Insonda nimadir qilish uchun xohish bo‘lsa, imkon, albatta, topiladi. G‘ijduvon tumanidagi Nodirabegim nomli mahallada yashovchi 19 yoshli Akmaljon Sheraliyev xohish ortidan imkon topgan yoshlardan biri.
U hozir Toshkent axborot texnologiyalari universiteti Urganch filialining 2-bosqich talabasi. Bo‘sh vaqtlarida turli maishiy texnika va uy-ro‘zg‘or buyumlarini taʼmirlaydi. Akmal “Yoshlar daftariʼga sartaroshlik qilish niyati borligini bildirib, murojaat qilgan edi. Sartaroshlik yo‘nalishi bo‘yicha 10 kun taʼlim olib, sertifikatga ega bo‘ldi. Keyinchalik Yoshlar ishlari agentligi G‘ijduvon tuman bo‘limi tomonidan sartaroshlik qilish uchun kerak bo‘ladigan barcha jihozlar subsidiya asosida olib berildi.
Hozir sartaroshxonani taʼmirlash va jihozlash ishlari davom etmoqda. Akmal o‘z hunariga ukasini ham sherik qilib, sartaroshxonani birgalikda yuritamiz, degan fikrlarni aytib o‘tdi. Tengdoshimizning niyatlari katta. Ulardan biri mahallasidagi ishsiz yoshlarni shu hunarga qiziqtirib, ularning kelajagi uchun o‘z hissasini qo‘shishdir.
