Ta’til vaqtida bolalarning iste’dodini ro‘yobga chiqarish, bo‘sh vaqtlarini mazmunli tashkil etish, turli loyihalar orqali o‘g‘il-qizlardagi ijtimoiy faollikni rivojlantirish maqsadida Sirdaryo viloyati “Kamalak” bolalar tashkiloti Jizzax viloyatida joylashgan “Zomin” bolalarni sog‘lomlashtirish oromgohida “Yozni “Kamalak” bilan!” loyihasini o‘tkazdi.
Loyihaga oromgohdagi 270 nafar bola qamrab olinib, faol yoshlar va viloyat Sardorlar Kengashi a’zolaridan tuzilgan murabbiylar jamoasi ularga “Sardor kim?”, “Kamalak va bolalik”, “Vaqtni to‘g‘ri taqsimlash”, “IT – zamon talabi”, “Zamonaviy bolajon qanday bo‘lishi kerak?”, “Kitob o‘qishning samarali usullari” kabi mavzularda seminar-treninglar o‘tishdi.
Kunning ikkinchi qismida joriy yilgi “Quvnoqlar va zukkolar” tanlovining respublika bosqichi g‘olibi bo‘lgan “Yoshlar ittifoqi” terma jamoasi tomonidan ijodiy chiqishlar namoyish etildi. Shuning bilan birga, guruhlar o‘rtasida “Quvnoq raqslar” tanlovi tashkil etildi. Iste’dodli yosh san’atkorlar tomonidan kuy-qo‘shiqlar ijro etildi.
“Yozni “Kamalak” bilan!” loyihasi doirasida tashkil etilgan seminar-treninglar, tadbirlar, aksiyalar, musobaqalarda faol ishtirok etgan bolalar, hamkor tashkilot vakillari diplom va “Yoshlar ittifoqi”, “Kamalak” brendi ostidagi esdalik sovg‘alari bilan taqdirlandi.
