Diqqat! Veb-sayt test rejimida ishlamoqda

SPORT BILAN HAMNAFAS YOSHLAR

3.12.2022 322

Muhammadshukur MUHAMMADJONOV, “Yoshlar ovozi” muxbiri

SHASHKA 

Sirdaryo viloyatining Shirin shahrida “Besh tashabbus olimpiadasi” doirasidagi shashka musobaqasining respublika bosqichi bo‘lib o‘tdi.

Respublikamizning 14 ta hududidan faqat g‘oliblikni maqsad qilib kelgan shashkachilar Gulis­ton temir yo‘l vokzalida tantanali kutib olindi. Ochilish marosimi va qurʼa tashlashdan so‘ng yoshlar 3 yosh toifasi (16-21, 22-26, 27-30) bo‘yicha bellashdi.

Uch kun davom etgan bahslar sportchi yoshlar uchun ajoyib lahzalarga boy bo‘ldi. Ular uchun madaniy tadbirlar ham tashkil etildi. Shuningdek, ishtirokchilar “Yashil makon” loyihasi doirasida “Do‘stlik bog‘i”ni barpo etdi.

Musobaqa yakunida Munirabonu Murali­yeva, Nasiba Astanaqulova, Tojixol G‘ozi­yeva (Sirdaryo viloyati), Rustamjon Mirzak­barov (Namangan viloyati), Suxrobbek Yarashov (Qashqadaryo viloyati), Dostonjon Tursunov (Samarqand viloyati) o‘z yosh toifasi bo‘yicha birinchi o‘rinni egalladi. Taqdirlash ma­rosimida Sportni rivojlantirish vaziri Adham Ikramov, viloyat hokimi vazifasini bajaruvchi Akmaljon Mahmudaliyev va bir qator rasmiylar ishtirok etdi.

 

VOLEYBOL

“Besh tashabbus olimpiadasi” voleybol bahslarining final bosqichiga Farg‘ona va Buxoro viloyatlari mezbonlik qildi. Yigitlar o‘rtasi­dagi bellashuvlar Farg‘ona shahridagi “Samo” sport saroyi va Farg‘ona davlat universiteti sport majmuasida o‘tkazildi. Qizlar jamoalari Buxoro Olimpiya zaxiralari sport kolleji hamda “Yoshlik” sport majmuasida bellashdi. Har ikkala bahslar 16-21, 22-26 yosh toifasida 280 nafar ishtirokchi­dan iborat bo‘ldi.

O‘yinlar qiziqarli, keskin va murosasiz bahslar­ga boy bo‘ldi. Natijalarga ko‘ra, 16-21 yosh toi­fasida 1-o‘rin Andijon viloyati Marhamat tu­manidagi “Do‘stlik” mahallasi yigitlariga va Qoraqalpog‘iston Respublikasi Qorao‘zak tumanidagi “Do‘stlik” mahallasi qizlariga, 22-26 yosh toifasida 1-o‘rin Farg‘ona viloyati Farg‘ona tumanidagi “Do‘stlik” mahallasi yigitlar jamoasiga hamda Qo‘shtepa tumanida­gi “Do‘rmon” mahallasi qizlariga nasib etdi.

Ishtirokchilar Farg‘ona va Buxoro viloyatining diqqatga sazovor joylarini tomosha qilish imko­niga ham ega bo‘ldi.

 

SHAXMAT

“Besh tashabbus olimpiadasi”ning ikkinchi mavsumida shaxmat musobaqasining mahal­la bosqichlarida ishtirok etish uchun respublika bo‘yicha jami 322 845 nafar yosh ro‘yxatdan o‘tdi. Shundan 292 267 nafari musobaqaning ilk bosqichida ishtirok etgan.

Joriy yilning sentabr–noyabr oylarida o‘tka­zilgan mahalla – sektor – tuman (shahar) ham­da viloyat bosqichlarida saralangan 84 nafar yosh Jizzax viloyati mezbonligida tashkil etil­gan shaxmat musobaqasining respublika final bosqichiga yetib keldi. Qizlar va yigitlar 16-21, 22- 26, 27-30 yosh toifasida o‘zaro bellashdi.

Musobaqada Shohjahon Murodaliyev (Andi­jon viloyati), Shahrizoda Muxsinova (Farg‘ona viloyati), Hasan Qorjovov, Bobomurod O‘tayev va Dilafruz Jo‘rayeva (Surxondaryo viloyati), Sarvinoz Yusupova (Jizzax viloyati) tengdosh­lari o‘rtasida birinchi o‘rinni egalladi. G‘oliblarga qimmatbaho sovg‘a va diplomlar topshirildi.

 

Bizni ijtimoiy tarmoqlarda ham kuzatib boring

Obuna bo`lish