Tabiatni sevish, asrab-avay­lash, unga daxldorlik hissi har bir insonda bo‘lishi zarur. Ayniqsa, faol sardorlar bilan yoshlar orasi­da ekologik madaniyatni targ‘ib qilish samarali natija beradi. Bu “Yashil makon” umummilliy loyihasi doirasida Buxoro viloyatida bo‘lib o‘tgan II Respublika Sardor­lar forumida yana bir bor o‘z isbo­tini topdi.

Forumda “Kamalak” bolalar tashkilotining VIII rayosat yig‘ili­shi, “Munozara” intellektual o‘yini, “Kamalak”da mehmonda” hamda “Ekopatrul” loyihalari, “Toza hudud” va “Daraxtlarni havas bilan ekamiz!” aksiyalari tashkil etildi. Sardorlarda ekologik madaniyatni shakllantirish va atrof-muhit muhofazasiga mu­nosib hissa qo‘shish maqsadida “Ekopatrul” va “Daraxtlarni havas bilan ekamiz!” loyihalari doirasida “Boqiy Buxoro” monumentida 100 tubdan ortiq mevali va manzarali daraxt ko‘chatlari ekildi.

Shuningdek, II Respublika Sar­dorlar forumida rayosat yig‘ilishi ham bo‘lib o‘tdi. Unda O‘zbekiston yoshlar ittifoqi Markaziy Kengashi raisi v.v.b. Shohrux Qudratov, Res­publika “Kamalak” bolalar tashkiloti raisi Madina Baratova, Toshkent shahar hokimi o‘rinbosari Durdona Rahimova, “Kamalak” bolalar tash­kiloti masʼullari, Respublika Sardor­lari hamda hamkor vazirlik, idora va tashkilot vakillari ishtirok etdi. VIII rayosat yig‘ilishida 2021/2022-o‘quv yilida amalga oshirilgan ishlar sar­hisob qilinib, kelgusidagi rejalar bo‘yicha fikr-mulohaza hamda takliflar bildirildi.