13.2.2025 1041

Yetakchilikdan mutaxassislikka!

Mahallada yoshlar yetakchisi lavozimi joriy etilganiga uch yildan oshdi. Shu vaqt davomida faoliyatida yaxshi natijalar ko‘rsatgan yetakchilar orasidan rahbarlik lavozimlariga va yuqori tashkilotlarga ishga tayinlanganlar soni ortdi. Misol uchun, “Top 100” yetakchilar safiga kiritilgan Qarshi shahridagi Bog‘ishamol mahallasi yoshlar yetakchisi Bekmurod Rasulov Prezident huzuridagi Ijtimoiy himoya milliy agentligining Qashqadaryo viloyati boshqarmasi Qarshi shahri “Inson” ijtimoiy xizmatlar markazining Ijtimoiy xizmatlarni tashkil etish bo‘yicha mutaxassisi lavozimiga tayinlandi. Bu yosh liderlar faoliyatiga yana bir munosib bahodir. Bekmurod mahallada ijtimoiy himoyaga muhtoj yoshlar bilan ishlash, iqtidorli va intellektual faol yoshlarni kashf etishda jonbozlik ko‘rsatdi. “Yilning eng namunali mahalla yoshlar yetakchisi” tanlovining viloyat bosqichida 1-o‘rin sohibi bo‘ldi. Turk va ingiliz tilidan sertifikatlarni qo‘lga kiritgan. Bugun yosh liderning mahalladagi faoliyati samaralariga nazar solamiz. Bog‘ishamol mahallasi balansi: Aholi: 1520 nafar; Xonadonlar: 347 ta; Yoshlar: 430 nafar; Ayol-qizlar: 235 nafar.   “Yashil” toifa: 354 nafar; “Sariq” toifa: 67 nafar; “Qizil” toifa: 9 nafar.   Mahalla drayveri: tikuvchilik. “Yoshlar daftari”ga kiritilgan edim... – Ishchi oilasida tug‘ilganman, – deydi Bekmurod Rasulov. – Kasb-hunar kollejida o‘qib yurgan kezlarim “Yoshlar daftari”ga kiritilib, kichik biznesimni yo‘lga qo‘ygandim. U paytda mahalladagi yoshlar yetakchisi lavozimi yo‘q edi. 2022-yili bu lavozim tashkil etilishi menga o‘zimni shu sohada kashf etishim uchun katta maydon berdi. Ilk kunlardan yoshlar hayotiga qanday o‘zgartirish kirita olishim haqida o‘yladim. Yoshlar faolligini oshirish, to‘g‘ri yo‘naltirish va ijtimoiy mas’uliyatli insonlar sifatida shakllanishiga yordam berishni asosiy maqsad qilib oldim. Birinchi navbatda, yoshlar bilan bevosita aloqa o‘rnatish va ularning muammolarini tushunish kerakligini angladim. Ularni eshitib, qo‘llab-quvvatlab, ijobiy o‘zgarishga erishish mumkin edi. 176 million so‘mlik yordam Bugungi kunda yoshlarning muammo va murojaatlari o‘z vaqtida va o‘z hududida hal etilmoqda. Bu yoshlarning millat kelajagiga, davlatimizga va yoshlar siyosatiga ishonchini yanada mustahkamlashga yordam bermoqda. O‘tgan yillarda mahallada yoshlarning bo‘sh vaqtini mazmunli tashkil etish, bandligini ta’minlash borasida keng ko‘lamli ishlar olib borildi. Iqtidorlilarni aniqlash va ularni rag‘batlantirish orqali ko‘plab yoshlarning iste’dodi kashf etildi. “Yoshlar daftari”ga ro‘yxatga olinganlarni qiynab kelgan muammolarni hal qilishda aniq va samarali choralar ko‘rildi. Jumladan, 2024-yilda 20 nafar yosh “Yoshlar daftari”ga kiritilib, ularga 44,6 million so‘mlik ko‘mak berilgan. Ularning: – 2 nafariga safarbarlik chaqiruv rezervi to‘lovlari qoplandi; – 1 nafariga tadbirkorlik faoliyatini boshlashi uchun kredit ajratildi; – 2 nafari xususiy tashkilotlarga ishga joylashdi; – 4 nafarining kontrakt puli to‘landi; – 5 nafariga haydovchilik va o‘quv kurslari xarajatlari qoplab berildi. Yoki bo‘lmasa, “Yoshlar daftari” jamg‘armasi hisobidan 2022-yilda 22 nafar yoshga 82 million so‘m, 2023-yilda 17 nafar yoshga 49,5 million so‘mlik yordamlar ko‘rsatilgan. “Ayollar daftari”ga kiritilgan moddiy ahvoli og‘ir 6 nafar yoshga bir martalik moddiy yordam, 5 nafar ishsiz yoshga zarur asbob-uskuna va kompyuter subsidiya asosida taqdim etilgan. Yetakchidan tashabbus Ko‘cha sardorlari tashabbusi bilan har shanba va yakshanba kunlari mahalladagi ko‘chalar o‘rtasida futbol, har yakshanba kuni shaxmat bo‘yicha “Rokirovka” musobaqalarini o‘tkazish yo‘lga qo‘yildi. 2024-yili mahalla vakillari “Besh tashabbus olimpiadasi”da sportning armrestling, yengil atletika turlari bo‘yicha shahar bosqichida, shaxmat bo‘yicha viloyat bosqichida g‘oliblikni qo‘lga kiritdi. Mahalla hududidagi 47-maktabda “Yoshlar kutubxonasi” tashkil etilgan. Bu yerda “Zakovat” intellektual o‘yini ham muntazam o‘tkazib borilmoqda. Yoshlar yetakchisi tashabbusi bilan sport, musiqa, hunarmandchilik bo‘yicha bepul to‘garaklar tashkil etildi. Qarshi shahar 2-son politexnikumida “Besh tashabbus olimpiadasi” ishtirokchisi Muxlisa Xalilova tomonidan yoshlarga shaxmat saboqlari berilmoqda. Javohir Quvonov boks bilan muntazam shug‘ullanib, viloyat va respublika musobaqalarida sovrinli o‘rinlarni qo‘lga kiritdi. U mahallada boks to‘garagini ochish taklifini bildirgan edi. Bekmurod Rasulov mahalla hududidan bo‘sh bino topib, to‘garak tashkil etishga ko‘maklashdi. Sportga qiziqishi bo‘lgan, kam taʼminlangan oila farzandlari, ijtimoiy himoyaga muhtoj yoshlar mashg‘ulotlarda bepul qatnashmoqda. Yoshlarda g‘oya ko‘p, ammo... – Yoshlarda qiziqarli va samarali g‘oyalar ko‘p, ularni amalga oshirish uchun imkoniyat va ko‘mak topish qiyin, – deydi Bekmurod Rasulov. – Shu sababli, faoliyatimni yoshlar uchun yangi imkoniyatlar ochish, ularni ijtimoiy, madaniy va professional jihatdan rivojlantirishga qaratganman. Xayrullo Qurbonov jazoni ijro etish muassasasidan qaytgach, ishlash istagi borligi, lekin qo‘lida hunari yo‘qligini aytadi. U polietilen mahsulotlari ishlab chiqaradigan korxonaga oddiy ishchi sifatida ishga joylashtirildi. Tikuvchilikni biladigan, lekin ishsiz yurgan Zarnigor Ahadovaga tikuvchilik faoliyatini boshlashi uchun 33 million so‘m imtiyozli kredit ajratildi. Hozir oyiga 4-5 million so‘m atrofida daromad topmoqda. 1 ta ish o‘rni yaratdi. 5 nafar shogirdi bor. Tadbirkor yoshlardan biri Azamat G‘ulomovga faoliyatini kengaytirishi uchun 33 million so‘m imtiyozli kredit olib berildi. Buning natijasida u asalarichilik faoliyatini rivojlantirib, 2 nafar yoshni ishga oldi. Kitobxonlik targ‘iboti “Mutolaa” loyihasidan foydalanayotgan bog‘ishamolliklar 300 ga yaqin. Loyiha targ‘ibotini kuchaytirish maqsadida Qarshi shahar yoshlar ishlari bo‘limi va yoshlar yetakchilari tashabbusi bilan ta’lim muassasalarida “Mutolaa bilimdoni” tanlovini tashkil etilmoqda. Bog‘ishamolda esa, kitobxonlik to‘garagi yo‘lga qo‘yilgan. To‘garakda har hafta “Mutolaa” loyihasidan bir kitob tanlab olinib, yoshlar bilan birgalikda tezkor savol-javoblar o‘tkaziladi. G‘oliblarga “Mutolaa premium” xizmati sovg‘a qilinadi. “Ibrat farzandlari” loyihasi doirasida til o‘rganayotgan bog‘ishamolliklar 400 dan ziyod. Ular 25 dan ortiq tilni uydan chiqmagan holda o‘rganmoqda. “Ibrat farzadlari” loyihasi sardori Farzona Bahromova o‘z xonadonida bepul ingiliz tili kursi tashkil etib, yoshlarga ta’lim bermoqda. Bir nuroniy 10 yoshga mas’ul Bog‘ishamolda “Bir nuroniy 10 yoshga mas’ul” tamoyili asosida yoshlar mahalla nuroniylariga biriktirilgan. Profilaktika inspektori va “Qalqon” jamoasi bilan birgalikda jamoat joylari, maktab, savdo maskanlarida tungi nazorat yo‘lga qo‘yilib, profilaktik tadbirlar o‘tkazilmoqda. Mahalla ahlining hamjihatliligi sabab Bog‘ishamol jinoyatchilikdan xoli hudud deb topildi. 2022-yildan buyon mahallada jinoyatchilik va huquqbuzarlik sodir etilgani yo‘q. – Mahallada 33-sonli alohida ta’limga ehtiyoji bor bolalar uchun ixtisoslashtirilgan maktab joylashgan, – deydi Bekmurod. – Bu muassasa bilan doimiy aloqa o‘rnatib, o‘quvchilarning orzu-umidlarini amalga oshirishga intildim. Maktabda o‘quvchilar uchun hunarmandchilik to‘garaklari tashkil etilgan. Ular yaratgan qo‘l mehnati mahsulotlari bilan meni hayratga soladi. Ularni qo‘llab-quvvatlash maqsadida turli tadbirlar, jumladan xayriya konsertlari tashkil etamiz. Tadbirlarda o‘quvchilar tomonidan yaratilgan qo‘l mehnati buyumlari sotuvga qo‘yilib, tushgan mablag‘ga hunarmandchilik jihozlari va mehnat qurollari xarid qilinadi.

7.2.2025 1100

Migrantlar bilan ishlashda Xosilot tajribasi

Xosilot mahallasi Farg‘ona viloyatining eng chekka hududlaridan hisoblanadi. Bu yerda yashash tarzi doimiy bir xillikda kechgan, hamma “o‘zi bilan o‘zi ovvora” bo‘lib yashar edi. Xosilotda o‘z fikriga ega, xayrli tashabbuslar, loyihalar egalari, yangilikka intiluvchi yoshlar ko‘pligiga qaramay, hech kim ularning fikrini tinglamasdi. Mahalladagi yoshlar yetakchisi lavozimining joriy etilishi Xosilot yoshlari uchun ayni muddao aylandi. Endi mahallada yoshlarni eshitadigan, ularga yordam beradigan, qo‘llab-quvvatlaydigan inson paydo bo‘ldi. Muammolarning ma’lum bir qismini mahallaning o‘zida hal qilish imkoniyati yaratildi, ishsiz yoshlarning bandligi ta’minlandi. Yoshlar siyosati va ularga yaratilayotgan imkoniyatlar endilikda eng chekka hududga ham yetib kelib, yangi iqtidorlar kashf qilina boshlandi. Ushbu harakatlarning zamirida esa mahallaning eng faol yoshlaridan biri Isroiljon Raimovning mehnatlari katta. Bugun uning faoliyatiga nazar solamiz. Isroiljon Raimov – Farg‘ona viloyati Farg‘ona tumanidagi Xosilot mahallasi yoshlar yetakchisi. U 2024-yilda tashqi mehnat migratsiyasidan qaytgan yoshlar bilan samarali ishlashda katta muvaffaqiyatlarga erishdi. Yoshlarni ijtimoiy hayotga integratsiya qilish, ish bilan ta’minlash bo‘yicha amalga oshirgan loyihalari faqat mahalla darajasida emas butun tuman bo‘yicha namunali hisoblanadi. Yoshlar yetakchisi yoshlarni o‘ziga jalb etishda, ularning ehtiyojlarini tushunishda va ularni jamiyat hayotida faol ishtirok etishga undashda o‘ziga xos yondashuvlarni qo‘llaydi. U “Yilning eng namunali mahalla yoshlar yetakchisi” tanlovida “Tashqi mehnat migratsiyasidan qaytgan yoshlar bilan samarali ishlagan eng namunali mahalla yetakchisi” yo‘nalishida 1-o‘rin sohibi. 2024-yilning 4-choragi yakunlari bo‘yicha “Top – 100” yetakchi safiga kiritilgan. Xosilot mahallasi balansi: Aholi soni: 2907 nafar; Yoshlar soni: 654 nafar; Xotin-qizlar: 334 nafar; “Yashil” toifa: 368 nafar; “Sariq” toifa: 256 nafar; “Qizil” toifa: 30 nafar; Mahalla drayveri: malinachilik, chorvachilik. Migratsiya ko‘rsatkichi yuqori edi – Yoshlar yetakchisi sifatidagi asosiy vazifam mahallamdagi yoshlarning baxtli hayot kechrishlarini ta’minlash, – deydi Xosilot mahallasi yoshlar yetakchisi Isroiljon Raimov. – Har doim o‘z mahallamdagi qiynalayotgan oilalarga yordam berishga harakat qilaman. Yoshlarni qo‘llab-quvvatlashga, ularni kelajagi uchun barcha imkoniyatlarni yaratib berishga intilaman. Yoshlarni qiziqish va iqtidorlarni qo‘llab-quvvatlash zarur. Yoshlarning iqtidorlarini rivojlantirishga yo‘naltirilgan mashg‘ulotlarni, sport va san’at to‘garaklarini tashkil qilish katta foyda beradi. Xosilot mahallasi migratsiyaga ketgan yoshlar ko‘rsatkichi bo‘yicha tumanda yetakchilardan biri edi. Shu sababdan yoshlar yetakchisi Isroiljon asosiy e’tiborini migratsiyadagi yoshlar bilan ishlash, ularni Vatanga qaytarib, bandligini ta’minlashga qaratgan. 2023-yil boshidagi xatlov natijalariga ko‘ra 70 nafar yosh xorijga ishlash uchun ketgan bo‘lib, yoshlar yetakchisi ularning 22 nafarini ortga qaytarishga erishgan. Migratsiya yoki Vatan Tashqi mehnat migratsiyasidagilar soni 2024-yil boshida 62 nafar bo‘lgan. Isroiljon ular bilan doimiy aloqani yo‘lga qo‘ygan. Xorijda ishlayotganlar uchun “Migratsiya yoki Vatan” nomli loyiha ishlab chiqqan. Loyihaga ko‘ra chet davlatlardagi 62 nafar yoshning har biri bilan individual ishlash tartibi joriy qilinadi. Profilaktika inspektori, psixolog ham yoshlar yetakchisi xorijda ishlayotgan yosh va uning ota-onasi bilan muntazam suhbatlar tashkil etib, ularning muammosi, qiziqish va iqtidori aniqlanadi. Ushbu ma’lumotlar asosida yoshlar uchun ish va o‘qish imkoniyatlari yaratiladi. Ushbu harakatlar natijasi o‘laroq, yil yakuniga qadar 31 nafar yosh Vatanga qaytarilib, ularning barchasini bandligini ta’minlashga erishildi. – Migratsiyadan qaytgan yoshlarni qiziqishiga qarab ish va o‘qishga yo‘naltirdik, – deydi Isroiljon Raimov. – Dehqonchilik qilmoqchi boʻlganlarga yer ajratib berdik, tadbirkorlik qilmoqchi boʻlganlarga imtiyozli kredit ajratildi. Chetga ishlash uchun ketish istagidagi yoshlar qonuniy migratsiyaga jalb qilib, ular 3 oylik kurslarda kasb-hunar va tilga oʻqitildi. Yoshlar, ota-onalar, mahalla yettiligi bilan birgalikda ishlashni yo‘lga qo‘yganman. Bir hudud – bir mahsulot Bugungi kunga kelib, Xosilot mahallasida malina plantatsiyasi tashkil etilgan. Plantatsiyada eksport navidagi malina yetishtiriladi. Migratsiyadan qaytgan dehqonchlik qilish istagidagi yoshlarga “bir hudud – bir mahsulot” tamoyili asosida plantatsiya hududidan yer ajratilgan bo‘lib, malina yetishtirish bilan shug‘ullanishmoqda. Hozirga qadar migratsiyadan qaytgan 84 nafar yoshga yer ajratilgan. Malinaning eksportga mos navlarini ko‘paytirish ishlarini yo‘lga qo‘yilgan. Mahalladagi migratsiyadan qaytgan tadbirkorlik qilish istagida yoshlarga esa hokim yordamchisi ko‘magida imtiyozli kreditlar ajratildi. Ushbu yoshlar avtomobil yuvish shahobchasi, nonvoyxona, kichik kafe va muzqaymoqxonalar faoliyatini yuritishmoqda. “Bir hudud – bir mahsulot” tamoyili asosida yer ajratilgan yoshlar: Abrorjon Abdullayev 30 yoshda. Malina plantatsiyasi hududidan 15 sotix yer olgan. Hozirda 30- 40 million daromad qilmoqda. Bo‘sh vaqtida ustachilik bilan shug‘ullanadi. Nodirbek Abdullayev 27 yoshda. Malina plantatsiyasi hududidan 15 sotix yer olgan. Hozirda 30-40 million daromad olmoqda. Dehqonchilikdan tashqari haydovchilik ham qiladi. Shoxrux Nasriddinov 28 yoshda. Malina plantatsiyasi hududidan 15 sotix yer olgan. Hozirda 20-30 million daromad topmoqda. Shuningdek, plastik eshik rom yasash bilan band. “Uychi tajribasi” amalda 2024-yil davomida “Uychi tajribasi” asosida 117 nafar yoshning bandligi ta’minlandi. Ishsiz bitiruvchi yoshlarni bandligini ta’minlashga qaratilgan bandlik dasturlari ishlab chiqilib, 22 nafar bitiruvchi doimiy ishga joylashtirildi. Suv bo‘yi ko‘chasida yashovchi Ubaydullo Eminov Farg‘ona davlat universiteti harbiy ta’lim yo‘nalishida o‘qishni bitirgach, ish izlab yurganini yoshlar yetakchisiga ma’lum qilgan edi. Yoshlar yetakchisi tuman bandlik bo‘limiga murojaat qilib, ushbu masalani hal etdi. Ubaydullo tumandagi 8-maktabga chaqiruvga qadar boshlang‘ich tayyorgarlik fani o‘qituvchisi sifatida ishga joylashtirildi. – Yoshlarni xonadonlariga borib, ular bilan suhbatlashib, muammolarini, takliflarini, qiziqishlarini va kelajakdagi maqsadlarini o‘rganaman, – deydi yoshlar yetakchisi. – Bu suhbatlar davomida o‘zimga kerakli rejalar tuzaman. Masalan, kimdir sportga qiziqsa, uni “Besh tashabbus olimpiadasi”ga jalb qilishni rejalashtiraman. Agar yoshning muammosi bo‘lsa, uning muammosini mahalla hokimligi yoki sektor rahbari yordamida hal qilishga kirishaman. Bu jarayon yoshlarning salohiyatini ochish, ularning muammolarini yechish va kelajakka bo‘lgan ishonchlarini oshirishga qaratilgan bo‘ladi. Ilm istagidagi yoshlar rag‘batlantiriladi Yoshlar yetakchisi ilm olish istagidagi yoshlarni rag‘batlantirish va ularning bilim olish imkoniyatlarini kengaytirish borasida faol ish olib bormoqda. U yoshlarni yangi bilimlarni o‘rganishga, o‘z imkoniyatlarini kengaytirishga undaydi va ularga har tomonlama rivojlanish uchun sharoit yaratishga intiladi. Mahallada o‘tkazilayotgan turli loyihalar yoshlarning intellektual va ijtimoiy faoliyatini oshirishga qaratilgan. Isroiljon koʻchalar kesimida hamda mahalla hududidagi maktablarda “Ibrat farzandlari”, “Ustoz AI”, “Qizlar akademiyasi”, “UzChess” va “Mutolaa” loyihalariga yoshlarni jalb qilish bo‘yicha targ‘ibot ishlarini muntazam olib boradi. Shuningdek, yoshlar yetakchisi tumandagi kasb-hunar maktablarida ayollar uchun tikuvchilik, pishiriq tayyorlash, erkaklar uchun payvandlash, elektro montaj ustasi va santexnik yo‘nalishlarida o‘quv kurslari tashkil etgan. Ayni paytda migratsiyaga chiqish istagini bildirgan 12 nafar yosh payvandlash kursida o‘qitilmoqda. Xosilot mahallasi iqtidorli va ta’lantli yoshlari orasida chempionlar ham bor. Masalan, Sanjar Tojiboyev va Arofat Tug‘unboyeva muay-tay sport turi bo‘yicha, Akramjon Alijonov esa belbog‘li kurash bo‘yicha O‘zbekiston chempionligini qo‘lga kiritishgan. Bu yoshlar mahalla va jamiyatda ijobiy o‘rnak bo‘lib, boshqalarni ham sportga, o‘z salohiyatini rivojlantirishga undashadi. Xosilot jinoyatchilikdan xoli hududga aylanadi Xosilot mahallasida sport inshootlari yoki o‘quv markazlari yo‘qligi sababli, yoshlar bilim olish va sport bilan shug‘ullanishda qiyinchilikka duch kelishadi. Ushbu muammoni hal qilish maqsadida 19-sonli maktabning ta’mirtalab binosini qayta rekonstruksiya qilish yoki yengil konstruksiyadagi yangi bino qurish reja qilinmoqda. Yangi binoda chet tillari, ay-ti, ayollar va erkaklar uchun kasbga o‘qish, elektron kutubxona va mini stadion hamda sport zalini tashkil etiladi. Natijada, maktab bitiruvchilari va mahalla hududidagi 300 nafar yoshlar chet tillarini, ay-tini o‘rganib, zamonaviy ta’lim olish imkoniyatiga ega bo‘ladi. Dehqonchilik bilan shug‘ullanayotgan yoshlarni qo‘llab-quvvatlash uchun ekosportyorlar guruhlarini shakllantiriladi. Dehqonchilikni o‘rganmoqchi bo‘lganlar uchun esa yoshlar yetakchisining xonasida “Agro kutubxona” tashkil etilgan bo‘lib, hozirda 100 dan ortiq dehqonchilik mahsulotlarini yetishtirishga oid qo‘llanmalar mavjud. Yoshlar yetakchisining 2025-yildagi asosiy maqsadi esa Xosilot mahallasini ishsizlik va jinoyatchilikdan xoli hududga aylantirish hamda respublika miqyosida namunali mahalla qilishdir. Bu borada mahalla yettiligi bilan hamkorlikda vazifalarni belgilab olingan. – Men oddiy usta oilasida dunyoga kelganman, – deydi Isroiljon Raimov. – Otamning kasbi duradgorlik, shu sababli men ham yoshligimdan shu kasbga qiziqib, o‘rganishni boshlaganman. Hozirda ham bo‘sh vaqtlarimda mebel, eshik va romlar yasash bilan shug‘ullanaman. Ko‘p vaqtim yoshlar bilan o‘tgani uchun bu ishga ko‘p vaqt ajrata olmayman, lekin vaqt topib bu ishni ham qilishga harakat qilaman. Bir nechta shogirdlarim bor. Meni har doim yoshlarning o‘sishi, o‘z imkoniyatlarini kashf etishi va yangi hunarlarni o‘rganishga qiziqishi ilhomlantiradi. Shu sababli men bu hunarga qiziqqan yoshlarni shogirdlikka olib, ularni o‘z kasbimda malakali ustalarga aylanishlari uchun qo‘limdan kelgan barcha bilim va tajribamni ularga o‘rgatib kelmoqdaman.      

30.1.2025 1298

G‘ijduvondan chiqmagan bola edim...

Bizning Fayzulla Xo‘jayev mahallamiz yoshlarining faolligi va ular rivojlanishi uchun qilinayotgan samarali tashabbuslari bilan ajralib turadi. Hududimizda 1180 nafar yosh (shundan 564 nafari qizlar) yashaydi. Men ularning hayotidagi o‘zgarishlarni muxtasar yozmoqchiman. Bo‘sh vaqt. 2024-yilda 1080 nafar yosh “Besh tashabbus olimpiadasi”da ishtirok etish istagini bildirdi. Shashka, shaxmat, vorkaut, armrestling, stritbol va kurash bo‘yicha vakillarimiz musobaqalarning tuman va viloyat bosqichlarida g‘olib va sovrindorlar qatoridan joy oldi. “Yoshlar ovozi – Bo‘zatov Fest”, “Zakovat”, “Yosh kitobxon”, “Mushoira” “Yosh kitobxon oila” musobaqalarida ham faol qatnashdi. Bandlik. Shu yili maktabni tamomlagan 92 nafar o‘quvchining barchasi o‘z yo‘lini topib ketdi. 15 nafari ishli bo‘ldi, 5 nafariga imtiyozli kredit ajratildi, 1 nafari rasmiy migratsiyaga yuborildi. 71 nafar o‘g‘il-qiz oliy va kasb-hunar ta’lim muassasalarida o‘qishni davom ettirmoqda. “Og‘ir” toifa. Davlatning e’tibori va g‘amxo‘rligiga muhtoj deb topilgan 15 nafar yosh O‘zbekiston mahallalari uyushmasining Buxoro viloyat boshqarmasi rahbari Murod Umarovga biriktirilgan edi. Mas’ul rahbar yoshlarning muammolarini o‘rganib, biriga imtiyozli kredit berilishi, ikkoviga ishga joylashishda ko‘maklashdi. Ehtiyojiga ko‘ra, 1 nafar yoshning davolanish xarajatlari qoplandi, yana 1 nafariga moddiy yordam ajratildi. 10 nafar yosh kafillik asosida probatsiya nazorati va profilaktik hisobdan chiqarildi. Jinoyatchilikning oldini olish. Bu borada profilaktika inspektori va viloyat rahbarlari bilan hamkorlikda olib borilgan ishlar natijasida Fayzulla Xo‘jayev mahallasi “qizil”dan “sariq” toifaga chiqib oldi. 2023-yilda 9 ta jinoyat sodir etilgan bolsa, 2024-yilda 2 ta huquqbuzarlik qayd etilgan. “Yoshlar daftari”. O‘tgan yili 12 nafar yosh “Yoshlar daftari”ga kiritilib, 67 million so‘mlik moliyaviy yordam olgan. Yil davomida ularning muammolari hal qilinib, hayotini izga tushirishga ko‘maklashildi. Migrantlar. Yil boshidagi tahlilga ko‘ra, 35 nafar yosh xorijda ishlayotgan yoki o‘qiyotgan edi. Mahalla yettiligi va hamkor tashkilotlar ko‘magida 15 nafar mehnat migrantini yurtimizga qaytardik. Salohiyati va imkoniyatidan kelib chiqib, ular bandligi ta’minlandi, oilasi bag‘rida yashamoqda. O‘ylaymanki, bu yoshlar bilan ishlash borasidagi eng katta yutuqlarimizdan biri... Yoshlar yetakchisi sifatidagi faoliyatim shaxsan o‘z hayotimni ham tubdan o‘zgardi. Avvallari G‘ijduvondan chiqmagan bola edim. Yoshlar tizimida ishlab, ko‘plab muvaffaqiyatlarga erishdim. 2023-yilning yanvar-iyun oylarida Yoshlar ishlari agentligi huzuridagi Yoshlar muammolarini o‘rganish va istiqbolli kadrlarni qayta tayyorlash instituti tinglovchisi bo‘ldim. Faoliyat taqozosi bilan qator tanlov va musobaqalarda qatnashyapman. Masalan, “Yosh kitobxon oila” tanlovining tuman bosqichi g‘olib bo‘lik, viloyat bosqichida qatnashdim. “Yosh huquqshunos” tanlovining tuman bosqichida 2-o‘rinni qo‘lga kiritdim. “Ibook.uz”, “OliygohUz”, “Registon”, “KHISO” online olimpiadalarida sertifikatlar olishga erishdim. 2024-yilda “Yilning eng namunali mahalla yoshlar yetakchisi” tanlovining viloyat bosqichi g‘olib bo‘lib, respublikada ham munosib ishtirok etdim. 2024-yil 4-chorak yakunlari bo‘yicha “Top – 100” yetakchi safiga kiritildim. Shaxsiy rivojlanishim ustida izlanyapman. “Ibrat academy”da turk tilini o‘rganib, sertifikat oldim. Har oyda ikkita kitob o‘qishni odatga aylantirganman. Kelajakda yoshlar bilan ishlashda yangicha tashabbuslarni hayotga tatbiq va ularga yanada ko‘proq imkoniyatlar yaratishni maqsad qilganman. 2024-yilda “Yilning eng namunali mahalla yoshlar yetakchisi” tanlovining viloyat bosqichi g‘olib bo‘lib, respublikada ham munosib ishtirok etdim. 2024-yil 4-chorak yakunlari bo‘yicha “Top – 100” yetakchi safiga kiritildim.

24.1.2025 1453

Yoshlar bandligida katta o'sish

Yoshlar bandligini ta’minlash va tadbirkorlikni rivojlantirish jamiyatda iqtisodiy barqarorlikni mustahkamlaydi, ijtimoiy muammolarni kamaytiradi. Yoshlarni tadbirkorlikka jalb qilish va kerakli resurslar bilan ta’minlashda mahalladagi yoshlar yetakchilarininh o‘rni katta bo‘lmoqda. Bu borada namunali faoliyat olib borayotgan samarqandlik Diyorbek Akbarov tajribasiga ko‘z tashlaymiz. Diyorbek Akbarov 2024-yildan beri Urgut tumani “O‘zbekiston” mahallasi yoshlar yetakchisi. U “Yosh maslahatchilar kengashi” raisining o‘rinbosari va Oliy Majlis Senati huzuridagi Yoshlar parlamenti a’zosi sifatida yoshlarni qo‘llab-quvvatlash va ularning muammolarini hal etishga ko‘maklashmoqda. Shuningdek, u “Yilning eng namunali mahalla yoshlar yetakchisi” ko‘rik-tanlovida “Yoshlarning tadbirkorlik g‘oyalarini amalga oshirishda va bandligini ta’minlashda samarali ko‘maklashgan eng namunali mahalla yetakchisi” yo‘nalishi g‘olibi bo‘ldi. Yetakchi ishsiz yoshlar bandligini ta’minlash, iqtidorini rivojlantirish va ehtiyojlarini yuqori tashkilot rahbarlariga yetkazish uchun takliflar kiritadi. O‘zbekiston mahallasi balansi: Aholi soni: 6865 nafar; Yoshlar: 1932 nafar; Xotin-qizlar: 954 nafar. “Yashil” toifa: 1253 nafar; “Sariq” toifa: 676 nafar; “Qizil” toifa: 12 nafar. Mahalla drayveri: xizmat koʻrsatish va dehqonchilik. Ishsiz yoshlar ko‘p edi – Yetakchi sifatida ish boshlagan paytimda mahallada ishsiz yoshlar juda ko‘p edi, – deydi O‘zbekiston mahallasi yoshlar yetakchisi Diyorbek Akbarov. – Shuning uchun ishni ular sonini aniqlash, qiziqishlari, malakasi va imkoniyatlarini o‘rganishdan boshlanganman. Aniq ma’lumotlarni to‘plab, yoshlarni ish bilan ta’minlashdagi muammolarni tahlil qildim. Amaliy ishlarimiz natijasida yil yakunida yoshlar orasida bandlik darajasi 60-70 foizga oshdi, bu men belgilagan maqsadga yaqinlashganimni anglatadi. Yangi ish joylari tashkil etildi, kasb-hunar kurslari va o‘quv dasturlari orqali ko‘plab yoshlar yangi malakaga ega bo‘ldi, natijada ular nafaqat o‘zlari uchun, balki jamiyatga naf keltira boshladi. Xatlov natijalari va tahlillarga ko‘ra, yoshlarning eng katta muammosi ta’lim va malaka yetishmasligi edi. Yetakchi yoshlarni kasb-hunar o‘rganishga, qisqa muddatli kurslarga yo‘naltirish, malaka oshirish va ish o‘rinlari yaratishga kirishdi. Xususan, 89 nafar maktab va kasb-hunar maktabi bitiruvchilarining 42 nafari o‘qish bilan qo‘shimcha ravishda kasb-hunar o‘rganishi uchun mahalladagi tadbirkor, hunarmand va fermerlarga biriktirildi. Natijada o‘quv yili oxirida 42 nafar yosh rasmiy ish topib, doimiy daromad manbayiga ega bo‘ldi. Tadbirkorlar bilan hamkorlik 2024-2025-o‘quv yilida ham 65 nafar yosh tadbirkorlarga biriktirilgan. O‘quvchilar o‘qish bilan bir vaqtda doimiy daromad topib, tadbirkorlik faoliyatida o‘z o‘rinini topishga intilmoqda. Yoshlar o‘z bilim va malakasini amaliyotda qo‘llash imkoniyatiga ega bo‘lmoqda. Jahongir Ravshanov, Muhammadali Hasanov va Akobir Bo‘ronov tumandagi yetakchi tadbirkorlardan ish o‘rganib, o‘zlarining kelajakdagi biznesini quryapti. Ular Urgut savdo kompleksida o‘z savdo do‘konlarini tashkil qilgan. Bu yoshlar o‘z do‘konida 2 tadan ish o‘rni yaratdi. 45 nafar yoshga kredit ajratildi Hokim yordamchisi bilan hamkorlikda 2024-yilning o‘zida jami 45 nafar yoshga kredit mablag‘lari olib berilishida ko‘maklashildi. Shundan 16 nafariga “Biznesga birinchi qadam” dasturi orqali 80 million so‘m, 3 nafariga “Kichik va o‘rta biznesni rivojlantirish” dasturi orqali 260 million so‘m, 26 nafariga esa “Oilaviy tadbirkorlikni rivojlantirish” dasturi orqali 295 million so‘m kredit ajratilganShu vaqt davomida yoshlar 10 ta yangi tadbirkorlik subyektini tashkil etdi, 2 ta biznes subyekti faoliyati qayta tiklandi. 2024-yildagi “Bandlik dasturi”ga jami 140 nafar yosh kiritilgan edi. Shundan 50 nafari ishsiz, 90 nafari bitiruvchi yoshlar. Ulardan 47 nafari Vazirlar Mahkamasi huzuridagi Biznes va tadbikorlik oliy maktabi Samarqand viloyati filialida o‘qishga yo‘naltirildi. O‘quv kurslari yoshlarni tadbirkorlikka o‘rgatib, o‘z biznesini boshlash va rivojlantirish uchun zarur bilim, ko‘nikmani shakllantirdi. Yana 25 nafar yosh Savdo-sanoat palatasi yordamida tadbirkorlikka oid o‘quv dasturlarini tamomladi. Maktab bitiruvchilaridan 27 nafari doimiy ish o‘rinlariga joylashtirilib, o‘zini moddiy ta’minlashiga yordam berildi. 4 nafar bitiruvchiga o‘zini o‘zi band qilishi uchun zarur yordam ko‘rsatilgan. 10 nafar ishsiz yoshga kredit ajratildi, 40 nafari boshqa taqmoqlarda ishli bo‘ldi. – Yoshlarning siyosiy-huquqiy savodxonligini oshirish, ularni qo‘llab-quvvatlash, vatanga muhabbat ruhida tarbiyalash maqsadida ayni paytda Urgut tumanidagi qator davlat tashkilotlari bilan hamkorlikni yo‘lga qo‘yganmiz, – deydi yoshlar yetakchisi. – Davlat soliq inspeksiyasi, Ichki ishlar boshqarmasi, Prokuratura, Adliya bo‘limi, Bandlikka ko‘maklashish markazi, Majburiy ijro byurosi, Milliy gvardiya bo‘limi, Mudofaa ishlari bo‘limi, Madaniyat bo‘limi, Maktabgacha va maktab ta’limi bo‘limi bizning eng yaqin hamkorlarimiz. Soha rahbarlari boshchiligida doimo yoshlar bilan davra suhbatlari, rahbar va yoshlar uchrashuvlari tashkil qilinib, yoshlarning muammolari tegishliligi bo‘yicha hal qilinadi. Yoshlarning taklif va tashabbuslari tinglanadi. Mahalla “Ibrat farzandlari” jamoasi O‘zbekiston mahallasida 10 nafar yosh “Ibrat academy” ilovasi orqali chet tilini o‘rganib, xalqaro sertifikatlarni qo‘lga kiritdi. Bu yoshlarning ta’lim va ishdagi imkoniyatlari kengayishiga yordam berdi. Yoshlar yetakchisi tashabbusi bilan til sertifikatlarini qo‘lga kiritgan yoshlar ishtirokida “Ibrat farzandlari” jamoasi tuzildi. Jamoaning asosiy vazifasi yoshlar o‘rtasida til o‘rganishni targ‘ib qilish va o‘g‘il-qizlarni qo‘llab-quvvatlashdir. Ayni paytda jamoada faoliyat ko‘rsatayotgan 11-sinf o‘quvchilari Islombek Jamolov va Umidjon G‘ulomov mahalladagi ijtimoiy himoyaga muhtoj, iqtidorli va til o‘rganishga qiziqqan 48 nafar yoshga ingliz tilini bepul o‘rgatmoqda. Bu nafaqat yoshlarning til o‘rganish imkoniyatlarini kengaytiradi, balki yoshlarga ham yordam berishi bilan ahamiyatli. 10-sinf o‘quvchisi Xislatbek Umarov yoshlar uchun ingliz tili bo‘yicha darslar o‘tib, o‘z bilimini boshqalarga ulashmoqda. Xislatbek shu orqali doimiy daromad manbayiga ega bo‘ldi. 2025-yil uchun vazifalar Yoshlar yetakchisi 2025-yil uchun aniq va maqsadli rejalar ishlab chiqqan. Yil davomida bir qancha muhim tashabbuslarni ko‘zlagan. Masalan: “Besh tashabbus olimpiadasi”. “Besh tashabbus olimpiadasi”ning respublika bosqichida kamida 5 ta yo‘nalish bo‘yicha 1-o‘rin uchun tayyorgarlik ko‘rish rejalashtirilgan. Bu yoshlar uchun katta imkoniyat yaratib, ularning bilim va ko‘nikmalarini rivojlantirishga yordam beradi. O‘quvchi va talabalar bandligini ta’minlash. Bu yil mahalladan 115 nafar yosh maktab va OTMni tamomlaydi. Bu yoshlarni ish o‘rinlari bilan ta’minlan dasturi ishlab chiqilmoqda. “Ibrat academy” ilovasi orqali chet tillarni o‘rganish. Yoshlar yetakchisi “Ibrat academy” orqali til o‘rganayotgan 28 nafar yoshning sertifikat olishiga amaliy ko‘mak berishni reja qilgan. “Ustoz AI” ilovasini targ‘ib qilish. “Ustoz AI” ilovasini yoshlar o‘rtasida keng targ‘ib qilish orqali mahallada zamonaviy kasblarni bepul o‘rganish tizimini ommalashtirish rejalashtirilgan. Bu yoshlarning yangi kasblar va raqamli texnologiyalar sohasida o‘z bilimlarini kengaytirishiga yordam beradi. Migratsiyadagi yoshlar bilan ishlash. Migratsiyaga ketgan 178 nafar yosh bilan tizimli ish tashkil etish orqali yil oxirigacha 83 nafar yoshni yurtga qaytarish va ularni shu yerning o‘zida ish bilan ta’minlash belgilangan.

10.1.2025 1843

“Top – 100”: Har sohada chempion yetakchi

Yoshlarning ijtimoiy faolligini oshirish, iqtidori va tashabbuslarini rag‘batlantirish hamda hayotda o‘z o‘rnini topishlariga yordam berish – mahalladagi yoshlar yetakchilarining asosiy vazifalaridan biridir. Yoshlar kelajakda jamiyat rivojiga hissa qo‘shishi uchun zarur imkoniyatlarga ega bo‘lishi kerak. Farg‘ona shahridagi Beruniy mahallasi yoshlar yetakchisi O‘g‘ilxon A’zamjonova yoshlarning ijtimoiy faolligini oshirish va ularga yordam berish yo‘lida ko‘p mehnat qilmoqda. U mahallada iqtidorli va intellektual faol yoshlar bilan ishlash, ularning tashabbuslarini qo‘llab-quvvatlash va rivojlantirishga alohida e’tibor qaratadi. O‘g‘ilxon A’zamjonova – “Quvnoqlar va zukkolar” respublika ko‘rik-tanlovi ishtirokchisi, “Quvnoqlar” jamoasi a’zosi. Sport orqali xotin-qizlar salomatligini mustahkamlash va iqtidorli yoshlar safini yanada kengaytirish mavzusidagi maqolalar muallifi. Respublika “Zakovat” turnirida 3-o‘rinni egallagan. Viloyatda “Yilning eng namunali mahalla yoshlar yetakchisi” sifatida e’tirof etilgan. 2024-yilning 3-chorak yakunlari bo‘yicha respublikadagi “TOP–100” yoshlar yetakchisi safiga kiritilgan. Beruniy mahallasi balansi: Aholi soni: 5151 nafar; Yoshlar: 889 nafar; Xotin-qizlar: 444 nafar. “Yashil” toifa: 783 nafar; “Sariq” toifa: 106 nafar; “Qizil” toifa: 10 nafar. Mahalla drayveri: xizmat koʻrsatish. To‘rt muhim vazifa – 2024-yil boshida o‘z oldimga to‘rtta muhim vazifani belgilab olgan edim: mahallada iqtidorli va intellektual salohiyatga ega yoshlar sonini ko‘paytirish va ularni qo‘llab-quvvatlash; yoshlarning bo‘sh vaqtini mazmunli tashkil etish uchun sport va chet tili to‘garaklarini tashkil etish; migratsiyadagi yoshlarni O‘zbekistonga qaytarib, bandligini ta’minlash; ishsiz yoshlar sonini kamaytirish va kam ta’minlangan oila farzandlarini kambag‘allikdan chiqarish maqsadida ularga imtiyozli kreditlar ajratish hamda bandligini ta’minlash. Rejalarimni belgilanganidek bajara olmasam, yetakchi sifatida ishlashimdan naf yo‘q, deb qat’iy maqsad qilgandim, – deydi qahramonimiz Og‘ilxon A’zamjonova. Yelkasiga katta mas’uliyat olgan O‘g‘ilxon ishni “Yo‘l xarita”si ishlab chiqishdan boshladi. Xatlov jarayonida aniqlangan muammolar yo‘l xaritasiga kiritildi. Tinimsiz mehnat, ishtiyoq va kasbga muhabbat o‘z samarasini berdi. Yil yakunida belgilangan vazifalar rejadagidek bajarildi. Avvaldan katta ishlarni qo‘rqmasdan o‘z zimmasiga olgan yoshlar yetakchisi uchun ortda qolgan muvaffaqiyatli yil bir debocha ekani shubhasiz. Quyida belgilangan 4 muhim vazifa qanday uddalanganini ko‘rib chiqamiz. Beruniy mahallasida iqtidorli va intellektual salohiyatga ega yoshlar sonini ko‘paytirish va ularni qo‘llab-quvvatlash. Mahallada jami 15 nafar yosh bir necha sport turlaridan O‘zbekiston chempioni va sport ustaligiga nomzod bo‘lishga erishdi. “Ibrat farzandlari” loyihasi orqali 9 nafar yosh ingliz tili bo‘yicha xalqaro sertifikatni qo‘lga kiritdi. Xorijiy tillarni o‘rganish va amaliyotda qo‘llashga qiziqish ortib borayotgani natijasida mahallada til sertifikatini qo‘lga kiritgan yoshlar soni 48 nafarga ortdi. Bunyod Tursunov – yosh dasturchi, University of Science and Technology talabasi. U 2 ta dasturiy loyiha muallifi. Bu loyihalar nafaqat yoshlarning texnologik bilimlarini amaliyotga tatbiq etish imkoniyatini yaratdi, balki kelajakda mahalla iqtisodiyotining rivojlanishiga hissa qo‘shadi. Yoshlarning bo‘sh vaqtini mazmunli tashkil etish uchun sport va chet tili to‘garaklari tashkil etish. Mahallada yoshlar uchun futbol, taekvondo, muaytay va voleybol to‘garaklari ishga tushirildi. To‘garaklar yoshlarning jismoniy salomatligini yaxshilash, ularning sog‘lom hayot tarzini rivojlantirishga qaratilgan. Sport bilan shug‘ullanish yoshlar o‘rtasida jamoaviylikni, raqobatbardoshlikni va o‘ziga ishonchni oshirishga yordam berdi. Yoshlar yetakchisi tomonidan kam ta’minlangan oila farzandlari uchun maxsus chet tili to‘garaklari tashkil etildi. 5 nafar yosh turk tilini o‘rganish uchun to‘garakka jalb qilindi. To‘garaklar yoshlarning bo‘sh vaqtini mazmunli va foydali o‘tkazishiga, ularning intellektual va ijtimoiy salohiyatini oshirishga xizmat qiladi. 24 yoshli Jasurbek Olimov volyebol bo‘yicha O‘zbekiston chempioni va sport ustasi. O‘zbekiston jismoniy tarbiya va sport universitetida ta’lim oladi. Mohinur Shuhratova Ingliz tili IELTS imtihonidan 6,5 ballni qo‘lga kiritdi. Sardorbek Madg‘oziyev koreys tilidan TOPIK sertifikatiga ega. Hozir Koreya xalqaro universiteti magistratura bosqichida tahsil olmoqda. Migratsiyadagi yoshlarni O‘zbekistonga qaytarib, ularning bandligini ta’minlash Yil boshida Beruniy mahallasidan 33 nafar yosh migratsiyaga ketgan edi. Yil yakuniga qadar ulardan 5 nafari O‘zbekistonga qaytarilib, bandligini ta’minlash uchun zarur choralar ko‘rildi. Bu yoshlarning qaytishi ularning yangi hayot boshlashiga imkon yaratdi. Vatanga qaytgan yoshlarning 2 nafariga tadbirkorlik faoliyatlarini boshlashi uchun imtiyozli kredit olib berildi. 1 nafariga “Yoshlar daftari”dan turar joy uchun ijara to‘loviga yordam berildi. 2 nafar yosh kompyuter xizmatlari sohasida o‘zini o‘zi band qilib, faoliyat boshladi. Ular mustaqil ravishda biznesini rivojlantirib, texnologik xizmatlar ko‘rsatish bilan shug‘ullanmoqda. Yoshlar o‘zlari uchun ish o‘rni yaratish bilan birgalikda boshqalarga ham yangi imkoniyatlar taqdim etmoqda. Ishsiz yoshlar sonini kamaytirish va kam ta’minlangan oila farzandlarini kambag‘allikdan chiqarish maqsadida ularga imtiyozli kreditlar ajratish hamda bandligini ta’minlash. Yil boshidagi xatlov jarayonlarida mahallada 5 nafar ishsiz yosh aniqlangan edi. Bu yoshlarni band qilish va ularning turmush sharoitlarini yaxshilash maqsadida imtiyozli kreditlar ajratildi. Ulardan biri xususiy korxona ochib, faoliyat boshladi. Shu orqali moddiy ahvolini yaxshilashga erishdi, mahallada yangi ish o‘rinlarini yaratishga ham hissa qo‘shdi. Yana biri jamoat ishlariga jalb etildi va o‘z faoliyatini ijtimoiy loyihalarda davom ettirmoqda. Bu yoshning jamoat ishlariga jalb etilishi, jamiyatga foyda keltirish bilan birga, o‘ziga nisbatan mas’uliyat hissini rivojlantirishga yordam berdi. Qolgan 3 nafar yosh o‘zini o‘zi band qilgan. Shaxsiy namuna O‘g‘ilxon A’zamjonova har haftada bitta badiiy kitobni o‘qib tugatishga harakat qiladi. Bu uning intellektual rivojlanishiga hamda yoshlarni mutolaaga qiziqtirishga oshirishga xizmat qiladi. Shuningdek, yetakchi Turk tilidan B2 darajadagi sertifikatga ega. “Ibrat farzandlari” orqali ingliz tilini o‘rganib, B2 darajasini ham qo‘lga kiritgan. Bu hammasi emas. O‘g‘ilxon taekwondo WTF yo‘nalishida O‘zbekiston chempioni va qora belbog‘ sohibi. Gandbol bo‘yicha Universiada musobaqasida 1-o‘rinni qo‘lga kiritgan va sport ustaligiga nomzod hisoblanadi. Qo‘l jangi sport turi bo‘yicha 4 karra O‘zbekiston chempioni va sport ustasi unvoniga ega. Shunday qilib, yoshlar yetakchisi o‘zining sportdagi yutuqlari, chet tilidagi bilimlari va kitob o‘qish odati bilan yoshlar uchun haqiqiy namuna bo‘lmoqda. “Jadidlar maktabi” muzeyi ochiladi O‘g‘ilxon A’zamjonova “Yilning eng namunali mahalla yoshlar yetakchisi” tanlovining viloyat bosqichi “Iqtidorli va intellektual yoshlar bilan faoliyat yuritgan eng namunali mahalla yoshlar yetakchisi” yo‘nalishida 2-o‘rinni qo‘lgan kiritgan edi. Darhaqiqat, uning tashabbuslari yoshlarni o‘zgartiryapti, ijtimoiy faolligini oshiryapti, iste’dodlarni rivojlantirmoqda. Qahramonimizning 2025-yil uchun ham maqsadlari katta. – 2025-yilda katta maqsadlarni ko‘zlaganman, – deydi yoshlar yetakchisi O‘g‘ilxon A’zamjonova. – Asosiy maqsadim mahallada iqtidorli yoshlarni yanada qo‘llab-quvvatlash uchun “Jadidlar maktabi” muzeyini tashkil etish. Muzeyda jadidchilarga oid ma’lumotlar va mahallada katta yutuqlarga erishgan yoshlarning natijalari namoyish etiladi. Uning qoshida yoshlarga chet tili va kelajak kasblarini o‘rgatish uchun zarur sharoitlar yaratilgan o‘quv maskani joylashadi. Kam ta’minlangan oila farzandlari uchun bepul o‘quv kurslari tashkil etiladi. Ishsiz yoshlarni kasbga o‘qitish va tadbirkorlikka tayyorlash uchun o‘quv maskanini tamomlagan yoshlar mahalladagi yoshlar yetakchisi tavsiyasi asosida imtiyozli kreditlar bilan ta’minlanadi. Shuningdek, chetda ishlash istagida bo‘lgan yoshlarni o‘qitib, qonuniy mehnat migratsiyasiga yuborish va ularning oilalariga yaxshi daromad olib kirishlarini ta’minlashni rejalashtirganman. Va o‘zim uchun yana bir chet tilini o‘rganishni maqsad qilib qo‘ydim.

18.10.2024 3574

Men kasbimdan nega faxrlanaman?

Ha, men siz bilgan, yoningizda “labbay” deb yurgan oddiy o‘zbek o‘g‘loniman. Bu hikoyani aytishdan maqsadim – shukronalik hissi bilan yashashga loyiq ekanimizni, Vatanimiz tinch, osmonimiz musaffo ekanini aytish. Men 1993-yilda oddiy oilada tug‘ildim. 2009-yili maktabni tugatib, kollej ostonasiga qadam qo‘ydim. 2012-yili kollejni bitirgach, ko‘p pul topaman deb Rossiyaga otlandim. Poyezdda ketar ekanman xuddi meni zo‘r ish, katta maosh kutub turgandek xursand edim. Biroz muddat ishlab, mashina olaman, uy-joyimni zo‘r qilib olaman, hamma havas qiladi, deb o‘yladim. Manzilga yetib kelganimda do‘stim va Artur isimli bir ish beruvchi kutub oldi. Biz ish joyimizga yo‘l oldik. O‘rmon oralab ketayotib o‘yladim: bu qanday joy, shu joylarda ishlaymanmi, shu joylarda qolib ketmasam bo‘ldi... Do‘stim Artur bilan ruscha gaplashar, meni hadik basar edi, “eh nodon bola, nega ustozlaring tilni o‘ran, kerak bo‘ladi, desa parvo qilmading!” deb o‘zimdan xafa bo‘lib ketardim. Ish joyimizga yetib keldik – bir vagonni ko‘rsatib “shu seni yotog‘ing, buguncha dam ol, ertaga ishga chiqasan”, deb bitta yostiq va yopinchiq berishdi-da, o‘zlari boshqa joyga ketdi. Bir o‘zim qoldim. Sovuqda yotar ekanman uymidagi issiq joyimni eslab, ko‘zimga yosh keldi. Tong otdi. Saot 6 bo‘lganda Artur “turlaring, ishlagani kegansanlar, yotgani emas!” deb baqirardi chamamda. Hamma turub oshxonaga yo‘l oldik. Hozir qaymoq, issiq non, issiq shirin choy berishsa kerak, deb xayol surub ketardim. Borsam, stolda qotgan qora buxonka va ikki dona oq qand turardi... Shunisiga shukr, deb nonushtadan keyin ishga chiqdik. Ishimiz katta daraxtlarni kesib berishdan iborat edi. Havo shunchalar sovuq ediki, ko‘zimizdan yosh chiqsa, qotib qolar edi. Shunday sharoitda bir necha oy ishladim. Birinchi maoshimni oldim. Xursand bo‘lib uyga jo‘natdim va birinchi bo‘lib onamga qo‘ng‘iroq qildim. “Allo, onajon...”, desam onamning birinchi gapi “Bolam, qiylanmayapsanmi? Ish joying sovuqmasmi, katta-katta ovqat yeyapsanmi?” bo‘ldi. Ko‘zlarimga yosh kelib, “Onajon, sizni sog‘indim!” deyishdan boshqa so‘z topolmadim. Onam “Men ham so‘g‘indim, ko‘rgim keldi!” deb yig‘lab yubordi. “Yig‘lamang, yaqinda boraman, qishlog‘imda ishlayman. Mayli, ozroq pul topsam ham, sizlarning yoninggizda, o‘z uyimda bo‘laman”... deb xayrlashdik. Kunlar shu tariqa – qiyinchilik bilan o‘tardi. Bizni hech kim odam o‘rnida ko‘rmas, og‘rib qolsak ham ishlashga majbur edik. Oradan oylar o‘tib, bir amalab qishlog‘imga qaytdim. Bu menga rost, boshimni yerga qo‘yib, ona tuprog‘imni peshonamga surtdim. Ichimdan qanaqa hissiyotlar o‘tganini o‘zimdan boshqa hech kim bilmaydi... Vaqt – oqar suvdek. Tirikchilik g‘amida har xil ishlar qilib yurdim. Bir kuni do‘stim mahallada yoshlar yetakchisi lavozimi joriy qilinayotganini aytib qoldi. Bu lavozimga nomzodlar tanlav asosida saralanayotgan ekan. Tezda hokimiyatga bordik. Suhbat bo‘ldi. Mufaqiyatli o‘tdim – o‘zim tug‘ilib o‘sgan, o‘ynab katta bo‘lgan mahallamga ishga olishdi. 3 oy davomida malakali ustozlar, soha egalari bizga bilim va ko‘nikmalar ulashdi. 2022-yil 19-yanvar kuni Paxtaobod tumanidagi Zokir Habibiy mahallasi yoshlar yetakchisi lavozimida ish boshladim. Davlatimiz rahbari bizga judda katta imkoniyat, imtiyozlar berdi. Deyarli hamma qarorlar yoshlar uchun xizmat qilmoqda. Mehnatim sabab 2023-yilda Paxtaobod tumanida eng faol yoshlar yetakchisi, bu yil Andijon viloyatida yoshlar yetachilari o‘rtasida bo‘lib o‘tgan ko‘rik-tanlovda g‘oliblikni qo‘lga kiridim. Bilasizmi, unverstetga ham suhbat asosida o‘qishga kirdim. Yoshlar ishlari agentligi barcha to‘lovlarni qilib berdi, 1-kurs uchun kantrakt to‘lovini ham. 2024-yilda yoshlar yetakchilari o‘rtasida “TOP 100” talikdan ham joy oldim. Mahalam yoshlari bilan ko‘plab yutuqlarga erishdik. Bugun baralla ayta olaman – men Yangi O‘zbekistonda yashayotganimdan faxrlanaman! Qo‘limda yoshlarni qo‘llab-quvvatlash uchun 30 dan oshiq yordam turlarini belgilash imkoniyati bor. Prezidentimiz bizga ishongani – baxt!

10.10.2024 3531

Top 100: “Qutqaruvchi” yetakchi

Islombek Shamuratov – Xorazm viloyati Xiva shahridagi “Yangi hayot” mahallasi yoshlar yetakchisi. U o‘z tashabbuslari bilan mahalla yoshlarini birlashtirib, ularga yo‘l-yo‘riq ko‘rsatmoqda. Yoshlar o‘rtasida jinoyatchilik va huquqbuzarlikning oldini olish, ijtimoiy barqarorlikni ta’minlashga qaratilgan tadbirlari orqali e’tirof etilgan. Uning yutuqlari mamlakat miqyosida “Top 100” yoshlar yetakchilaridan biri safida o‘z o‘rnini topishiga sabab bo‘ldi. U yetakchilik fazilatlari, innovatsion yondashuvlari va yoshlarni ijtimoiy hayotga jalb qilishdagi sa’y-harakatlari bilan yoshlar orasida ishonchli va o‘zgarishlarga tayyor lider sifatida tanilgan. Mahalla ahli uni “qutqaruvchi” deya e’tirof etadi. Uning mehnatlari natijasida 2024-yili “Xavfsiz hayot uchun birlashaylik” shiori ostida o‘tkazilgan tanlovning respublika bosqichida “Yoshlar jinoyati va huquqbuzarligidan xoli mahalla” yo‘nalishida “Yangi hayot” mahallasi birinchi o‘rinni egalladi. “Yangi hayot” mahallasi balansi Aholi soni:  3821 nafar; Xonadonlar: 607 ta; Yoshlar soni: 790 nafar; Ayol-qizlar: 398 nafar; “Yashil” toifa: 666 nafar; “Sariq” toifa: 124 nafar; “Qizil” toifa: 21 nafar. – Yoshlar jamiyatning eng dinamik va ijodiy qatlami sifatida, kelajakni belgilashda muhim rol o‘ynaydi, – deydi “Yangi hayot” mahallasi yoshlar yetakchisi Islombek Shamuratov. – Ayniqsa, jinoyatchilik va huquqbuzarlik masalalari zamonamizda global muammoga aylangan. Men faoliyatimni aynan shu masalalar atrofida qurdim. Yoshlarni nazoratga olish va bandligini ta’minlash orqali jinoyatchilikka barham berish mumkin. Profilaktika inspektori bilan birgalikda tungi reyd tadbirlarini olib boramiz. Reydlar davomida aniqlangan huquqbuzarliklar bo‘yicha yoshlar va ularning ota-onasi bilan gaplashib, chora ko‘riladi va tushuntirish ishlari olib boriladi. Faoliyatimning ilk kunidan mahalla yoshlari orasida ijtimoiy barqarorlikni ta’minlash va jinoyatchilikning oldini olish uchun harakat qilaman. Harakatlarim natijasida “Yangi hayot” jinoyatchilikdan holi hudud deb topildi. 2023-yildan buyon mahallada huquqbuzarlik sodir etilgani yo‘q. Yoshlar va jinoyatchilik Yoshlar o‘rtasidagi jinoyatchilik nafaqat individual hayotga, balki butun jamiyatga ta’sir ko‘rsatadi. Bu muammo ijtimoiy muhitga tahdid soladi, yoshlar kelajagini barbod qiladi. Jinoyatchilik va huquqbuzarlikning oldini olishda yoshlar bilan ishlash va ularning muammolarini tinglash muhimdir. Islombek mahalladagi har bir yoshning fikrlarini inobatga olib, ularning ehtiyojini va muammolarini chuqur o‘rganish orqali bu masalaga kompleks yondashadi. Yoshlar yetakchisi o‘z ishida yoshlarning ijtimoiy va psixologik holatini inobatga olib, ularni turli tadbirlarga jalb etishga harakat qiladi. Tizimli yondashuv –  Faoliyatimda tizimli ish olib borish muhim o‘rin tutadi, – deydi Islombek Shamuratov. – Ish dasturlarimni ishlab chiqishda yoshlarning holatini individual tarzda o‘rganib, tahlil qilaman, ularning ehtiyoj va muammolarini aniqlayman. Tajribamda shuni angladimki, faqatgina ayrim tadbirlar bilan cheklanib qolmaslik kerak, balki tizimli ravishda ishlash muhim hisoblanadi. Bu yo‘lda menga profilaktika inspektori B.Boltayev va mahalla yettiligi ko‘makchi bo‘lmoqda. Har bir yoshga individual yondashuv ular bilan yetakchi o‘rtasidagi o‘zaro munosabatlarni kuchaytiradi va ishonchni mustahkamlaydi. Mahallada mas’ul rahbarlar, xodimlar bilan tashkil etilgan seminarlar, treninglar va uchrashuvlar orqali Islombek huquqbuzarlikka moyil yoshlar bilan bevosita ishlaydi. Ular bilan muloqot qilib, fikrlarini tinglaydi va zarur bo‘lsa, maslahat, ko‘mak beradi. Bu jarayon o‘z-o‘zini anglashga yordam beradi va yoshlarni ijtimoiy faol bo‘lishga undaydi. Zamonaviy sport maydonchasi Yoshlarga huquqiy tarbiya berish, qonunlarga hurmat bilan munosabatda bo‘lishga o‘rgatish bu jarayonning asosiy jihatlaridan biridir. Bundan tashqari, Islombek turli sport va madaniy tadbirlar tashkil etadi. Sport orqali yoshlar o‘zlarini ifoda etish imkoniyatiga ega bo‘ladi va jinoyatchilikdan uzoqlashadi. Madaniy tadbirlar, masalan, bayram va konsertlar esa yoshlar o‘rtasida ijtimoiy muhitni yaxshilashga hissa qo‘shadi. Iqtidorlilarni izlab topish, iste’dodini ro‘yobga chiqarish borasida ham sport muhim. Masalan, sportning stol tennisi turiga qiziqadigan Jasurbek Salimov va Jumagul Salimova “Besh tashabbus olimpiadasi”ning respublika bosqichida 16-21 yosh toifasida 1-o‘rinni egalladi. Natijada mahalla hududida zamonaviy sport maydonchasi qurilib, foydalanishga topshirildi. Muammoli yoshlar bilan ishlash Islombekning faoliyatida jazoni ijro etish muassasalaridan ozod qilingan yoshlar bilan ishlash alohida ahamiyatga ega. Bu yoshlar ko‘pincha jamiyatga qaytishda qiyinchilikka duch keladi va ularni qo‘llab-quvvatlash zarur. Ularning ijtimoiylashishi, jinoyatchilikka qaytmasligi uchun yoshlar yetakchisi yordamini ayamaydi. Islombek ular uchun ijtimoiy reabilitatsiya, psixologik yordam va kasb-hunarga o‘rgatish bo‘yicha suhbatlar o‘tkazadi. Bu ularni jamiyatga qayta integratsiya qilishda katta yordam beradi. Bu borada bir necha dasturlarni amalga tatbiq qilmoqda. “Ijtimoiy reabilitatsiya dasturi” Bunday toifadagi yoshlar uchun ishlab chiqilgan ijtimoiy reabilitatsiya dasturlari quyidagilarni o‘z ichiga oladi: Psixologik yordam. Jinoyat sodir etgan yoshlar ko‘pincha stress, depressiya yoki boshqa psixologik muammolarga duch keladi. Psixolog va mutaxassislar bilan hamkorlikda seminar va individual suhbatlar uyushtirish orqali yoshlarning ruhiy holatini yaxshilashga yordam berish. Yoshlar o‘rtasida muloqot. Psixologik yordam ko‘rsatish bilan birga, bir-biriga o‘xshash muammolarni boshdan kechirayotgan yoshlarni bir joyga to‘plash va fikr almashish uchun debatlar tashkil etadi. Bu o‘zaro tushunish va qo‘llab-quvvatlashni kuchaytiradi. “Kasb-hunarga o‘rgatish” dasturi Jazoni ijro etish muassasalaridan ozod qilingan yoshlar ko‘pincha kasb-hunarga ega bo‘lmaydi. Yetakchi ularni kasb-hunarga o‘rgatish bo‘yicha dasturlar tashkil qilyapti. Amaliy mashg‘ulotlar. Turli kasblar bo‘yicha amaliy mashg‘ulot va ustaxonalarga yoshlarni jalb qilish. Bu orqali yoshlar hunar o‘rganadi va kelajakda daromadga chiqa oladi. Misol uchun, “Yangi hayot” mahallasida kompyuter savodxonligi, oziq-ovqat tayyorlash, tikuvchilik, til o‘rganish markazlari, kosibchilik kabi kurslar tashkil qilingan. Mentorlik dasturlari. Tajribali mutaxassislar mentorlik dasturlari orqali yoshlarga o‘z kasbini tanlashda yo‘l-yo‘riq ko‘rsatadi. Bu orqali yoshlar o‘z maqsadlariga erishish uchun zarur bilim va ko‘nikmalarni egallash imkoniyatiga ega bo‘lmoqda. Ijtimoiy tadbirlarda ishtirok etish Bu toifadagi yoshlar uchun ijtimoiy tadbirlarda qatnashish muhim. Madaniy va sport tadbirlari. Mahalladagi sport musobaqalari, madaniy festival va boshqa tadbirlarda ishtirok etish yoshlarni ijtimoiy hayotga integratsiya qilishda yordam beradi. Bu nafaqat o‘zini ifoda etish, balki yangi do‘stlar orttirishga imkon yaratadi. Ijtimoiy xizmatlar. Ijtimoiy xizmatlarga jalb etish orqali yoshlarda mas’uliyat hissini rivojlantirish. Misol uchun, mahalladagi tozalik aksiyalarida ishtirok etish, yordamga muhtoj insonlarga ko‘maklashish kabi tadbirlarda qatnashish insonlarga nisbatan mehrni uyg‘otishda samarali hisoblanadi. Mahalla yoshlari “Yashil makon” umumilliy loyihasida ham faol ishtirok etib, tuman markazida “Yoshlar bog‘i” tashkil etilishiga o‘z hissasini qo‘shmoqda. Yetakchi tashabbusi bilan mahalla yoshlari o‘rtasida “Mehr” jamoasi shakllantirilib, yoshi keksa, nuroniylar holidan xabar olish, ularga ko‘mak berish yo‘lga qo‘yilgan. Huquqiy maslahatlar Huquqbuzarlikdan qochish va jamiyatda o‘z o‘rnini topish uchun huquqiy bilimga ega bo‘lish muhimdir. Huquqiy seminarlar. Qonunlar, huquq va majburiyatlar haqida ma’lumot berish, jinoyat sodir etishdan qanday saqlanish kerakligi to‘g‘risida seminarlar o‘tkazib turiladi. Yuridik yordam. Yoshlar o‘z huquqlarini bilishi, zarur bo‘lganda, yuridik maslahat olish imkoniyatiga ega bo‘lishlari kerak. Bu ularning muammolarini hal qilishda yordam beradi. Shu bois mahallada “Yuridik klinika” faoliyati yo‘lga qo‘yilgan. Bu muhim! Islombek Shamuratovning yoshlar bilan olib boradigan faoliyati mahalladagi ijtimoiy muhitni yaxshilashga yordam bermoqda. Yoshlar o‘rtasida jinoyatchilikning oldini olish va huquqbuzarliklarni kamaytirishga qaratilgan harakatlar, ijtimoiy barqarorlikni ta’minlashda muhim rol o‘ynaydi. Bu tajriba boshqa yoshlar yetakchilari uchun namuna bo‘lishi va o‘z mahallalarida shu kabi o‘zgarishlar qilishga ilhom berishi mumkin.  

3.10.2024 3717

Yetakchining yutuqli yili

Yoshlar yetakchisi faoliyati haqida gap ketganda ko‘pincha mahalla yoshlari erishgan yutuqlar haqida gapiramiz. Bu yutuqlarda, iste’dodlar yuzaga chiqishida yetakchilar xizmati katta, albatta. Shuni ham aytib o‘tish kerakki, yoshlar yetakchilari ichida o‘z iste’dodi bilan yutuqlarga erishayotganlar ham talaygina. So‘zimizning isboti sifatida Andijon viloyati Baliqchi tumani “Chinobod” mahallasi yoshlar yetakchisi Jo‘rabek Latipovni keltirsak bo‘ladi. An’anaga sodiq qolgan holda avval yetakchining mahalladagi faoliyati haqida so‘z yuritsak-da, so‘ngra Jo‘rabekning o‘ziga o‘tsak. Yetakchi faoliyat boshlaganidan buyon yoshlarning bo‘sh vaqtini mazmunli tashkil qilish, qiziqishlarini inobatga olib musobaqa va tanlovlarda ishtirokini ta’minlash, iste’dodlarini namoyish etishlari uchun ko‘maklashishni asosiy vazifasi hisoblab, harakat qiladi. Joriy yil yoshlar yetakchisi tashabbusi bilan “Yoshlar daftari” jamg‘armasi hisobidan mahalla yoshlaridan 3 nafarining davolanish va 7 nafarining haydovchilik kursida o‘qish xarajatlari qoplab berildi, 12 nafariga to‘lov-kontrakt summasi, 3 nafarining xorijiy tillarga o‘qitish puli to‘lab berildi. 4 nafarining fuqarolik pasporti olish badali qoplandi. Yoshlarning bo‘sh vaqtini mazmunli tashkil qilishda “Besh tashabbus olimpiadasi” doirasidagi musobaqa va tanlovlar alohida o‘rin tutadi. Jumladan, stol tennisi musobaqasining Baliqchi tuman bosqichida chinobodlik Ahmadullo Anvarov 2-o‘rinni qo‘lga kiritdi. “Yoshlar ovozi” ko‘rik-tanlovining estrada yo‘nalishida Bekmirzo Rasulov tuman bosqichida 1-o‘rinni egalladi. Kibersport musobaqasida Ahrorbek Hakimov hududiy bosqich g‘olibiga aylandi. “Zakovat” intellektual o‘yinlari tuman bosqichida esa “Chinobod” mahallasining “Iftixor” jamoasi 2-o‘rinni band etdi. Andijon viloyati Ichki ishlar boshqarmasi kubogi uchun o‘tkazilgan “Zakovat” intellektual o‘yinlarida “Chinobod”ning “Diamond” jamoasi 3-o‘rin, “Intellekt” jamoasi esa 1-o‘rin bilan viloyat bosqichiga yo‘llanma oldi. Joriy yil nafaqat yoshlarning iste’dodini yuzaga chiqarish, balki yetakchining o‘zi uchun ham iqtidorini namoyon qilishda yutuqlar yili bo‘ldi. Jo‘rabek Latipov Andijon viloyati hokimligi va qator tashkilotlar hamkorligida mustaqilligimizning 33 yilligiga bag‘ishlab tashkil etilgan “Iftixorimsan Vatan” onlayn tanlovida “Eng yaxshi she’r” yo‘nalishida 2859 ta ovoz to‘plab g‘oliblikni qo‘lga kiritdi. Respublika Ma’naviyat va ma’rifat markazining ma’naviy-ma’rifiy sohada faoliyat yuritayotgan yoshlarning yetakchilik, tashabbuskorlik, ijodkorlik qobiliyatini ochib berish, salohiyatini yuksaltirish, bilim va ko‘nikmalarini ommalashtirish hamda ularning mehnatini munosib rag‘batlantirishga qaratilgan “Eng yosh ma’naviyatchi – 2024” respublika ko‘rik-tanlovining viloyat bosqichida 2-o‘rinni egalladi.Yoshlarni qo‘llab-quvvatlash va mahalla iste’dodini yuzaga chiqarish maqsadida o‘tkazib kelinayotgan “Besh tashabbus olimpiadasi” doirasidagi “Mushoira” tanlovining viloyat bosqichida 1-o‘rin sohibi bo‘ldi. – Yoshlar bilan ishlash menga zavq bag‘ishlaydi, – deydi “Chinobod” mahallasi yoshlar yetakchisi Jo‘rabek Latipov. – Ayniqsa, biror yosh qiziqishi, qobiliyati sabab muvaffaqiyatga erishsa, juda ham quvonaman. Yoshlarga bu imkoniyatni tanlovlar, musobaqalar beryapti. Mahallamdagi har bir yoshda o‘ziga xos qobiliyat bor. Bu yutuqlarimiz ro‘yxati hali ancha kengayadi, o‘z ustimizda ishlab, rivojlanib kelgusida yanada yuqoriroq natijalarga erishishni ko‘zlaganmiz.

23.9.2024 4124

“Top 100”: Kitobxon yetakchi

Yurtimizning turli hududlarida samarali faoliyat ko‘rsatayotgan yoshlar yetakchilari hayoti ko‘plab jamiyat aʼzolariga namuna bo‘lmoqda. Yoshlar ishlari agentligi tomonidan “Top 100” yoshlar yetakchisi safida e’tirof etilgan Mohinur Boboqulova ana shunday yoshlardan biri. Mohinur Boboqulova – Shahrisabz shahridagi “Zargarlik” mahallasi yoshlar yetakchisi. Uning yetakchilik qobiliyati birinchi navbatda mahalladagi yoshlar o‘rtasida xatlov o‘tkazish bilan namoyon bo‘ldi. Yoshlar soni, ularning ehtiyojlari va qiziqishlarini aniqlash maqsadida u qator ishlar olib bordi. Bu tashabbus orqali yetakchi nafaqat yoshlarga xizmat ko‘rsatish sifatini oshirdi, balki ularning orasida ijtimoiy faoliyatga qiziqishni ham kuchaytirdi. Ko‘p yo‘nalishlarda yoshlarga shaxsiy namuna bo‘la oldi. “Zargarlik” mahallasi balansi Aholi soni:  4268 nafar; Xonadonlar: 1059 ta; Yoshlar soni: 752 nafar; Ayol-qizlar: 377 nafar; “Yashil” toifa: 719 nafar; “Sariq” toifa: 33 nafar; “Qizil” toifa: 10 nafar. Mahalla yettiligi ko‘makchi Har bir mahallada yoshlarning turli toifalari mavjud: baʼzilari ilm-fanga, sportga qiziqadi, ammo ayrimlarida og‘ir xulq, huquqbuzarlik sodir etishga moyillik ham kuzatiladi. Bunday vaziyatda yoshlar yetakchisining roli yanada muhim. “Zargarlik” mahallasi yoshlar yetakchisi shunday masʼuliyatni o‘z zimmasiga olgan va bu yo‘nalishda o‘ziga xos tizimni ishlab chiqqan. – Faoliyatimdagi asosiy urg‘uni ahvoli og‘ir va huquqbuzarlikka moyil yoshlar bilan ishlashga qaratganman, – deydi Mohinur Boboqulova. – Bunday yoshlar bilan ishlash oson bo‘lmagan. Bu yo‘lda profilaktika inspektori va mahalla yettiligining boshqa vakillari menga ko‘mak bermoqda. Hammamiz birgalikda, hamfikrlikda ishlasak, natija ham shunga monand bo‘ladi. Ortda qolgan davr mobaynida mahallamizda jinoyat sodir etilmadi. “Zargarlik” mahallasini viloyatda jinoyatdan xoli hudud sifatida e’tirof etishadi. Oddiy, lekin samarali Yoshlar yetakchisining ish uslubi oddiy, lekin samarali. Birinchi navbatda, yetakchi huquqbuzarlikka moyil yoshlarni aniqlash uchun ularning oilaviy va ijtimoiy sharoitini chuqur o‘rgandi. Bu bilan u yoshlardagi muammolarning kelib chiqish sabablarini aniqlashga muvaffaq bo‘ldi. Keyinchalik bu yoshlarga alohida eʼtibor qaratilib, ularning qiziqishi, iqtidori, vaqt o‘tkazish odatlari va ko‘nikmalariga qarab, maqsadli dasturlarni ishlab chiqdi. Bu dasturlar yoshlarning qiziqishi va ehtiyojlarini inobatga olgan holda tuzilgan bo‘lib, ularga mos yo‘nalishlarda rivojlanish imkoniyatini taqdim etadi. Masalan, kimdir sportga qiziqsa, u sport to‘garaklariga jalb qilinadi, ijodkorlikka iqtidorlilar sanʼat va madaniyat tadbirlarida ishtirok etadi. Buning natijasida yoshlar o‘zidagi salohiyatni to‘g‘ri yo‘naltirish imkoniyatiga ega bo‘ladi. Asosiy vazifalaridan kelib chiqib, iqtidorli yoshlarni izlab topish, iste’dodini ro‘yobga chiqarish borasida ko‘plab yoshlar aniqlandi. Ulardan biri – tadbirkorlikka qiziqishi bor Ruxshonaxon Rahmonova usta-hunarmandlarga biriktirilgan edi. Hozir u 100 dan ziyod aholini ish bilan ta’minlagan. Individual yondashuv Bu tizimning asosiy elementi individual yondashuvdir. Yetakchi har bir yosh bilan alohida suhbat o‘tkazib, ularga ishonch va eʼtibor ko‘rsatdi. Yoshlarga nafaqat saboq berish, balki ularning ichki dunyosini tushunishga, ularga maʼnaviy va psixologik yordam berishga intildi. Shuningdek, ular uchun sport va ijodiy to‘garaklar tashkil etildi, jamoaviy tadbirlarda faol ishtirok qilish imkoniyati yaratildi. “Og‘ir” toifadagi yoshlarga Shahrisabz shahar Ijtimoiy himoya milliy agentligi rahbari Nodir Daminov biriktilgan bo‘lib, reja asosida ish olib borilmoqda. Hozirgi kunga qadar bu yoshlardan 4 nafarining muammolari hal etilib, “og‘ir” toifa ro‘yxatidan chiqarildi. Mahallada jinoyatchilikning oldini olish maqsadida profilaktika inspektori bilan hamkorlikda ish olib borilib, yoshlar o‘rtasida “Qalqon” guruhlari tashkil qilindi. Bu guruh yordamida ko‘chalarda tungi reyd tadbirlari o‘tkazilmoqda. Yoshlar giyohvandlik, psixotrop moddalar, yot g‘oyalar ta’siriga tushib qolmasligi uchun tushuntirishlar olib borilmoqda. Probatsiya nazoratida turgan bir nafar yosh bilan o‘tkazilgan suhbatda uning futbolga qiziqishi aniqlandi va unga futbol to‘garagi ochish uchun ko‘mak berildi. Hozir u 30 dan ziyod yoshlarga murabbiylik qilib kelyapti. Bu tizim qisqa vaqt ichida ijobiy natija bera boshladi: huquqbuzarlikka moyil yoshlarning ko‘pchiligi o‘z salbiy odatlaridan voz kechib, jamiyatda faollasha boshladi. Yoshlar yetakchisi tomonidan ishlab chiqilgan ushbu yondashuv boshqa mahallalardagi yoshlar bilan ishlashda ham yaxshi namuna bo‘lmoqda. “Yoshlar ombori” Yoshlarning bo‘sh vaqtini mazmunli tashkil etishga qaratilgan “Yoshlar ombori” ko‘rsatkichlarida jami qamrab olinishi kerak bo‘lgan 628 nafar yosh “Besh tashabbus olimpiadasi”da ishtirok etish istagini bildirib, ro‘yxatdan o‘tgan. Yoshlar o‘z yo‘nalishlarida faol ishtirok etib, hududiy bosqichlarda munosib o‘rinlarni band etishgan. “Yoshlar ombori”ga ko‘ra, jami qamrab olinishi kerak bo‘lgan 31 nafar yoshning bandligini ta’minlash, “sariq” va “qizil” toifadagilarni “yashil” toifaga o‘tkazish bo‘yicha hokim yordamchisi bilan hamkorlikda imtiyozli kredit ajratish, ishga joylashtirish hamda subsidiya ajratish choralari ko‘rilmoqda. Shu choqqacha tadbirkorlikka qiziqishi bor ishsiz yoshlardan 5 nafariga imtiyozli kreditlar olib berilib, bandligi ta’minlandi. Ustoz-shogird an’anasiga asosan 10 nafar yoshni ish bilan ta’minlashga erishildi. 4 nafar yosh tadbirkorga jami 420 million so‘mlik imtiyozli kredit olib berilib, asalarichilik, yemni qayta ishlash, mebel ishlab chiqarish, qandolatchilik faoliyatini kengaytirishga yo‘naltirildi. 65 nafar yosh turli ko‘rinishdagi ish bilan band qilindi. – “Zargarlik” mahallasida jami 19 nafar yosh ishlash va o‘qish uchun xorijiy davlatlarga ketgan, – deydi Mohinur Boboqulova. – Mahalla profilaktika inspektori bilan hamkorlikda migratsiyada yurgan yoshlar va ularning oila a’zolari bilan muntazam ravishda muloqotlar uyushtirilib, video aloqa, telegram orqali ularning ish joyi, yashash sharoiti bilan tanishish, muammolarini aniqlash, Vatanga qaytishi uchun yoshlarga yaratilayotgan imkoniyatlardan foydalanishlari mumkinligi  to‘g‘risida  tushuntirishlar berilishi yo‘lga qo‘yilgan. Migratsiyadagi yoshlardan 5 nafari Vatanga qaytib, 1 nafari xususiy sektorda, 3 nafari esa norasmiy sektorda faoliyat yuritmoqda. 1 nafari kasb-hunar o‘rganishga yo‘naltirilgan. Kitobxonlik targ‘iboti Mohinur Boboqulova yoshlar orasida kitobxonlikni bir necha yo‘nalishda targʻib qilishga alohida e’tibor qaratgan. Shaxsiy namuna. Birinchi navbatda, yoshlar yetakchisi har oyda kamida bitta kitob o‘qib, bu haqda mahalla yoshlariga tavsiyalar beradi, o‘qigan kitoblari yuzasidan o‘z fikrlari bilan bo‘lishadi. Yetakchi tanlagan kitoblar faqat adabiy asarlar emas, balki ilmiy, falsafiy va motivatsion asarlar ham bo‘lib, yoshlarni har tomonlama rivojlanishga ruhlantiradi. Kitobxonlik kechalari va davra suhbatlari. Mohinur Boboqulova muntazam ravishda yoshlar uchun kitobxonlik kechalari va davra suhbatlarini tashkil qiladi. Bu tadbirlarda yoshlar o‘z o‘qigan kitoblari haqida gapirib berishadi, ularda ko‘tarilgan mavzularni muhokama qilishadi. Ushbu suhbatlar orqali nafaqat kitob o‘qish targ‘ib qilinadi, balki fikr almashish, erkin muloqot va o‘z fikrini aniq ifodalash kabi ko‘nikmalar ham shakllanadi. Kitobga qiziqishni oshirish. “Bir oyda eng ko‘p kitob o‘qigan yosh” kabi musobaqalar tashkil etiladi. G‘oliblar rag‘batlantiruvchi sovg‘alar bilan taqdirlanadi. Shuningdek, mahallaga kitoblar sovg‘a qilinib, maxsus burchaklar tashkil etildi, bu joylarda yoshlar xohlagan vaqtida kitob o‘qish imkoniyatiga ega bo‘ladi. Mahallada kutubxona tashkil qilish tashabbusi. Yetakchining tashabbusi bilan mahallada mini stadion va suv havzasi majmuasi qurib, foydalanishga topshirilgan bo‘lsa, navbatdagi reja kichik kutubxona tashkil etish. Mahallaga sovg‘a qilinayotgan kitoblar kutubxona fondiga kiritiladi. Kutubxonada turli mavzulardagi kitoblar jamlanib, yoshlarning bilim olish istaklarini to‘liq qondirishga mo‘ljallangan. Natija va ta’sir. Yoshlar orasida kitob o‘qishga qiziqish sezilarli darajada ortib, o‘zlarini intellektual jihatdan rivojlantirishga ehtiyoj kuchaymoqda. Kitobxonlik nafaqat bilim olish manbayi, balki yoshlar orasida ijtimoiy faollik va muloqot vositasi sifatida ham qabul qilinmoqda. 200 dan ortiq yosh chet tilini o‘rganyapti Yetakchi sport sohasida ham yoshlarga shaxsiy namuna ko‘rsatib, kurash musoboqalarida faol ishtiok etib kelgan, tuman, shahar va viloyat bosqichlarda faxrli o‘rinlarni qo‘lga kiritgan. U til o‘rganish va “Ibrat farzandlari” loyihasi targ‘ibotida ham faol. – Yoshlar ishlari agentligining “Ibrat farzandlari” loyihasi doirasida rus tilini o‘rganishga qiziqib, kurslarda faol ishtirok etdim, – deydi yoshlar yetakchisi Mohinur Boboqulova. – Kurslarni muvaffaqiyatli o‘zlashtirib, sertifikatga ega bo‘ldim. Bu loyiha menga nafaqat til bilimini oshirish, balki o‘z maqsadlarimga erishish yo‘lida sabr-toqatli bo‘lishni o‘rgatdi. O‘zim olgan bilimlarni va loyiha imkoniyatlarini mahalla yoshlari bilan bo‘lishishga qaror qildim. Hozir mahallamizda 200 dan ziyod yoshlarimiz “Ibrat farzandlari”da til o‘rganishga qiziqish bildirdi. Ularning 4 nafari allaqachon kurslarni muvaffaqiyatli tugatib, sertifikatni ham qo‘lga kiritdi.

30.8.2024 4460

TERMIZNING LAYLOSI – YETAKCHILAR A’LOSI

Yoshlar ishlari agentligi an’anaga muvofiq, yilning II choragida ham mahallalarda yoshlar siyosatini muvaffaqiyatli amalga oshirishda alohida natijalarga erishgan TOP-100 yoshlar yetakchilari reytingi e’lon qildi. Yoshlar yetakchilari mahalladagi yoshlarning haqiqiy yoʻlboshchisi. Ular yoshlarning intilishlari va maqsadlarini roʻyobga chiqarishda ulkan hissa qoʻshmoqda. Shunday faol yoshlar yetakchilari orasida Laylo Mengtoʻrayeva ham bor. Laylo Mengtoʻrayeva – Surxondaryo viloyati Termiz shahridagi “Bogʻzor” mahallasi yoshlar yetakchisi. Prezident huzuridagi Davlat boshqaruv akademiyasining Davlat fuqarolik xizmatchilari uchun tashkil etilgan malaka oshirish kursini tamomlagan. Turkiya davlatida boʻlib oʻtgan “Istanbul – Turkiy dunyo yoshlar poytaxti” forumi ishtirokchisi. “Yilning eng namunali yoshlar yetakchisi” tanlovining “Yoshlarning boʻsh vaqtini samarali tashkil etgan eng namunali mahalla yoshlar yetakchisi” yoʻnalishi gʻolibi. Zaxira kadrlar roʻyxatiga kiritilgan. “Bogʻzor” mahallasi balansi: Aholi soni: 6 478 nafar; Yoshlar: 1527 nafar; Ayol-qizlar: 779 nafar “Yashil” toifa: 1195 nafar; “Sariq” toifa: 332 nafar; “Qizil” toifa: 7 nafar; Baxtiyor yoshlar diyori   – Kundalik hayotimga razm solib, omadli va baxtli qizman, deyman, – deydi Laylo Mengtoʻrayeva. – Bolalikdan qiziquvchan va intiluvchanligim tufayli biror bir maqsad sari intilarkanman ishim doimo oʻngidan kelaveradi. Buning zamirida yurtimizda yoshlarga koʻrsatilayotgan mehr va e’tibor, ragʻbat va koʻmak mujassam ekanligini his etaman. Ishonch va e’tibordan motivatsiya olayotgan Laylo kasbiga fidoyilik koʻrsatib, oʻz ishiga mehr bilan yondashadi. Bolalikdan shu mahallada katta boʻlgan qahramonimiz yetakchilikka kelishidan avval ham mahalladagi jarayonlar, muammo va kamchiliklardan xabardor edi. Yoshlar yetakchisi lavozimiga tayinlanishi esa muammolarga yechim berishning ayni fursatiga aylandi. Dastlab faoliyat boshlaganda yoshlar yetakchisi uchun mahalla idorasida xona yetishmas, maktabning kichik bir xonasida ishlashga toʻgʻri kelgan. Yoshlar psixologga yoʻnaltirildi – Dastlab mahallada yoshlar uchun irfratuzilma yoʻq edi, – deydi yoshlar yetakchisi. – Migratsiyadagi yoshlar bilan hech kim shugʻullanmasdi. Faoliyatimning ilk kunidan xorijga ishlash va oʻqish uchun ketgan yoshlar bilan ishlashni boshlaganman. Migrant yoshlarni aniqlab, ularning har biri bilan gaplashib chiqqanman. Laylo Mengtoʻrayeva migratsiyadagi yoshlarning har biri bilan individual tarzda ishladi. Har bir yigit-qiz bilan ularning hayotiy muammolari, qiyinchiliklari va kamchiliklari haqida ochiq muloqot qildi. Ularning muammolarini aniqlash va yechim topishga asosiy e’tiborini qaratdi. Bu yoshlar orasida ijtimoiy chetlashish, ishsizlik, ta’lim olish imkoniyatlarining yetishmasligi kabi muammolar koʻp edi. Muammolarni tahlil qilib, ularni Vatanga qaytarish va muammolarini hal etishda samarali chora-tadbirlarni amalga oshirdi. Laylo Mengtoʻrayevaning bu boradagi muvaffaqiyatlari nafaqat mahallasidagi yoshlar, balki butun jamiyat uchun katta ahamiyatga ega boʻldi. U yoshlar bilan ishlashda quyidagi yoʻnalishlarni belgilab oldi: Individual yondashuv va psixologik qoʻllab-quvvatlash. Laylo avvalo har bir yosh bilan individual suhbatlar oʻtkazdi. Bu suhbatlar davomida u ularning muammolari va tashvishlarini tingladi, psixologik qoʻllab-quvvatlashga muhtoj yoshlar roʻyxati shakllantirildi. Yoshlarning oʻziga ishonchini tiklash va ularni ijtimoiy hayotga qaytarish uchun psixologik maslahatlar berish maqsadida psixologga yoʻnaltirdi. Ish bilan ta’minlash va kasb-hunar oʻrgatish. Yoshlar yetakchisi migratsiyadagi yoshlarning ishsizlik muammosini hal qilish uchun ularni mahalliy korxona va tashkilotlar bilan bogʻladi. Ish qidirishdagi muammolarini hal qilish uchun ularga zarur hujjat va arizalar bilan yordam berdi. Shuningdek, oʻz hududidagi kasb-hunar oʻrgatish markazlari bilan hamkorlik qilib, Vatanga qaytgan yoshlarni kasb-hunarga oʻqishga yoʻnaltirdi. Bu orqali ularning boʻsh vaqtini mazmunli tashkil etish va egallagan kasb va hunari orqali mehnat bozorida raqobatbardosh boʻlishlariga koʻmaklashdi. Ta’lim olish imkoniyatlarini yaratish. Ta’lim olish imkoniyati kamligi muammosini hal qilishda Laylo mahalladagi ta’lim muassasalari va turli grant dasturlari bilan hamkorlik qildi. U yoshlarning ta’lim olish istaklarini ragʻbatlantirish uchun ularga til va zamonaviy kasblarni oʻrgatish maqsadida oʻquv kurslari va online platformalar bilan ta’minladi. Bunda u davlat va nodavlat tashkilotlarning ta’lim grantlari, stipendiya dasturlari va ta’lim platformalaridan yoshlarning samarali foydalanishiga yordam berdi. “Ibrat Academy” va “Ustoz AI” loyihalari targʻibotini kuchaytirdi. Turkiyaning Karabuk universitetida oʻqish uchun ketgan Mahina Hamidullayeva “Ibrat academy”dan til bilish sertifikatiga ega boʻldi. Yoshlar yetakchisi yoshlar orasida til oʻrganishda namuna koʻrsatib, “Ibrat Academy” darslarini muvaffaqiyatli tamomlab, til bilish sertifikatini qoʻlga kiritdi. Jamiyat hayotiga faol Laylo yoshlarning turli jamoat tadbirlari, sport musobaqalari, madaniy va ma’naviy tadbirlarda qatnashishini ta’minladi. Bu jarayonda u yoshlarni oʻz qiziqishiga mos klublar va toʻgaraklarga jalb etdi. Bu esa ularning ijtimoiy integratsiyasiga katta hissa qoʻshdi. Yoshlarning “Besh tashabbus olimpiadasi”da para shaxmat, gimnastrada, yengil atletika, strit vorkaut sport turlari boʻyicha faol ishtirokini ta’minladi. Natijada olimpiadada gʻoliblik qoʻlga kiritilgach, mahallada sport maydonchasi qurib foydalanishga topshirildi.   12 nafar dizayner kashf etildi – 25 yildan buyon shu mahallada yashayman, deyarli hamma yoshni tanirdim, – deydi Laylo Mengtoʻrayeva. – Shunday boʻlsa-da yoshlarni xatlovdan oʻtkazib, ularni toifalarga ajratib olganman. Yashash sharoiti, iqtidori, muammosi, muhitni yaqindan oʻrgandim. Yoshlarning talab va istaklaridan kelib chiqib Surxondaryoda ilk marotaba “Mahalla yoshlar kutubxonasi” barpo etdik. Yoshlarning iqtidor va salohiyatini ragʻbatlantirish maqsadida Surxondaryoda ilk marotaba 2 ming yoshlar qamrab olingan “Milliy va zamonaviy liboslar” shou dasturini tatbiq etib, 12 nafar yosh dizaynerni kashf qildim. Yosh dizaynerlar Gulzoda Abdunabiyeva, Aziza Hatamova va Shahzoda Beknazarova “Milliy va zamonaviy liboslar” koʻrgazmasini oʻtkazish boʻyicha oʻzlarining takliflari bilan murojaat qildi. Yoshlar bilan loyihani yanada kengaytirishga harakat qildik va dasturini ishlab chiqdik. “Hokim va yoshlar” uchrashuvida oʻz taklifimiz bilan ishtirok etdik. Taklifimiz hokim tomonidan ma’qullanib, qoʻllab-quvvatlandi. Yoshlar bilan ishlashda oʻziga xos yondashuv Laylo Mengtoʻrayeva haqiqiy lider yoshlardan. U “Yilning eng namunali mahalla yoshlar yetakchisi” tanlovida “Yoshlarning boʻsh vaqtini samarali tashkil etgan eng namunali yoshlar yetakchisi” yoʻnalishidagi gʻolibligi bilan tanilgan. “Bogʻzor” mahallasi yoshlar yetakchisi mahalla yoshlarining boʻsh vaqtini samarali tashkil etish uchun quyidagi tadbir va dasturlarni amalga oshirdi: Sogʻlom turmush tarzi. Mahalla yoshlarining sportga qiziqishini oshirish va sogʻlom turmush tarzini targʻib qilish maqsadida sport musobaqalari va toʻgaraklar faoliyati yoʻlga qoʻyilgan. Futbol, basketbol, voleybol kabi sport turlari boʻyicha turli musobaqa va toʻgaraklar tashkil etilib, mashgʻulotlarga tajribali murabbiylar jalb etilgan. Musobaqalarda qoʻshni mahalla yoshlarining ham ishtirok etishi qamrovning kengayayotganidan dalolatdir. Laylo Mengtoʻrayeva tashabbusi bilan homiylar yordamida mahalla hududida sport maydonchalari va fitnes markazlari qurish boshlab yuborilgan. Hozir mahallaning barcha qatlamini qamrab olish maqsadida yugurish va velosport klublarini ochilib, 7 yoshdan 70 yoshgacha aholi jalb qilingan. Madaniy va ijodiy tadbirlar. Yoshlar uchun rassomchilik, qoʻl san’ati, adabiyot va musiqa kabi ijodiy yoʻnalishlarda toʻgaraklar ochilgan. Toʻgaraklarda mashgʻulotlar oʻtkazgan yoshlar “Besh tashabbus olimpiadasi”ning “Yosh musavvir” yoʻnalishida muvaffaqiyatli odimlamoqda. Ta’limiy va rivojlantiruvchi loyihalar. “Bogʻzor” shahar hududida joylashgani uchun asosiy e’tibor xizmat koʻrsatish va ishlab chiqarishga qaratiladi. Laylo mahalladagi biznesga ishtiyoqi bor yoshlar uchun shaharning eng oldi tadbirkorlari bilan uchrashuvlar, zavod va korxonalarga sayohatlar tashkil etmoqda. Kitobxonlik muhitini oshirish uchun “Munozara” klubi faoliyati yoʻlga qoʻyilib, yoshlar oʻrtasida adabiy muhokamalar oʻtkazib kelinmoqda. Ijtimoiy yordam, ekologik tozalash tadbirlari kabi volontyorlik dasturlari ishlab chiqilgan. Koʻngillilar ishtirokida har hafta eko tadbirlar oʻtkaziladi. Bunday tadbirlar yosh liderlarni ko‘paytirishi va ularni ijtimoiy loyihalarda faol ishtirok etishga undashi shubhasiz. *** – Koʻpchilik mendan bunday ijobiy natijalarga qanday erishasiz, deb soʻrashadi, – deydi Laylo Mengtoʻrayeva. – Men yoshlar yetakchisini davlat va yoshlar oʻrtasidagi koʻprikka oʻxshataman. Shaxsan oʻzim shu iboraga sodiq qolgan holda, yoshlar hayotiga oid muhim huquqiy hujjatlarni, islohotlar mazmunini sodda va xalqchil tarzda targʻib qilishga astoydil intilaman. Qiladigan ishlarimiz bisyor, maqsadimiz yoshlarni rozi qilish, muammolarini bartaraf etish, tashabbuslarini qoʻllab-quvvatlash, davlat rahbarimiz ishonchini oqlash.

14.8.2024 4528

Mahallada “Hurmat kuni”

Bugungi kunda mahalladagi yoshlar yetakchilari chin ma’noda yoshlarning tayanchiga aylanib, mehnati, namunali faoliyati bilan barchaga o‘rnak bo‘lmoqda. Jahongir Ne’matov ham namuna qilib ko‘rsatiladigan yetakchilardan biri. Jahongir Ne’matov – 29 yoshda, Toshkent viloyati Bo‘stonliq tumani “Do‘stlik” mahallasi yoshlar yetakchisi. Ish faoliyatida sportning o‘rni alohida ahamiyat kasb etadi. Yoshlar yetakchisi sifatida ish boshlaganida birinchi qilgan ishi xatlov jarayonlari davomida yoshlarning sportga qiziqishini aniqlashdan iborat bo‘lgan. Jahongir sport insonni jismonan baquvvat, ruhan sog‘lom qilib tarbiyalashini mahalladoshlariga, tengdoshlariga singdira olgan. “Yilning eng namunali yoshlar yetakchisi” tanlovi “Xorijiy migratsiyadagi yoshlar bilan tizimli ishlagan eng namunali mahalla yoshlar yetakchisi” yo‘nalishida hududiy bosqich ishtirokchisi.   “Do‘stlik” mahallasi balansi: Aholi soni: 2 014 nafar; Xonadonlar: 1 069 ta; Yoshlar soni: 567 nafar; Ayol-qizlar: 270 nafar; “Yashil” toifa: 389 nafar; “Sariq” toifa: 177 nafar; “Qizil” toifa: 7 nafar. Yoshlar o‘zini “pulga urgan” – Bolalikdan sport bilan shug‘ullanganim uchun yetakchilik faoliyatimni mahalladagi yoshlarning qay darajada sportga qiziqishini aniqlashdan boshlaganman, – deydi yoshlar yetakchisi Jahongir Ne’matov. – Xatlov jarayonida yoshlardan sportga qiziqishi haqida so‘raganimda aksariyati salbiy javob berib, maqsadi pul topish ekanini bildirgan. Bizning hudud tog‘li, turistlar ko‘p keladigan joy bo‘lgani uchun yoshlarning ko‘pchiligi voyaga yetmasidanoq o‘zini “pulga urgandi”. O‘qishga bormay qo‘yganlar ham ko‘pchilikni tashkil etgan. Mahalla raisi, profilaktika inspektori bilan birgalikda shunday yoshlarning ota-onalari bilan suhbatlashdik, tushuntirish olib bordik. Mahalla hududida joylashgan 17-maktab sport zalida yoshlarning sport bilan shug‘ullanishi uchun sharoitlar qildik. Turli sport to‘garaklari, mashg‘ulotlar tashkil etib, yoshlarni jalb qila boshladik. Dastlab yoshlarni majburlab olib kelganmiz. Keyinchalik o‘z xohishi bilan kela boshladi.  Ilk ishga kelgan paytimda sportsevarlar deyarli yo‘q edi, hozir “Do‘stlik”ning 65-70 foiz aholisi bo‘sh vaqtini sport maydonida o‘tkazmoqda. Bu ishda yoshi katta insonlar, keksalar namuna bo‘lyapti. Jinoyatchilik 80 foizga kamaydi Yoshlarning bandligi ta’minlash va ularni foydali ishlar bilan band qilishni asosiy vazifasi deb bilgan qahramonimiz “qizil” toifadagi yoshlar bilan ham reja asosida ish olib borgan. 7 nafar o‘gir toifadagi yoshning har biri bilan nuroniylar, rahbarlar, psixolog, profilaktika inspektori va yoshlar yetakchisi birgalikda ishlab, yoshlarni “qizil”dan chiqarish ishlari olib borilmoqda. Mazkur ishlar natijasida “Do‘stlik” mahallasida jinoyatchilik o‘tgan yilgiga nisbatan 80 foizga kamaygan. Yoshlar va voyaga yetmaganlar o‘rtasida jinoyatchilik va huquqbuzarliklarning oldini olish maqsadida bir qator tadbirlar amalga oshirilmoqda. Jumladan, profilaktika inspektori bilan hamkorlikda “xavf” guruhiga kiruvchi yoshlar ro‘yxati shakllantirilgan. “Obod va xavfsiz mahalla” qo‘shma qarori asosida jinoyat sodir etishi yoki jinoyatdan jabr ko‘rish ehtimoli mavjud yoshlar bilan individual suhbat olib borilib, aniqlangan muammolar tizimli hal etilmoqda. Amalga oshirilgan ishlar natijasida o‘nga yaqin sodir etilishi mumkin bo‘lgan jinoyatlarning oldi olindi. Yoshlarni harbiy vatanparvarlik ruhida tarbiyalash maqsadida harbiy qismlar bilan hamkorlikda tadbirlar tashkillashtirilmoqda. 2023-yil mobaynida 15 ta harbiy vatanparvarlik tadbirlari tashkillashtirilib, 300 dan ortiq yosh qamrab olindi. Murojaatlar 2 turga ajratildi Jahongir Ne’matov xatlovni yakunlagach, aniqlangan muammo va murojaatlarni 2 turga ajratdi. Birinchisi – moddiy yordam orqali yordam ko‘rsatiladigan, ikkinchisi – kasb-hunar bilan ta’minlash yo‘nalishi. Ro‘yxat shakllantirilgach, kasb-hunar o‘rganish istagidagilar tumandagi monomarkazga o‘qishga yuborildi, ustoz-shogird tamoyili asosida usta hunarmandlarga ish o‘rganish uchun biriktirildi. Kredit va subsidiya olish istagidagi yoshlarga hokim yordamchisi bilan hamkorlikda subsidiyalar ajratildi, yoshlarning kontrakt puli, harbiy xizmat badal puli, haydovchilik guvohnomasi olish to‘lovlarining bir qismi to‘lab berildi. Yoshlar yetakchisi tomonidan 2022-yildan hozirgi kunga qadar 76 nafar yoshga 109 million so‘mlik yordam ko‘rsatildi. – 2 nafariga kredit olib berildi; – 13 nafariga ish qurollari uchun subsidiya ajratildi; – 14 nafarining kontrakti to‘landi; – 6 nafariga moddiy yordam berildi; – 1 nafar yoshning pasport olishiga ko‘maklashildi; – 3 nafari kasb-hunar va san’atga o‘qitildi; – 31 nafarining bandligi taminlandi. Anonim so‘rovnoma – Yoshlarning qiziqishi, iqtidori, kelgusidagi rejalaridan kelib chiqqan holda ish tutaman, – deydi yoshlar yetakchisi. – Ularni qiziqmagan sohasiga yo‘naltirib, hech qanday natijaga erishib bo‘lmaydi. Har oy yakunida yoshlar va mahalla aholisi o‘rtasida anonim so‘rovnomani yo‘lga qo‘yganman. Faoliyatimiz borasida o‘z fikrini bildira olmayotganlar uchun bu usul yaxshigina maydonga aylandi. So‘rovnoma natijalariga qarab yangiliklar ustida ishlaymiz, xato va kamchiliklarni to‘g‘rilaymiz. Birdamlik bor joyda o‘sish, rivojlanish bo‘ladi. “Do‘stlik” mahallasi yoshlari yetakchini qo‘llab-quvvatlab, unga yordam berib kelyapti. Mahalla yoshlari va yetakchi birgalikda tashabbus qilgan holda mahallaning ichki ko‘chalarining 2,5 kilometr qismi hashar yo‘li bilan ta’mirlandi. Haftaning har juma kuni mahallada “Hurmat kuni” sifatida e’lon qilingan. “Hurmat kuni” mahallaning ko‘ngilli yoshlari birlashib, nuroniylar va ehtiyojmand oilalar xolidan xabar olinadi. Ehtiyoji bor xonadonlarda hasharlar tashkil etiladi. Iste’dodlar mahallasi “Do‘stlik” mahallasi iste’dodlarga boy. Ular erishayotgan natijalarda ham bu yaqqol namoyon bo‘lmoqda. “Besh tashabbus olimpiadasi” 2023-yilgi mavsumida mahalla yoshlaridan 2 nafari “Milliy va zamonaviy cholg‘u ijrochiligi” yo‘nalishi bo‘yicha respublika bosqichida yuqori o‘rinni egalladi. “Kibersport”ning “CS:GO” yo‘nalishida olimpiadaning hududiy bosqichida faol ishtirok etdi.  2024-yil “Yoshlar ovozi – Bo‘zatov Fest” ko‘rik-tanlovida mahallaning 3 nafar vakili ikkinchi va uchinchi o‘rinni qo‘lga kiritdi. Jahongirning tengdoshlari orasida xorijiy tillarni o‘rganishga qiziqadiganlar ham talaygina. “Ibrat farzandlari” loyihasi orqali 159 nafar yosh xorjiy til bilish sertifikatini qo‘lga kiritgan. Bu natija orqali “Do‘stlik” mahallasi tumanda eng yuqori o‘rinda e’tirof etilmoqda. Bo‘stonliqda kitobxonlik muhiti “Do‘stlik”da 211 nafar yosh otaliqqa olingan bo‘lib, ular tuman adliya bo‘limi boshlig‘i o‘rinbosari Sardor Soyibjonovga biriktirilgan. Sardor Soyibjonov yoshlarning barchasi bilan individual uchrashib, ularning muammo va takliflari o‘rganib chiqildi. Aniqlangan muammolar “Yo‘l xaritasi”ga kiritilib, bosqichma-bosqich hal etilmoqda. – Yoshlar bandligini ta’minlash, ularni foydali mashg‘ulotlar bilan band qilish uchun mas’ul rahbarlar yordamini ayamaydi, – deydi yoshlar yetakchisi. – Hozir Bo‘stonliqda kitobxonlik muhiti hukm surmoqda. Tumanimiz hokimi Jo‘rabek Ahmedov tumandagi 59 ta mahalla yoshlari uchun mahalla idorasi binosidan kutubxonalar tashkil etib, zamonaviy kitoblar sovg‘a qildi. 16 mahalla yetakchisiga koordinator Jahongir Ne’matovning faolligini mas’ullar ham ta’kidlamoqda. – U iqtidori, tashabbuslari, mahallada yoshlar uchun amalga oshirayotgan ishlari bilan tumanimizning eng ilg‘or yetakchilaridan, – deydi yoshlar ishlari agentligi Bo‘stonliq tumani bo‘limi boshlig‘i Oqila Shokirova. – Hamkasblari orasida loyiha va tashabbuslarini targ‘ib qiladi, bilim va ko‘nikmalarini bo‘lishadi. Tumandagi 59 nafar yetakchi bilan birgalikda, hamfikr ishlashni yo‘lga qo‘ygan. Jahongir 4-sektorga qarashli 16 ta mahalla yoshlar yetakchisiga koordinator bo‘lib, yangi tashabbuslar ustida ishlaydi. Yoshlar ishlari agentligi tizimidagi loyihalar targ‘iboti va qayd etilayotgan natijalar borasida uning mahallasi eng yuqori natijani ko‘rsatib turibdi. Jahongirning armoni Jahongir Ne’matov bolalikdan futbol bilan shug‘ullangan. Ko‘plab musobaqalarda qatnashib, sovrinli o‘rinlarni egallagan. Xususan, 2012-yili Qozog‘istonda o‘tkazilgan xalqaro futbol musobaqasida 2-o‘rinni egallagan, 2013-yilda futzal bo‘yicha O‘zbekiston chempioni bo‘lgan. Futbolchining dushmani jarohat deyishadi. Qahramonimiz ham futbol olamida tarbiya topib endigina professional futbolchilik faoliyatini boshlash arafasida oyog‘idan jiddiy jarohat oladi. Natijada Jahongir futbol maydoniga boshqa qayta olmaydi. – Futbolchi bo‘la olmadim, yagona armonim shu, – deydi Jahongir Ne’matov. – Sportdan yetakchilikka kirib kelganim uchun faoliyatimda asosoiy urg‘uni sportga berganman. Oldimda maqsadlarim katta. “Do‘stlik” mahallasi futbol jamoasini DXX kubogida chempion qilishni asosiy vazifa qilib olganman. Yana bir maqsadim tumanimiz markazida futbol maktabi ochish. Bu uchun katta mehnat kerak. Biroq tinimsiz harakat orqali barchasiga erishish mumkinligiga ishonaman.  Hozir mahalla radiosini ishga tushirish jarayoni ketmoqda. Bundan ko‘zlangan maqsad, yoshlar uchun maktabda radio eshittirishlarni yo‘lga qo‘yish orqali yurtimizda yoshlar siyosati va yoshlarga yaratilayotgan imkoniyatlar, yangiliklar va tariximiz haqidagi ma’lumotlardan yoshlarni xabardor qilib borish.   Migratsiyadan qaytarilgan yoshlar Parvina Shosaidova 24 yoshda. 2022-yilda ishlash uchun Rossiyaga ketgan. U yerda do‘konda sotuvchi bo‘lib ishlagan. Migratsiyada 1 yil ishlab uyiga qaytgach, yoshlar yetakchisi yordamida mahallada joylashgan mehmonxonaning qabulxona bo‘limiga ishga joylashgan. Maftuna Qoraboyeva 30 yoshda. Oilasini boqish maqsadida Turkiya davlatiga ishlashga ketgan va u yerda enagalik bilan shug‘ullangan. Yoshlar yetakchisi bilan suhbatda qandolatchilikka uquvi borligini bildirgan. Yoshlar yetakchisi Maftunaga uyiga qaytishini, unga subsidiya asosida qandolatchilik uskunalari olib berishini ma’lum qilgan. Maftuna qaytgach, subsidiya asosida pishirish pechi va mikser olib berildi. Hozir singlisi bilan birgalikda qandolatchilik qilmoqda.  

26.7.2024 4691

Yetakchining oʻzi shaxsiy namuna

Farg‘onalik Hayitboy Hasanov Yoshlar kuni arafasida “Kelajak bunyodkori” medali bilan taqdirlandi. Hayitboy Hasanov –So‘x tumani “Sarikanda” mahallasi yoshlar yetakchisi. Asosan tojik va o‘zbek millatiga mansub aholi yashaydigan hudud yoshlarini nazorat qilish biroz qiyinchilik tug‘diradi. Eksklav hudud So‘x tumanida yoshlarni ijtimoiy-ma’naviy qo‘llab-quvvatlash, ularning o‘qishi uchun qulay sharoit yaratish maqsadida keng imkoniyatlar berilmoqda. Sarikandalik yoshlar esa berilgan imkoniyatlardan unumli foydalanib, o‘z iqtidorini namoyon etmoqda. Hayitboy 2022-yilda O‘zbekiston Kasaba uyushmalari federatsiyasi o‘tkazgan “Yilning eng yaxshi yetakchisi” ko‘rik-tanlovida 3-o‘rinni egallab, 20 million so‘m pul mukofoti bilan taqdirlangan.   “Sarikanda” mahallasi balansi: Aholi: 3 685 nafar; Xonadonlar: 701 ta; Yoshlar: 977 nafar; Ayol-qizlar: 441 nafar; “Yashil” toifa: 557 nafar; “Sariq” toifa: 420 nafar; “Qizil” toifa: 26 nafar; Mahalla drayveri: dehqonchilik va chorvachilik.   “Sarikanda” tajribasi Hayitboy Hasanov bolalikda jurnalistikaga qiziqqan. Yoshlar yetakchisi sifatida ish boshlaguncha bloger, turli OAVlarda jurnalist sifatida faoliyat yuritgan. Maktab kompyuter savodxonligi bo‘yicha bolalarga qo‘shimcha dars bergan. Hozir zamonaviy kasblardan SMM va mobilografiyani o‘rganmoqda. U bilan suhbatlashganimizda mahallada yoshlar yetakchisi sifatida ish boshlagan ilk kunlarini esladi: – Yoshlar yetakchisi sifatida ish boshlagan kunlarda har bir xonadonga kirib, “vizitkalar” tarqatib chiqqanman, – deb eslaydi Hayitboy Hasanov. – Ijtimoiy tarmoqda mahalla kanali va guruhini ochib, yoshlarni yig‘ganman. Chunki u paytda lavozim yangi tashkil etilgan, hech kim tushunchaga ega emas edi. Qisqa muddatda ushbu harakat ommalashdi. So‘x tumanini nazorat qilish va o‘rganish olib borayotgan Mudofaa vaziri mening mahallamga kelgan. Men yo‘lga qo‘ygan tizim vazirga ma’qul kelib, respublikadagi barcha mahalla yoshlar yetakchilariga “Sarikanda” tajribasini yo‘lga qo‘yish topshirig‘i berilgan. Yangi lavozimda yangi ish boshlagan bir chekka qishloq yoshi uchun bu katta muvaffaqiyat edi. Bu o‘zimga ishonch va motivatsiya bo‘lgan. Mahallamiz eksklav hududda joylashgani uchun ayrim imkoniyatlar cheklangan. Shunga qaramay, yoshlarining sharoitlarini yaxshilash, ular hech kimdan kam emasligini anglatishni maqsad qilib olganman.   “Obod va xavfsiz mahalla” Faoliyatining boshlanishida olingan motivatsiya Hayitboyni katta loyihalarga undadi. Yetakchi yoshlarning ijtimoiy-siyosiy faolligini oshirish, og‘ir turmush sharoitida yashab kelayotgan yoshlar hayotini o‘zgartirish maqsadida qator ishlarni amalga oshirmoqda.  Hayitboy mahalladagi yoshlarning bo‘sh vaqtini mazmunli tashkil etish hamda ular o‘rtasida jinoyatchilik va huquqbuzarlikning oldini olish maqsadida profilaktika inspektori bilan hamkorlikda muntazam profilaktik tadbirlar, tungi reydlar o‘tkazmoqda. “Obod va xavfsiz mahalla” tamoyili va harakatlar rejasi joriy qilinmoqda. Mahallada sport to‘garagi faoliyatini yo‘lga qo‘yilgan. Maktab sport zali yoshlar uchun futbol, basketbol, gimnastika, kurash, boks bilan shug‘ullanish imkoniyatlarini taqdim etyapti. Yoshlarda armiyamiz qudratiga ishonch, faxr va iftixor tuyg‘ularini shakllantirish, harbiy vatanparvarlik ruhida tarbiyalash maqsadida “Harbiy qismda bir kun” loyihasi yo‘lga qo‘yilib, har oy 20 nafarga yaqin ishsiz va uyushmagan yoshlar qamrab olinmoqda.   72 nafar yosh bepul o‘qimoqda Sarikanda iqtidorlarga boy. Mahalla yoshlari qo‘lga kiritayotgan natijalar buning yorqin namunasi. Mahallada “Besh tashabbus olimpiadasi” yuqori saviyada tashkil etib kelinmoqda. Hayitboy Hasanov tumandagi musobaqalarda ham bosh tashkilotchi va tashabbuskorlardan. Tumanning “Top 5” yetakchilari ro‘yxatini boshqarib turadi. 2023-yilda mini futbol bo‘yicha DXX kubogi va “Kasblar tanlovi”da mahalla yoshlari yuqori natijani qayd etdi. Olimpiadaning joriy mavsumida mini futbol musobaqasi hamda “Yosh musavvir” tanlovi viloyat bosqichiga tayyorgarlik ko‘rilmoqda. Hayitboy Hasanov tashabbusi bilan mahalla yoshlari uchun mahalla binosida kompyuter savodxonligi, ingliz tili, musavvirlik, matematika va media savodxonligi bo‘yicha bepul to‘garak tashkil etilgan. To‘garak mashg‘ulotlari uchun oliy ta’lim muassasalarida ta’lim olayotgan sarikandalik 72 nafar yosh jalb etilgan.   51 nafar yoshga ko‘mak berildi “Yoshlar daftari”ga kiritilgan 51 nafar yoshning muammolarini hal etish maqsadida manzilli ko‘mak ko‘rsatildi: – 14 nafar yoshga 10 yilga ijara asosida yer maydonlari ajratildi; – 3 nafari haydovchilik kursida o‘qitildi; – 5 nafariga asbob-uskuna va mehnat qurollari xaridi uchun subsidiya ajratildi; – 12 nafar talabaning kontrakti to‘lab berildi; – 1 nafariga zamonaviy kasblarda o‘qish uchun 6 oylik o‘quv kurs puli qoplandi; – 2 nafar yoshning safarbarlik chaqiruvi rezervi badal puli to‘lab berildi; – 2 nafar yoshga fuqarolik pasporti olib berildi; – 2 nafar yoshning davolanish xarajatlari qoplab berildi; – 10 nafar yoshning turli yo‘nalishlarda bandligi ta’minlandi.   “Xorijdagi mahalladoshlar” Bugungi kunda xorijda yashab, ma’lum yo‘nalishlarda natijalarga erishayotgan yoshlar safi ortib bormoqda. Yetakchi tashabbusi bilan bunday yoshlar tengdoshlariga o‘z hayot tajribalarini o‘rgatishi uchun “Xorijdagi mahalladoshlar” loyihasi orqali suhbatlar tashkil etilmoqda. Mahalladagi “og‘ir” toifadagi yoshlar mas’ullarga biriktirilgan bo‘lib, ular bilan o‘rganish ishlari olib borildi. Aniqlangan muammolarga yechim berilib, hayotda o‘z o‘rnini topishiga ko‘maklashilmoqda. Bibisoliha Safarboyeva – 22 yoshda, II guruh nogironi. U Farg‘ona viloyati prokuroriga biriktirilgan. O‘rganishlar davomida Bibisolihaning tikuvchilikka qiziqishi borligi va tikish ishlarini mustaqil qila olishi aniqlandi. Bandligini ta’minlash maqsadida tikuv mashinasi olib berildi. Shuningdek, 150 kg bug‘doy berilib, tibbiy ko‘rikdan o‘tkazildi. Jasurbek Janobiddinov – 22 yoshda. Farg‘ona viloyati hokimiga biriktirilgan. Bandligini ta’minlash maqsadida harbiy xizmatga borib kelganligini hisobga olib, FVB So‘x tumani bo‘limi 16-yong‘in-qutqaruv qismi qutqaruvchisi sifatida ishga joylashtirildi. Durdona Xudoynazarova – 19 yoshda. O‘rganishlar natijasida uni tikuvchilik yo‘nalishida qo‘shni ayolga shogird tushgani, tikuv mashinasiga ehtiyoji borligi aniqlandi. Hokim yordamchisi bilan hamkorlikda subsidiya asosida tikuv mashinasi olib berildi.   Muvaffaqiyatlarim kaliti otam va onam Hayitboy Hasanov yoshlar o‘rtasida kitobxonlikni targ‘ib qilish uchun “Bir oyda bir kitob” loyihasini ishlab chiqqan. Yetakchining o‘zi bu borada shaxsiy namuna ko‘rsatmoqda. Mahalla yoshlarining ilm olishida yanada qulaylik yaratish maqsadida “Ibrat Academy” va “Mutolaa” loyihalarining targ‘ibotini olib bordi. – Yetakchilik faoliyatimni boshlaganimda menga qarshi fikr bildirgan, uddalay olishimga ishonmaganlar topilgan, – deydi Hayitboy Hasanov. – Biroq intilishdan to‘xtamadim. Ota-onamning “hech qanday gaplarga parvo qilma, biz senga ishonamiz” degani menga kuch bergan. To‘g‘ri yo‘lda ekanligimni, halol va pok, vijdonan mehnat qilsam, albatta, bu natija berishiga ishonardim. Hozir xalqimning, mahallamning e’tirofiga erishmoqdaman. Boshlanishida menga ishonch bildirmaganlar bugun mendan yordam so‘rab keladi, o‘rganadi.    

17.7.2024 3763

Agentlik loyihalariga qiziqish juda katta

Faxriddin Isayev – 2023-yilda Jizzax davlat pedagogika unversitetining xorijiy tillar fakultetini tamomlagan. O‘qish davomida fakultetda yoshlar yetakchisi bo‘lib ishlagan. Boshqa hududdan farzandi va oilasi bilan shu mahallaga ko‘chib kelgan. Yetakchining maqsadi shaxsiy rivojlanish, xorijiy tillarni o‘rganish, kitob mutolaa qilish va bu orqali yoshlarga shaxsiy namuna bo‘lish. Yoshlarni doimiy ravishda til o‘rganishga da’vat etadi. Qo‘limdan kelgan yordamni boshqalardan ayamaydi. Jizzax viloyatining Qozog‘iston bilan chegaradosh tumanlaridan biri Mirzacho‘lning olis mahallalarida yoshlar masalasi bugungi kunda har qachongidan dozarb ahamiyat kasb etmoqda. Tumanning “Do‘stlik” mahallasi yoshlari o‘zgarishlardan mamnun. Boshqa mahalladan kelib, yoshlar yetakchisi sifatida ishlayotgan Faxriddin Isayev mahalla yoshlarining hayotda o‘z o‘rinini topishiga ko‘maklashmoqda. Faxriddinning reja va maqsadlari haqida suhbatlashdik. – Ishga kirganimga 1 yil bo‘ldi. Mahallamizda aholi soni 4410 nafar, xonadonlar 1037 ta, yoshlar 1035 nafarni tashkil qilishi, mening ilk o‘rgangan raqamlarim bo‘ldi, – deydi turli millat va elat vakillari istiqomat qiladigan “Do‘stlik” mahallasi yoshlar yetakchisi Faxriddin Isayev. – Ishimni taqdiri mahalla bilan bog‘liq 1035 nafar yosh ayni kunda nima bilan band ekanini o‘rganib chiqishdan, oldimga qo‘yadigan vazifalarimni belgilab olishdan boshladim.  Shu paytga qadar, Vazirlar Mahkamasining 312-sonli qaroriga asosan, 70 dan ortiq yoshni ish bilan ta’minlash, kasb-hunarga o‘qitish, davolanish, to‘lov kontrakt, bir martalik moddiy yordam, fuqorolik pasporti olish va boshqa turdagi yordamlar uchun 82 million 770 ming so‘m yo‘naltirildi. 30 nafar yoshga (6 nafari migratsiyadan qaytgan) yer ajratildi. Xorijiy tillar va kasb-hunarga o‘qitish maqsadida mahalladagi 1230  nafar yosh “Ibrat farzandlari” loyihasida til o‘rganmoqda va ularning 846 nafari til bilish setifikatlarini qo‘lga kiritdi. Yoshlar ishlari agentligining loyihalariga yoshlarimizda qiziqish juda katta, bu borada viloyatda birinchilikni qo‘ldan bermay kelyapmiz. Mahallada 100 nafar yosh ishtirokida “Ibrat marafoni” tashkil etildi va 5 nafar g‘olibga xorijiy til imtihon xarajatlari qoplab berilmoqda. 650 nafar yosh “Uzchess” ilovasidan foydalanadi. “Mutolaa”, “Ustoz AI” loyihalarida ham yoshlarimiz juda faol. Yil davomida mahalladagi  namuna ko‘rsatgan yoshlarning 150 nafari uchun Yoshlar ishlari agentligi viloyat boshqarmasi, tuman bo‘limlari va homiylar tomonidan Samarqand shahriga sayohat uyushtirdik. “Ibrat farzandlari” loyihasi doirasida viloyatda birinchi o‘rinni qo‘lga kiritganimiz uchun Toshkent viloyati Bo‘stonliq tumani “Yoshlar oromgohi”da “Ibrat camp” loyihasi doirasida bir haftalik tadbirlarda ishtirok etib, sertifikatlarni qo‘lga kiritdik. Mahalla yoshlarining 492 nafari tuman adliya bo‘limiga otaliqqa biriktirilgan. Davlat tashkilotlari biz bilan doimiy hamkorlik qiladi. Jinoyatchilikning oldini olish maqsadida bir qancha ishlar olib borilmoqda. Mahallam yoshlaridan biri Xurshid Mirzayev  yaqinda jazoni ijro etish muassasidan ozod etildi. Unga hokim yordamchisi ko‘magi bilan 33 million so‘mlik kredit olib berildi. Bu pullarga mebel sexi ochishga ko‘maklashildi. Xurshid hozir uy ro‘zg‘or, oshxona  mebellari ishlab chiqaryapti. 10 nafarga yaqin yoshlar o‘z biznesiga ega – kulolchilik, go‘zallik saloni, sartaroshxona, ishlab chiqarish sexlari ochib, o‘zi va boshqa yoshlarni ish bilan band qildi. Kulol yosh Diyorbek respublika miqyosidagi ko‘rgazmalarda ishtirok etmoqda. Faoliyat boshlaganimda Diyorbek maktab bitiruvchisi edi. Mahalladagi hokim yordamchisi ko‘magida Farg‘ona viloyatida o‘qitib, o‘z ishini boshlashga ko‘maklashdik va natijada mahallada yangi hunarmandchilik maskani tashkil etildi. Qisqa muddatda xorijiy tillarni o‘rganishni boshlagan yoshlar 846 ta til sertifikatiga ega bo‘ldi. Mahallamiz yoshlari “Besh tashabbus olimpiadasi”ning respublika bosqichida ishtirok etdi. Vaqtini bekorchi ishlarga sarflayotgan yoshlar bilan doimiy shug‘ullanishni oldimizga maqsad qilganmiz. Agar bir kunda bitta yoshning o‘zgarishiga erisha olsak, bu bir yilda 365 nafarni tashkil etadi. Bugunning yoshlari xorijiy tillarni, axborot texnologiyalari va zamonaviy kasblarni o‘rganishi maqsadga muvofiq deb o‘ylayman.  

4.7.2024 3786

Poliglot yetakchi

Mahalladagi yoshlar yetakchilari yoshlarni xorijiy tillarni mukammal egallashga, turli tanlov, tadbirkorlik va zamonaviy kasblarga jalb qilishda jonbozlik ko‘rsatmoqda. Shunday yetakchilardan biri Buxoro shahridagi Furqat mahallasi yoshlar yetakchisi Bobur Qudratov. Bobur Qudratov bugun o‘z mahallasidagi bilim olishga ishtiyoqi bo‘lmagan, xulq-atvorida kamchiliklari bo‘lgan, sho‘x, qiziqqon va agressiv fe’l-atvordagi yoshlarni to‘g‘ri yo‘lga boshlashga harakat qilib, ularni kitobxonlik, tadbirkorlik va biznesga, shuningdek, turli xil sport musoboqalariga, xorijiy tillarga qiziqtirishga bor kuch-g‘ayrati bilan intilib, kasbdoshlariga ibrat bo‘lib kelmoqda. Buxoro shahridagi “Furqat” mahallasida: Xonadonlar soni: 1017 ta;Aholi soni: 2758 nafar;Yoshlar soni: 624 nafar. Parviz endi to‘g‘ri yo‘lda Furqat mahallasida “og‘ir toifadagi” yoshlar ro‘yxati shakllantirilib, 14 nafar yosh rahbarlarga biriktirildi. Rahbarlar va yoshlar yetakchisi bu yoshlar bilan suhbatlar uyushtirib, ularni qiynayotgan muammolar haqida gaplashdi. Natijada yoshlar qiziqishiga ko‘ra mashg‘ulotlarga jalb etilib, bandligi ta’minlandi. Doimiy nazorat o‘rnatildi. Parviz Ashurov xulqi tufayli “qizil” toifaga kiritilgan edi. Yoshlar yetakchisi Parviz bilan suhbatlashib, tushuntirish ishlarini olib bordi. Hozir Parviz yaxshi tomonga o‘zgarib, jamoat ishlarida faol. Yoshlar yetakchisi uning holatini qiziqishlarini o‘rganib chiqib, sportga jalb qildi. Mahallalar o‘rtasida o‘tkazilgan shashka va armrestling musobaqalarida yaxshi natijalarni qo‘lga kiritdi. Oradan ko‘p vaqt o‘tmay Parviz Ashurov o‘z tengdoshlari bilan jamoa tuzib, futbol bo‘yicha DXX kubogi musobaqasida ham zafarli yurishni davom ettirmoqda. Parviz Ashurov o‘z oldiga tengdoshlari qatori zamonaviy kasb egasi bo‘lishni ham maqsad qilib qo‘ydi. Bobur Qudratov ko‘magida “Ibrat farzandlari” loyihasi orqali ingliz tilini o‘rgana boshladi. Yoshlar o‘z yurtida ishlayapti Nodirjon Nusratov va Nozimjon Mirzayev xorijga ishga ketgan edi. Yoshlar yetakchisi xatlov jarayonida bu yoshlar bilan ham bog‘landi. Ularning holatini, ish jarayonini o‘rgandi. Nodirjon va Nozimjon vatanga qaytgach, ularning qiziqishi va imkoniyatidan kelib chiqib ish va o‘qish bilan band qilindi. Nodirjon Nusratov shahar markazidagi restoranda oshpaz bo‘lib, xo‘randalarga Buxoroning mazali ovqatlarini tayyorlab bermoqda. Nozimjon Mirzayev esa Buxoro davlat universiteti talabasi. U o‘qishdan bo‘sh vaqtlarida firmada ham ish faoliyatini olib boradi. 25 nafar yosh til sertifikatiga ega Mahalla yoshlari “Besh tashabbus olimpiadasi”da ham munosib ishtirok etib kelmoqda. Olimpiada doirasida sportning voleybol va stritbol turi bo‘yicha ham qizlar, ham yigitlar jamoasi shahar bosqichiga yo‘llanmani qo‘lga kiritdi.Shuningdek, furqatlik yoshlar “Yoshlar va qonun” tanlovining tuman bosqichida g‘oliblikni qo‘lga kiritib, viloyat bosqichida ishtirok etishga tayyorlanmoqda. “Mutolaa”, “UzChess” va “Ibrat farzandlari” yoshlarning sevimli mashg‘ulotiga aylangan. 25 nafar yosh “Ibrat farzandlari” loyihasidan til bilish darajasi sertifikatini olishga muvaffaq bo‘ldi. Yoshlar til o‘rganishga qattiq bel bog‘lagan. Yoshlar yetakchisi Bobur Qudratov ham 4 ta tilda erkin muloqot qila oladi. Bobur Qudratov va Furqat mahallasi yoshlarining maqsadlari katta. Ular viloyatning eng faol yoshlari sifatida respublika musobaqalarida g‘oliblikni qo‘lga kiritmoqchi.

20.6.2024 3411

“Ma’rifat tajribasi” yoshlar bilan ishlash tajribasi sifatida ommalashtirilyapti

2024-yilning I choragida mahallada yoshlar bilan ishlashda yuqori natijalarga erishayotgan “TOP-100” yetakchi ro‘yxatidan Andijon viloyatidan 7 nafar yoshlar yetakchisi o‘rin olgan edi. Mehnatkashligi, yoshlar bilan ishlashdagi yangicha yondashuvi bilan ajralib turadigan Yunusbek Abdug‘afforov ulardan biri. Yunusbek Abdug‘afforov 26 yoshda. Andijon shahridagi “Ma’rifat” mahallasi yoshlar yetakchisi. “Yunusbekning liderlik qobiliyati bolalikdayoq namoyon bo‘lgan”, deydi uning birinchi ustozi Muhayyo Musayeva. Bolalikdagi iqtidor uni liderlikka yetaklagan. Maktabda sardorlik, keyin yoshlar yetakchisi. Mana endi Prezidentning ishonchli vakili – mahalladagi yoshlar yetakchisi. 2023-yilda Ichki ishlar vazirligining “Namunali mahalla huquq-tartibot maskani” respublika ko‘rik-tanlovida “Eng faol yoshlar yetakchisi” nominatsiyasi g‘olibi bo‘lgan. “Yilning eng namunali mahalla yoshlar yetakchisi” tanlovining respublika bosqichi ishtirokchisi. Yoshlar bilan tez til topishadi – Yunusbek shahardagi eng ilg‘or yoshlar yetakchilarimizdan, – deydi Yoshlar ishlari agentliging Andijon shahar bo‘limi boshlig‘i Kamronbek Rustambekov. – U shahrimizning “yuzi”. Yoshlar bandligini ta’minlash va bo‘sh vaqtini mazmunli tashkil etish borasidagi faoliyati “Ma’rifat tajribasi” sifatida viloyatimizdagi barcha mahallalarga tatbiq etilmoqda. Hududimizdagi yoshlar yetakchilarining o‘quv mashg‘ulotlarida Yunusbek amalga oshirayotgan ishlarini yoshlar yetakchilariga tushuntirib, mentorlik qilib kelmoqda. U yoshlar bilan tez til topisha oladi. Hozir mahallasida ishsiz yosh yo‘q, alohida e’tiborga muhtoj yoshlar bilan ishlashda yuqori KPI ko‘rsatkichiga ega.   “Ma’rifat” mahallasi balansi: Aholi soni: 7200 nafar; Xonadonlar: 1201 ta; Yoshlar soni: 1190 nafar; Ayol-qizlar: 605 nafar; “Yashil” toifa: 805 nafar; “Sariq” toifa: 335 nafar; “Qizil” toifa: 50 nafar.   177 yoshga 316 million so‘m – Xatlov jarayonlarida “qizil” toifaga olingan yoshlarni “yashil” toifaga olib o‘tish uchun “Yoshlar daftari” orqali 30 turdagi muammolar kaliti biz yoshlar yetakchilariga berildi hamda davlat idoralari rahbarlari bilan ishlashimizga imkoniyat yaratildi, – deydi yoshlar yetakchisi Yunusbek Abdug‘afforov. – Davlatning ko‘magiga muhtoj deb topilgan yoshlarning iqtisodiy va ijtimoiy muammolarini hal qilish, bandligini ta’minlash maqsadida Andijon mashinasozlik instituti rektori Umidjon Turdialiyevga biriktirildi. Og‘ir toifadagi yoshlar bilan ishlashda bu insonning mehnatlari katta. Har doim yoshlarning murojaatlariga “labbay” deb javob beradi. “Qizil” toifadagi yoshlarning muammolariga yechim topish, bandligini ta’minlash, iste’dod va iqtidorini qo‘llab-quvatlash maqsadida “Yo‘l xaritasi” shakllantirildi. “Yo‘l xaritasi” asosida 50 nafar yoshning 49 nafarida aniqlangan muammolarning barchasi ijobiy hal etildi. “Yoshlar daftari”ga kiritilgan jami 177 nafar yoshga turli ko‘rinishdagi yordamlar berilgan: – 2022-yil 44 nafar yoshga 96 million 500 ming so‘mlik; – 2023-yil 85 nafar yoshga 134 million 800 ming so‘mlik; – 2024-yil boshidan bugungi kungacha 49 nafar yoshga 85 million 100 ming so‘mlik.   Mahallada “ko‘chaboshi”lar – Mahalla shaharda joylashgani uchun yoshlarni nazorat qilish katta mas’uliyat yuklaydi, – deydi Yunusbek Abdug‘afforov. – O‘tgan yil davomida “Ma’rifat” mahallasida jinoyat sodir etilmagan. Yoshlar qachon jinoyat qiladi? Nazoratsiz, bekor qolsa, bandligi ta’minlanmasa. Har bir ko‘chada ko‘ngillilardan ko‘chaboshilar tayinlangan bo‘lib, ular kech soat 20:00 dan ertalab 6:00 gacha vaqt oralig‘ida o‘zining ko‘chasini nazorat qiladi. Men yetakchilik qilayotgan mahalla katta bo‘lgani uchun “ko‘chaboshi”larning yordami faoliyatimning asosiy tayanchi bo‘lib kelyapti. Ko‘chaboshilarning vazifasi faqat tungi nazoratchilik emas. Ular ko‘chalar o‘rtasida sog‘lom raqobatni ham yaratishi kerak. Mahallada yetakchi tashabbusi bilan ko‘chalararo turli tanlov va musobaqalar o‘tkaziladi. Ko‘chaboshilar o‘z ko‘chasidan jamoa shakllantirib, bellashuvlarda ko‘chasi sha’nini himoya qilishi kerak. Har oy yakunida ko‘chaboshilar ishi sarhisob qilinib, yaxshi natija ko‘rsatganlar homiylik mablag‘lari asosida rag‘batlantirib boriladi.   14 nafar yosh Vatanga qaytarildi Joriy yil boshida “Ma’rifat” mahallasidan migratsiyadagi yoshlar 28 nafar edi. Yoshlar yetakchisi sa’y-harakati bilan 14 nafari Vatanga qaytarilib, qiziqish va iqtidoriga mos ishga joylashtirildi, hunar o‘rganish istagida bo‘lganlar kasb-hunarga yo‘naltirildi. Hozir qolgan 14 nafar yoshni ham yurtiga qaytarish bo‘yicha harakatlar boshlangan. Yoshlar yetakchisi mahalla raisi bilan migratsiyadagi yoshlarning uyiga borib, ularning ota-onasiga farzandlarini ortga qaytarish yuzasidan tushuntirish ishlarini olib bormoqda, oilaviy ahvoli o‘rganilmoqda. – Migratsiyadan qaytgan yoshlar o‘rtasida “Ibrat Academy” hamda “Mutolaa” loyihasining targ‘ibotini o‘tkazdim va 14 nafar yoshning barchasi bu loyihalarga qamrab olindi, – deydi yoshlar yetakchisi. – Mahalla yoshlarining “Mutolaa” loyihasidagi qamrovi 120 nafarni, “Ibrat Academy” orqali til o‘rganayotganlar 134 nafarni, “Ustoz AI” ilovasi orqali zamonaviy kasblarga o‘qiyotganlar 12 nafarni atshkil etmoqda. Yil yakuniga qadar mahallamdagi yoshlarning barchasini kitobxonlikka, til va zamonaviy kasblarni o‘rganishga jalb qilishni maqsad qilganman.   Alohida e’tiborga muhtoj yoshlar bilan ishlashda erishilgan natijalar: Asadbek va Ahmadullo Muqumjonov joriy yil boshida migratsiyadan qaytarilgan. Aka-ukalarning mashina haydashga uquvi bor, lekin haydovchilik guvohnomasini olishmagan edi. Yoshlar yetakchisi ko‘magi bilan Asadbek va Ahmadulloga haydovchilik guvohnomasi olib berish uchun Andijon mashinasozlik instituti hisobidan pul ajratildi. Yoshlarning bandligini ta’minlash maqsadida “Uzautomotors” AJga ishga joylashtirildi. Ozodbek Qambaraliyev 30 yoshda, II guruh nogironi. Yashayotgan xonadoni ta’mirtalab ahvolda edi. Yoshlar yetakchisi tashabbusi bilan Andijon shahar “Sahovat va ko‘mak” jamg‘armasi hamkorligida uy-joy qurilish va ta’minlash ishlari uchun bir martalik moddiy yordam ajratildi. Mahallaning ko‘ngilli aholisi bilan Ozodbekning yashash joyi hashar yo‘li bilan ta’mirlandi. Tursunoy Rejaboyeva va Mubinaxon Ibroximova imkoniyati cheklangan yoshlardan. Yoshlar yetakchisi Yunusbek tomonidan “Yoshlar daftari”ga kiritilgan. Qizlarning tikuvchilikka uquvi borligi sababli ularga Andijon mashinasozlik instituti hisobidan tikuvchilik mashinasi olib berilgan. Nilufar Alisherova 25 yoshda, imkoniyati cheklangan yosh. Andijon davlat universiteti talabasi. Sog‘ligida muammolari borligi sababli yoshlar yetakchisi tomonidan davolanishi uchun homiylik mablag‘lari hisobidan 2 million 138 ming so‘mlik zarur dori-darmonlar olib berilgan. Kontrakt to‘lashda qiynalgani uchun 2 million 800 ming so‘m miqdoridagi summa universitet hisobiga o‘tkazildi.