Diqqat! Veb-sayt test rejimida ishlamoqda

Sharmanda qiladigan uydirmalar tarqatganlik uchun javobgarlik belgilandi

29.11.2023 1019

Odil Nabiyev, Toshkent davlat yuridik universiteti talabasi

Bugungi kunda mobil qurilmalar hamda ijtimoiy tarmoq va messenjerlardagi akkaunt yoki kanallarga zararli dastur yuborish yo‘li bilan bloklab (to‘sib) qo‘yish, ma’lumotlarni o‘chirib yuborish, o‘zgartirish yoki olib qo‘yish bilan qo‘rqitib shaxslardan pul yoki boshqa moddiy manfaatdorlik talab qilish holatlari juda ko‘p kuzatilmoqda.

Shuningdek, maxsus dasturlar yordamida shaxslarning fotosurati, ovozi va boshqa biometrik ma’lumotlarini soxtalashtirish holatlari ham uchramoqda. Bugungi kungacha bu harakatlar uchun jinoiy javobgarlik belgilanmagani bois, Senatning qirq yettinchi yalpi majlisida  “Jinoyat, Jinoyat-protsessual kodekslariga hamda Ma’muriy javobgarlik to‘g‘risidagi kodeksga o‘zgartirish va qo‘shimchalar kiritish haqida”gi qonun senatorlar tomonidan muhokama qilindi.

Natijada Jinoyat kodeksidagi (165-modda) tovlamachilik tushunchasiga o‘zgartirish kiritilib, sharmanda qiladigan uydirmalar bilan bog‘liq huquqbuzarlik uchun ham javobgarlik belgilanadigan bo‘ldi. Bunda, Jinoyat kodeksining 165-moddasi birinchi qismiga “mulkka shikast yetkazish yoki uni nobud qilish yoxud” degan so‘zlardan keyin “jabrlanuvchining axborot resursini yo‘q qilish, o‘zgartirish, olib qo‘yish yoki to‘sib qo‘yish yoxud uni sharmanda qiladigan uydirmalar tarqatish bilan qo‘rqitib” degan so‘zlar bilan to‘ldirilmoqda. 

Bu modda bilan aybdor deb topilgan shaxslar uch yildan besh yilgacha ozodlikni cheklash yoxud uch yildan besh yilgacha ozodlikdan mahrum qilish bilan jazolanadi.

Bizni ijtimoiy tarmoqlarda ham kuzatib boring

Obuna bo`lish