“Yosh kitobxon” respublika tanlovining yangi nizomi tasdiqlanganidan xabaringiz bo‘lsa kerak. Unga ko‘ra, joriy yilning sentabr-dekabr oylarida o‘tkaziladigan tanlov avvalgilaridan farqli ravishda 5 bosqichda tashkil etilib, uning birinchi bosqichi mahallada boshlanadi (Eslatib o‘tamiz, avval tanlov uch bosqichda bo‘lib, unda ishtirokchilar tuman – viloyat – respublika bosqichida kuch sinashar edi).
Birinchi bosqich – tanlovning arizalar qabul qilish va mahalla bosqichi bo‘lib, bu bosqichda ishtirokchilardan arizalar qabul qilinadi va ishtirokchilar test sinovi asosida saralanadi.
Arizalar 1-sentabrgacha qabul qilinadi va qatnashchilar sentabrning ikkinchi o‘n kunligida 25 ta test savollari asosida sinovdan o‘tkaziladi. Har bir to‘g‘ri javob uchun 4 baldan beriladi.
Ikkinchi bosqich – tanlovning sektor bosqichi bo‘lib, oktabr oyining dastlabki 10 kunligida bo‘lib o‘tadi va 40 ta test savoli belgilanadi. Ishtirokchilar har bir to‘g‘ri javob uchun 2,5 baldan jamg‘arib boradi.
Uchinchi bosqich – tanlovning tuman (shahar) bosqichi bo‘lib, oktabr oyining uchinchi o‘n kunligida ishtirokchilar “Badiiy asarlar bilimdoni” hamda “Tezkor savol-javob” sharti asosida bellashadi.
To‘rtinchi bosqich – tanlovning hududiy bosqichi bo‘lib, noyabr-dekabr oylarida o‘tkaziladi. Bu bosqichda ham ishtirokchilar “Badiiy asarlar bilimdoni” hamda “Tezkor savol-javob” sharti asosida bahs olib boradi.
Beshinchi bosqich – respublika – final bosqichi bo‘lib, dekabr oyining ikkinchi o‘n kunligida o‘tkaziladi. Ishtirokchilar “Badiiy asarlar bilimdoni”, “Tezkor savol-javob”, “Buyuk mutafakkir va adib”, “Sheʼriyat” hamda avvalgi mavsumlardan farqli ravishda “Insho yozish” shartlari asosida bellashadi.
Insho yozishda ishtirokchilar biletlardan birini tortish orqali mavzu tanlaydilar va mavzu yuzasidan o‘z fikrlarini bayon etadilar. Mazmun-mohiyatini ochib berish, imlo va uslubiy qoidalarga rioya etgan holda 3-5 sahifadan kam bo‘lmasligi talab etiladi. Insho yozish uchun 60 daqiqa vaqt belgilanadi.