9 soati kompyuter yonida va internet olamida o‘tadi. Ishimni qanchalik yaxshi ko‘rmayin, kompyuter qarshisida soatlab o‘tirish sog‘ligimga salbiy taʼsir qilishi mumkin. Hamma narsa vaqt bilan o‘lchanadi. Tengdoshim, siz ham vaqtingiz borida harakat qiling, izlaning, faqat xohish bo‘lsa bas. Vaqtida harakat qilsangizgina, o‘z maqsadingizga erishasiz, – deydi kichik tengdoshimiz Samandar.
“Hayotni sevsang, vaqtni boy berma, chunki vaqtdan hayot yaraladi”, degan ekan faylasuflardan biri. Bugungi kunda o‘z sohasida katta yutuqlarga erishgan taniqli insonlar hayoti va faoliyati tahlillari ularning muvaffaqiyatining asosiy kalitlaridan biri vaqtni to‘g‘ri taqsimlay olganliklarida ekanini ko‘rsatmoqda. Buni inkor etishning sira iloji yo‘q, yosh bo‘lishiga qaramasdan ilm pillapoyasida odimlayotgan Samandarning yutuqlari ham buni tasdiqlaydi. Biz unga omad tilaymiz, kelajakda dunyo tanigan dasturchi bo‘lishiga ishonamiz!