29.11.2023 161

Jinoyat sodir etilmagan mahalla

Abubakir Ahrorjonov – Fargʻona viloyati Buvayda tumandagi “Bachqir” mahallasida yoshlar yetakchisi (2022-yildan). Qoʻqon davlat pedagogika institutining tarix oʻqitish metodikasi fakultetida tahsil olgan. Bungacha tumandagi 42-maktabda yoshlar yetakchisi bo‘lib, tuman yoshlar tashkilotida masʼul vazifalarda ishlagan. “Mening buyuk bobom” loyihasi, “Oʻzbekiston uchun 100 gʻoya” tanlovining viloyat bosqichi gʻolibi bo‘lgan. Oliy Majlis Qonunchilik palatasi huzuridagi Yoshlar parlamenti aʼzosi. “Oʻzbekiston Respublikasi mustaqilligining 30 yilligi” hamda “Yosh olim” koʻkrak nishonlari bilan taqdirlangan. U yetakchilik qilayotgan mahallada so‘nggi ikki yilda yoshlar oʻrtasida birorta ham jinoyat qayd etilmagan! Uning mahallada yoshlar bilan ishlash tajribasi tahsinga loqiy. “Bachqir”da 14-30 yoshdagi o‘g‘il-qizlar soni 918 nafarni tashkil etadi. 2022-2023-yillar davomida jami 110 nafar yosh “Yoshlar daftari”ga kiritilgan bo‘lsa, ayni paytda ularning bandligi to‘liq taʼminlangan, oʻz daromad manbayiga ega. Misol uchun 11 nafar ishsiz yoshga oʻzini oʻzi band qilishi uchun inkubator, noutbuk, tikuv mashinasi, kompressor va boshqa asbob-uskunalar, jihozlar olib berilgan. Hozir ular mehnati ortidan daromad topish bilan birga, shogirdlar ham tayyorlayapti.   Manzura Rahimova, mahalla yoshlaridan: – Ishsizlikdan qiynalib yurganimda mahallamiz yoshlar yetakchisi Abubakir Ahrorjonov tavsiyasi va maslahati bilan menga tikuv mashinasi berildi. Juda quvondim. Bolalar kiyim-kechaklari, oshxona jihozlari va shunga oʻxshash anjomlar tikyapman. Daromadimga yana bitta tikuv mashinasi sotib oldim. Qoʻshnimni shogirdlikka olganman. U ham ishli boʻldi va hozir chevarlikka qoʻli kelib, kiyimlar tikyapti. Berilgan yordamdan behad xursandman. Mahallada 3 nafar bemorning davolanishi uchun 35 million soʻm mablagʻ ajratildi. Jumagul Madaminova: – Uch nafar farzandimni bir oʻzim tarbiyalayapman. Qizim Mubinaxon Andijonda davolanib keldi. Davolanish xarajatlarimiz qoplab berilishi oilamizga katta iqtisodiy yordam boʻldi. Buning uchun davlatimiz rahbaridan, mahalla fuqarolar yigʻini faollaridan va yoshlar yetakchisidan minnatdorman. Yolgʻiz emasligimizni his etib, koʻnglimiz togʻdek koʻtarildi. Yetakchining tashabbusi bilan mahalladagi besh nafar yoshning oliy oʻquv yurtida tahsil olishi uchun shartnoma pulining 50 foizi toʻlib berildi. Iskandar Husainov, Shohista Rahimova, Sardor Sodiqov koʻrsatilgan moddiy yordamdan quvonib, mahallaning har qanday ogʻir-yengil yumushlariga shaymiz, deyishmoqda. Yoshlarni ish bilan taʼminlash, kasb-hunarli qilish davlatimiz siyosatining ustuvor yoʻnalishiga aylangan. “Bachqir”da 19 nafar yoshning oʻzini oʻzi band qilishi uchun ularga 30 yilga 15 sotixdan ekin maydoni ijaraga berildi. Yer egasiga aylangan Jahongir Mirzayev va Nurmuhammad Oʻljayev kartoshka, bugʻdoy va sabzi yetishtirganini, ikkinchi ekinga makkajoʻxori parvarishlab, yaxshi daromad olganini aytishdi. Umidjon Yoqubov, mahalla yoshlaridan: – Haydovchilik guvohnomasi olish uchun oʻqish xarajatlarimiz davlat tomonidan toʻlab berildi. Bundan tashqari, 3 nafar tengdoshim IT parkda kelajak kasblariga va xorijiy tillarga oʻqitildi. Yodgoroy Turgʻunova, Zahro Xursanova ayni paytda u yerda chet tilini oʻrganyapti. Maqsadimiz egallagan kasbimiz bilan vatanimiz taraqqiyotiga hissa qoʻshish. Shuningdek, mahalladagi 2 nafar yoshga homiylik asosida biometrik pasport olib berildi. Yoshlar yetakchisi doimiy ravishda nafaqat oʻzining mahallasi, balki boshqa mahalla yoshlariga ham oʻz hayot yoʻlini topishda koʻmaklashmoqda. Birgina misol “Hasanqoʻrgʻoncha” mahallasining Mixchagar qishlogʻida istiqomat qiluvchi Mamasoliyev Sanjarbek baxtsiz hodisa tufayli yura olmaydigan boʻlib qolgan edi. Sanjarbek bilan suhbatlashilganda uning qiziqishi IT sohasi ekanligini taʼkidlaydi. Sanjarbekning qiziqishidan kelib chiqib Abubakir Ahrorjonov tumandagi “Mursalina” oʻquv markazi rahbari Otabek Muhammadaliyev bilan suhbatlashib, IT sohasini bepul oʻrganishi uchun sharoit yaratib berilishiga erishdi. Oradan 7 oy oʻtib Sanjarbek kompyuter sohasini chuqur oʻrgangach, unga homiylik asosida noutbuk ham olib berildi. Hozir ushbu yoshning hayotga boʻlgan qiziqishi yanada ortgan, online ishlab, ro‘zg‘or tebratishda ota-onasiga yordam bermoqda. Oʻktamjon Qosimov, mahalla yoshlaridan: – Mahallamizda 3 ta “Qalqon” guruhi tuzilgan. Ularning har biriga 5-6 nafardan yigitlar aʼzo. Men shu guruhlardan biriga sardorman. Abubakir Ahrorjonovning tashkilotchiligi, tashabbusi bilan “Qalqon” guruhi sardorlarining safarbarlik chaqiruvi rezervi badali uchun shartnoma mablagʻi toʻlab berildi. Men singari Abrorjon Yoqubov, Arabjon Mamajonov kabi tengdosh sardorlarning har birimizga 6,5 million soʻmdan pul toʻlandi. “Bachqir” mahallasi drayveri hunarmandchilik va chorvachilikdir. Bitiruvchi yoshlardan 37 nafari ustoz-shogird anʼanasiga muvofiq, hunarmandlardan kasb oʻrganib, ish va daromad topmoqda. Mahallada sport, sanʼat, madaniyat, boks, kurash, qoʻl jangi, taekvando toʻgaraklari tashkil etilgan. Ularning har biriga 30-35 nafardan yosh jalb etilgan. Kechki payt soat 6 dan 11 gacha maktab sport zali, kompyuter xonasi va kutubxona eshiklari yoshlar uchun ochiq. Yoshar yetakchisi tashabbusi bilan mahalla fuqarolar yigʻini binosiga stol tennisi, shaxmat-shashka qoʻyilgan. 450 ta kitob fondiga ega “Mahalla yoshlar kutubxonasi” ochilgan. Mahalla yigit-qizlarining boʻsh vaqti yoʻq. Ularni foydali mashgʻulotlarga jalb etish, vaqtini samarali oʻtkazish ishlari namunali yoʻlga qoʻyilgani sabab mahalla yoshlari oʻrtasida jinoyatchilik yoʻq. “Besh tashabbus olimpiadasi”da “Bachqir”ning yengil atletikachi qizlari 27-30 yosh toifasida respublikada gʻoliblikni qoʻlga kiritib, mahalla yoshlari uchun sport maydonchasi yutib olishdi. Ushbu maydoncha qurib bitkazilib, yoshlarga topshirilgan. Musharrafxon Murodaliyeva belbogʻli kurash boʻyicha jahon, 7 karra Oʻzbekiston chempioni. U “Besh tashabbus” doirasida 2005-yilda tugʻilgan yoshlar oʻrtasida oʻtkazilgan yengil atletika, Jasurbek Nasibjonov esa sportning vorkaut turi (koʻcha sporti) boʻyicha respublika musobaqasi, mahalla futbol jamoasi DXX va IIB kubogi bellashuvlari gʻolibi boʻldi. Voleybol boʻyicha qizlar jamoasi respublika chempionati ishtirokchisi. Mahallada va maktabda doimiy ravishda toʻgaraklar faoliyat yuritishi natijasida mahalla yoshlari har yili “Besh tashabbus olimpiadasi”ning respublika bosqichida faol ishtirok etadi. Mahalla yoshlari faoliyatidagi bunday oʻzgarishlar, yangilanishlar, ularning mustaqil hayotga dadil va ishonch bilan qadam qoʻyishida yoshlar yetakchisining hissasi katta. Yigit-qizlarda maqsad sari intilish, qiyinchiliklardan choʻchimaslik, tashabbuskorlik fazilatlarini shakllantirish, ularni ezgu ishlarga ruhlantirish, Vatanga munosib oʻgʻil qizlar etib tarbiyalash mahalla faollari qatorida yoshlar yetakchisidan ham jiddiy masʼuliyat talab etadi. Abubakir zimmasidagi javobgarlik va masʼuliyat tuygʻusini hamisha teran anglab, his qilib yashaydi. Uning yutugʻi ham shunda.

23.11.2023 269

“GOʻRI AMIR” yetakchisi

Husan NASRIDDINOV, Samarqand shahar “Goʻri Amir” mahallasi yoshlar yetakchisi: 2022-yil 8-dekabrda Konstitutsiyamizning 30 yilligi koʻkrak nishoni, 2023-yil 22-mart “Mahalla tizimi xodimlari” kunida “Mahalla Iftixori” koʻkrak nishonlari bilan taqdirlangan. 2023-yilda “Eng namunali yoshlar yetakchisi” koʻrik-tanlovining shahar bosqichida gʻolibi. – Mahallamiz turistik zonada joylashgan. Asosiy drayverimiz mehmonxona va xizmat koʻrsatish sohasi hisoblanadi. 22 gektar maydonda joylashgan, 12 koʻchadan iborat kichik mahallamizda 30 dan ortiq mehmonxona va oilaviy mehmonxonalar faoliyat ko‘rsatadi. Tarixiy obidalar koʻp ushbu mahallaga yoshlar yetakchisi etib tayinlanganimda birorta ham sport maydonchamiz yo‘q edi. Besh tashabbus olimpiadasiga tayyorgarlik koʻrish va yoshlarni boʻsh vaqtida sportga jalb etishda muammolarga duch kelardik. Men mahallamiz binosi yonidagi kichik boʻsh joyga “Workout” maydonchasi bunyod etishni o‘ylab turgan edim. Yoshlar ham shunday iltimos bilan menga murojaat qildi. Avvaliga qancha xarajat ketishini hisobladim. Biz uchun 48 million soʻmlik mablagʻ zarur boʻldi. Sport maydonchasining rejasini tuzib, shahar hokimligiga xat bilan chiqdim. Ular bizning iltimosimizni tez orada hal qilib berdi. Qisqa vaqt ichida mahallamiz yoshlari uchun sport maydoni barpo etildi. 2023-yil 1-iyun “Xalqaro bolalarni himoya qilish” kunida mahalla yoshlariga katta tadbir tashkil qilinib, maydonchamizning ochilish marosimi oʻtkazildi. Hozir maydonchadan nafaqat yoshlarimiz, shu bilan birga mahallada ijarada turuvchi talabalar va xorijlik turistlar ham foydalanmoqda. 2863 nafardan iborat mahallamiz ahlining 543 nafarini yoshlar tashkil etadi. 2022-yildan buyon 39 nafar yosh “Yoshlar daftari” platformasiga kiritilib, tegishli yordamlar koʻrsatildi. Jumladan: 13 nafariga — bir martalik moddiy yordam ajratildi; 10 nafari — asbob-uskuna bilan ta’minlandi; 9 nafar talabaga – toʻlov shartnoma pullari qoplab berildi; 1 nafariga – maktab formasi olib berildi; 3 nafari – kelajak kasblariga oʻqitildi; 1 nafarining – davolanish xarajatlari qoplandi; 2 nafariga – SChR badal pullari to‘lab berildi. Qizil toifadagi yoshlarimiz esa 19 nafarni tashkil etadi. Bu yoshlar Samarqand shahar prokurori – 2-sektor rahbari B.Oblaqulovga biriktirilgan. Barcha yoshlar bilan uchrashuvlar tashkil etilib, muammolari aniqlandi va zarur yordamlar koʻrsatilmoqda. Migratsiyadagi 43 nafar yoshimizning barchasi bilan telegram orqali aloqalar yoʻlga qoʻyilgan.

22.11.2023 225

Yetakchi tashabbusi bilan “Yoshlar bogʻi” tashkil etildi

Yurtimiz boʻylab “Yashil makon” loyihasi doirasida mamlakatimizni yanada obod qilish, yashil hududlarni kengaytirish ishlari qizgʻin davom etmoqda. Peshku tumani “Sadir” mahallasi Dehdaroz qishlogʻi hududida ham bogʻ barpo etildi. Mahalladagi yoshlar yetakchisi Muhammadali Kamolovning tashabbusi bilan bunyod etilgan bogʻda volontyorlar, mahalla yoshlari va faollari ishtirok etdi. Muhammadali KAMOLOV, Peshku tumanidagi “Sadir” mahallasi yoshlar yetakchisi: – “Yashil makon” umummilliy loyihasi doirasida men ham mahallamiz hududida yoshlar bogʻini barpo etishni niyat qildim. Mahallamiz yoshlari bilan maslahat qilib, hududimizdagi Dehdaroz qishlogʻida hech kim foydalanmayotgan yerda bogʻ barpo etadigan boʻldik. Mahalla yoshlarining har biri oʻzlari bilan turli mevali daraxt ko‘chatlarini olib keladigan boʻldi. 18-noyabr kuni erta tongdan bogʻ yaratishga kirishib ketdik. Bizga volontyor yoshlar va mahallamiz faollari ham yelkadosh boʻldi. Shu kuni Yoshlar bogʻiga 600 dan ortiq mevali va manzarali daraxt koʻchatlari ekdik. Ezgu niyat bilan ekilgan koʻchatlar yashnab, mahallamiz koʻrkiga koʻrk qoʻshadi degan umiddamiz.

15.11.2023 296

Yoshlarning ishonchi – mukofot

Agar mahallamizdagi yoshlarning biror muammosi borligidan xabar topsam yoki ular menga murojaat etsa, ulardan hech qanday yordamimni ayamayman. Ularga birinchilardan boʻlib yordam berishga odatlanganman. Yoshlar ham biror muhtojlik sezsa, birinchi boʻlib menga murojaat qilishga o‘rganishgan. Hatto boshiga biror mushkul ish tushsa, ota-onasidan avval menga aytishadi. Bir kuni kechki payt telefon bo‘ldi. Bir yosh yigit o‘ylamay bosgan qami oqibatida unga jinoiy ish ochilgani, qonuniy chora koʻrish uchun hujjatlari jinoyat ishlari boʻyicha tuman sudiga yuborilganini aytdi. Ish yuzasidan jinoyat ishlari boʻyicha Parkent tumani sudi raisi boshchiligida sayyor sud belgilangan ekan. Buni eshitib, sayyor sudda ishtirok etdim. Sudya qaror chiqarishidan oldin soʻz soʻrab, bu yoshning mahallasida yoshlar yetakchisi ekanligimni aytdim. Ular menga imkon berishdi. Men bu bolaga kafillik qilishimni aytib, qaytib bu yoʻlga kirmasligiga vaʼda berdim. Ular bizga ishonch bildirib, sud zalidan uyga ruxsat berdi. Shu voqeadan soʻng haligi yosh mendan minnatdor boʻlib, nima vazifa bersam, vaqtida bajaradigan boʻldi. To‘g‘ri yo‘lga kirdi. Doim nazoratimda boʻldi. Qilgan ishidan pushaymonligi koʻrinib turardi. Shu voqeadan soʻng mahallamdagi yoshlar birorta muammo boʻlsa, menga murojaat qilishga odatlandi. Men esa ularning xohishini amalga oshirishga imkonim qadar harakat qilib kelmoqdaman. Mahallamizda oʻtkazilgan xatlov jarayonida bir necha yosh oʻzining tadbirkorlik faoliyatini yoʻlga qoʻyish istagini aytgan edi. Ulardan biri Lobar Toʻlqinova. Lobar hovlisida dehqonchilik qilish niyatida ekan. Men unga xonadonida issiqxona qurishni maslahat berdim. Mahallamiz hokim yordamchisi ham fikrimni tasdiqlab, unga 33 million soʻmlik imtiyozli kredit ajratib berdi. Oradan qisqa vaqt oʻtib, uning orzusi amalga oshdi. Hozir Lobar oyiga 4-5 million soʻmlik sof daromad olib, oilaviy byudjetiga yordam keltirmoqda. Tikuvchilik sexi ochishni niyat qilgan Anvar Abdurazzoqovga ham imtiyozli kredit ajratib berdik. U mablagʻning hammasiga zamonaviy tikuv mashinalari olib, oʻz uyida tikuv sexi faoliyatini yoʻlga qoʻydi. Hozir mahalladagi 3-4 nafar ishsiz yoshning ham bandligini taʼminlab, ularga ham daromad manbayini yaratdi. Oilaviy sharoiti ogʻir, yordamga muhtoj yoshlarni “qizil” toifaga kiritib, mutasaddi rahbarlarga biriktirib qoʻyganmiz. Shuhrat Shoahmedov tumanimiz hokimiga biriktirilgan. Bu yoshimiz motokultivator olish niyati borligini aytgan edi. Tuman hokimi esa uning istagini amalga oshirib, subsidiya asosida motokultivator ajratib berdi. Shuhrat yoz boʻyi motokultuvatordan foydalanib, moʻmaygina daromad topdi. Biz mahallamiz yoshlari bilan birgalikda hududimiz obodligiga ham oʻz hissamizni qoʻshishga harakat qilamiz. 2023-yil tashabbusli byudjet loyihasiga “Tolbuloq” mahallasidagi S.Raximov va Navoiy koʻchalarini taʼmirlash uchun oʻz loyihamni qoʻyib, mahalla yoshlari bilan birgalikda 2 mingdan ortiq ovoz toʻplashga muvaffaq boʻldik. Natijada bizning loyihamiz uchun davlat byudjetidan mablagʻ ajratiladigan boʻldi. Bularning hammasiga mahallamiz yoshlarining menga boʻlgan ishonchi sabab erishdik deb baralla ayta olaman.

8.11.2023 442

“Obod ta’lim” markazi

Obod mahallasi aholisining 1113 nafari 30 yoshgacha bo‘lgan fuqarolardir. Yosh avlodni milliy va umuminsoniy qadriyatlar, vatanparvarlik ruhida tarbiyalash, jamiyatda munosib o‘rinni egallashi, farovon turmush kechirishi uchun sharoit yaratish yo‘lida salmoqli ishlar amalga oshirilmoqda. Obod ta’lim markazida rus va ingliz tillari, kompyuter savodxonligi, grafik dizaynerlik to‘garaklari tashkil etilmoqda.  Jami 4 turdagi to‘garaklarning har bir guruhiga 12 nafardan yosh qamrab olinishi rejalashtirilgan Markaz yoshlarning tashabbus va g‘oyalarini birlashtirish, yangi loyihalar tayyorlash, yigit-qizlarni kasbga o‘rgatish, o‘zaro muhokamalar maydoni yaratish, turli sohalarda mahorat darslarini o‘tish uchun sevimli maskanga aylanishiga ishonch bildirilmoqda. Ilm bilan el Obod!

8.11.2023 406

Xatlovdan keyingi yutuqlarim

Mahalladagi xatlov jarayonlari bizga mahalla yoshlarining balansini shakllantirish bilan birga ular bilan yaqindan tanishish imkonini ham beradi. Yaqinda biz, yoshlar yetakchilariga xorijiy davlatlarga ketgan yoshlarni xatlovdan oʻtkazish topshirigʻi berilgan edi. Mahallamizdan 26 nafar yosh ishlash maqsadida xorijga ketgan. Ularning 23 nafari Rossiyada, 3 nafari Turkiya davlatida ishlab, roʻzgʻor tebratmoqda. Men ularni xatlovdan oʻtkazish bilan birga telefon raqamlarini ham aniqlab chiqdim. Ijtimoiy tarmoqlar orqali hammasining holidan xabar oldim. Ishlayotgan, yashayotgan joylari bilan tanishdim va telegramda “Biyosin MFY Xorijdagi yoshlar” guruhini tashkil qildim. Telegram guruhi ochilganidan mahallamiz yoshlari juda ham xursand. Ular oʻzaro gaplashib, hol-ahvol, koʻngil soʻrab turishadi. Hatto bir-biriga yaqin joyda ishlayotgan, bundan bexabar mahalladoshlarimiz telegram kanalimiz orqali topishib, koʻrishishdi. Gʻijduvon tumani hokimining yoshlar masalalari boʻyicha oʻrinbosari Sh.Sharipov hamda Yoshlar ishlari agentligining Gʻijduvon tumani boʻlim boshligʻi N.Rajabov ham guruhimizga aʼzo boʻldi. Bundan migrant yoshlarimiz xursand. Endilikda ular qandaydir muammoga duch kelsa yoki yordamga muhtoj boʻlsa, shu yerning o‘zida Gʻijduvon tumani hokimligiga murojaat qila oladi. “Yoshlar daftari” yordamga ehtiyoji bor yoshlarning oyoqqa turib, yoʻlini topib ketishiga sabab boʻlayotgan tizim deb bilaman. Bu tizim orqali biz ham xorijdagi, ham mahallamizdagi yoshlarga zarur koʻmaklarni beryapmiz. Bugunga qadar “Yoshlar daftari” imkoniyatlaridan foydalangan holda yigirmaga yaqin yosh oʻz yoʻlini topib, kichik biznesiga asos soldi. Shunday yoshlardan biri Zarina Kenjayeva. U maktabni tamomlab tikuvchilikni oʻrgangan va mahallamiz ahliga xizmat qilib kelayotgan edi. Xatlov sabab uning xonadonida boʻlganimda Zarina tikuv sexi ochish niyati borligini aytdi. Men uni “Yoshlar daftari”ga roʻyxatga olib, ikki dona zamonaviy tikuv mashinasi olishiga koʻmaklashdim. Tikuv mashinasini olgach, mahalladagi qizlarga tekinga hunarini oʻrgatadigan boʻldi. Atrofiga yigʻgan 7-8 shogirdi ham oʻz tikuv mashinasi bilan Zarinaning xonadonida tikuvchilikni oʻrgana boshladi. Oradan qisqa vaqt oʻtib, Zarina va uning shogirdlari katta-katta buyurtmalarni qabul qila boshladi. Shu tariqa u oʻzining tikuv sexiga, tikuvchilikni oʻrganish uchun kelgan shogirdlari esa daromad manbayiga ega boʻldi. Shu tajriba asosida hozir mahallamizda ikkita tikuvchilik sexi faoliyat boshladi.

4.10.2023 865

“Rabotak”da yoshlar qanday ishli bo‘lmoqda?

Mahallamizda bir nechta yosh tadbirkor ish boshladi. Bunda bizga ustoz-shogird an’anasi asqatmoqda. Gap shundaki, yoshlarning tadbirkorlik faoliyatini qoʻllab-quvvatlash va bandligiga koʻmaklashish, ularni ijtimoiy himoya qilish, boʻsh vaqtini mazmunli tashkil etish maqsadida ishsiz yoshlarimizni mahalladagi usta-hunarmandlarga biriktirib qoʻyganmiz. Ular bir-necha oy davomida oʻzlari qiziqqan hunar sirlarini ustozlaridan oʻrganishadi. So‘ng “Yoshlar daftari”ga roʻyxatga olib, oʻzlari mustaqil ish boshlashlari uchun zarur yordamlar beryapmiz. Doston Boboqulov ham ishsiz edi. Uning ustachilik qilish niyati borligini bilgach, mahallamizda plastik rom yasaydigan ustaga shogirdlikka olib bordim. Yetti oy davomida ustozidan hunar sirlarini mukammal oʻrgandi. Keyin mustaqil ish boshlash istagini bildirgach, uni “Yoshlar daftari”ga roʻyxatga olib, 33 million soʻmlik imtiyozli kredit olishi uchun tavsiya berdim. Kredit mablagʻiga plastik rom ishlab chiqarish uchun zarur uskunalarni xarid qilib, oʻz uyida ish boshladi. Hozir oyiga 4-5 million soʻm sof daromad olmoqda. Mahalladagi bir nechta yoshga oʻz hunarini oʻrgatib, ikki nafar yoshning bandligini taʼminladi. Mamadali Rajabov ham bir necha oydan buyon mahallamizdagi beshikchi ustaga shogird tushib, hunar oʻrganayotgan yoshlardan edi. U ham beshikchilikni mukammal oʻrgangach, mustaqil ish boshlash maqsadi borligini aytdi. Mamadalini ham “Yoshlar daftari”ga roʻyxatga olib, 33 milllion soʻm imtiyozli kredit ajratib berdik. Hozirgi kunda oyiga 5-6 million soʻm daromad olish bilan birga, 4 nafar shogirdiga beshikchilik hunarini oʻrgatyapti. Ishsiz qizlarimizning mahalladagi tikuvchilik oʻquv markazida hunar oʻrganishini yoʻlga qoʻyganman. Bu yerda qizlar tekinga hunar oʻrganib, 5-6 oyda mustaqil ish boshlayapti. Men esa ularni “Yoshlar daftari”ga olib, subsidiya asosida tikuv mashinasi olishga tavsiya qilyapman. Yil boshidan buyon mahallamizdagi 7 nafar qiz tikuvchilikni mukammal oʻrgandi va ularning har biriga subsidiya asosida tikuv mashinasi ajratildi. Ular oyiga 2-3 million soʻm atrofida daromad olish bilan birga, mahalladagi ishsiz yoshlarga tikuvchilik sirlarini oʻrgatib kelmoqda. Yuqoridagilar kabi ustoz-shogird an’anasi asosida hunar oʻrgangan har bir yoshga mahalladagi ishsiz yoshlarni biriktirib qoʻyganman. Ular oʻzlariga biriktirilgan yoshlarga tekinga hunar oʻrgatadi. Shu tariqa mahallamizda ustoz-shogird an’anasini yoʻlga qoʻyib, yoshlarning bandligini taʼminlamoqdamiz.

28.9.2023 1306

Yetakchilar bilan yuzma-yuz muloqot

Toshkent viloyatining Chinoz tumanida 55 ta mahalla boʻlib, ularda, jumladan, 33 ming 643 nafar yosh istiqomat qiladi. Ayni yoshlarning 1 325 nafari “qizil” toifaga kiritilgan. Bandlik dasturiga koʻra, ularning 608 nafari ishsizligi bois roʻyxatga olingan boʻlsa, hozirga qadar 251 nafarining bandligi taʼminlangan. “Ogʻir” toifaga olingan yoshlarning qanday muammo va ehtiyojlari bor? Ular qanday yordamga muhtoj? Prezident Administratsiyasi Yoshlar siyosati departamenti rahbari Qahramon Quronboyev boshchiligidagi Resbuplika ishchi guruhi aʼzolari Toshkent viloyati Chinoz tumanida boʻlib, yoshlar yetakchilari bilan ochiq muloqot oʻtkazdi. Ilm-fan, tadbirkorlik, taʼlim, bandlik sohasiga oid murojaat va muammolar oʻrtaga tashlanib, har bir yetakchining mahallasidagi vaziyat atroflicha muhokama qilindi. Muloqotlar natijasida turli muammolar sabab oʻz rejalarini amalga oshirishga qiynalayotgan yoshlarga eʼtibor qaratish, bu ularga ragʻbat, boshqa tengdoshlariga ham oʻziga xos ijodiy dalda boʻlishi lozimligi taʼkidlandi. Oʻrtachirchiq tumanidagi 57 ta mahallada yashayotgan 29 ming 133 nafar yoshning 534 nafari “qizil” toifaga kiritilgan. Tumandagi 523 nafar yosh ishsiz. “Mayramkoʻl” mahallasida “Kelajak yoshlar biznes inkubatori” yoʻlga qoʻyilgan bo‘lib, u yerda 26 nafar yoshga 20 sotixdan ochiq yer maydoni, 6 nafar yoshga issiqxona, 8 nafar yoshga 50 tadan tovuq va oʻrdak ajratildi. Issiqxonalarga bodring, yer maydoniga bulgʻor qalampiri, bodring, noʻxot kabi ekinlar ekildi. Yoshlar olayotgan daromadidan mamnun. 2023-yil aprel oyidan Oqqoʻrgʻon tumanidagi “Ishga marhamat” monomarkazi tomonidan Oʻrtachirchiq tumanidagi “Qaytmas” mahallasida aholini kasb-hunarga oʻqitish yoʻlga qoʻyilgan. Shu kunga qadar tuman bandlik boʻlimlari yoʻllanmalariga asosan bu yerda jami 113 nafar yosh kasb-hunar egallagan. Ulardan 55 nafari quyidagi yoʻnalishlarda kasb egasi boʻldi: 19 nafari – tikuvchi; 14 nafari – ayollar sartaroshi; 10 nafari – santexnik va chilangar; 12 nafari – massajchi (uqalovchi). Markazni tamomlagan tinglovchilarga kasb-hunar diplomi darajasiga tenglashtirilgan va egallagan bilimlarini mehnat faoliyatida amalga oshirish huquqini beruvchi sertifikatlar berildi. Ularning 72 foizi ishli ham bo‘ldi. Yana 43 nafar fuqaro yoʻllanma asosida oʻqish jarayoni boshlanishini kutmoqda. Respublika ishchi guruhi safar chogʻida Oʻrtachirchiq tumanidagi mazkur monamarkaz va kasb-hunarga oʻqitish maskani faoliyati bilan tanishdi. Tumandagi yoshlar yetakchilariga yoshlar muammolarini hal etish, ularga amaliy yordam berish ishlarini tizimli tashkil etish borasida maslahatlar berildi. Suhbat davomida har bir yetakchining mahallasidagi vaziyat atroflicha muhokama qilindi. Shundan soʻng Q.Quronboyev Qibray tumanida boʻlib, tumandagi “Chinobod” mahallasi yoshlar yetakchisi faoliyati bilan yaqindan tanishdi. Mahalladagi “ogʻir” toifadagi yoshlarning ahvoli va “Besh tashabbus olimpiadasi” musobaqalarining tashkil etilish jarayonlari bilan qiziqdi. Shu bilan birga, “mahalla beshligi” bilan suhbatlashib, hamkorlikda ishlash boʻyicha tavsiyalar berdi. Tumanning barcha mahallalaridagi yoshlar yetakchilari bilan uchrashuvda ular duch kelayotgan muammolar muhokama qilindi. Yetakchilarning 5+2 muhim vazifalari yuzasidan olib borayotgan ishlari tahlil qilindi. Maʼlumot uchun: Qibray tumanda 68 ta mahalla yetakchilari tomonidan oʻtkazilgan xatlov natijasiga koʻra, 14-30 yoshgacha boʻlgan yoshlar 36 408 nafarni tashkil etadi. Ular quyidagi tofalarga ajratilgan: 23 309 nafari – “yashil”; 13 099 nafari – “sariq”; 1 492 nafari – “qizil”. “Qizil” toifaga olingan yoshlar tuman, viloyat va vazirlik miqyosidagi rahbarlarga biriktirildi. Biriktirilgan rahbarlar oʻzlariga biriktirilgan yoshlar xonadoniga borib, muammolarini oʻrgangan holda tizimli yordam koʻrsatish boʻyicha sektorlar va mahallalar kesimida manzilli “Yoʻl xaritalari” ishlab chiqib, tasdiqladilar. “Qizil” toifadagi yoshlarning 618 nafarida muammolar aniqlangan boʻlib, ularning 578 nafariga (94 %) “Yoʻl xarita”si asosida manzilli yordam koʻrsatilgan. Shuningdek, “Yoshlar bandlik dasturi” asosida Qibray tumanida 2 160 nafar yosh qamrab olingan boʻlib, shundan 1 400 nafari maktab bitiruvchilari hamda 760 nafari ishsiz yoshlarni tashkil etadi. Tasdiqlangan dastur asosida bugungi kun holatiga ko‘ra, 760 nafar ishsiz yoshning yoʻnalishlar kesimida 389 nafarining (51 %) bandligi taʼminlangan.

18.9.2023 1861

"Mehnatobod" mahallasi yoshlar yetakchisining parvozi

Mirzaraimov Ismoil Isoxon o'g'li O'zbekiston Respublikasi Yoshlar siyosati va sport vazirligi huzuridagi Yoshlar ishlari agentligi markaziy apparatining Axborot-kommunikatsiyalarini joriy etish va raqamlashtirish bo'limi bosh mutaxassisi lavozimiga tayinlandi. U 2000-yilda Namangan viloyati Namangan shahrida tavallud topgan. 2022-yildan hozirga qadar Yangi Namangan tumani "Mehnatobod" mahallasi yoshlar yetakchisi lavozimida faoliyat olib borayotgan edi.

23.8.2023 3719

“GʻIJDUVON TAJRIBASI”

Migrantlar, imkoniyati cheklanganlar, tadbirkorlik qilish istagidagi yoshlar, sanʼat va madaniyat yoʻnalishida iqtidorli yoshlar bilan ishlash, kam taʼminlangan oila farzandlari, besh tashabbus va kitobxonlik tadbirlari – bularning barchasi mahalladagi yoshlar yetakchisiga yuklatilgan vazifalardir. Bu ishlarni uddalashda esa yetakchiga koʻmakchi zarur boʻladi. Shu bois 7 ta yoʻnalishdan iborat boʻlgan “Mahalla sardorlari” tizimi ishlab chiqilgandi. Bu yoʻnalishlar yetakchi ogʻirini yengil qilishi, tadbir va musobaqalarga yoshlarning ishtiroki va qiziqishini orttirishi, umuman, yoshlarning ijtimoiy hayotdagi faolligini oshirishda koʻmaklashishi kerak edi. Ammo bu sardorlar tizimi hadeganda oʻylangan natijani bermagani hammamizga ma’lum. Sababini kerakli koʻnikma va tajribaning yetishmagani deb aytish mumkin. Mazkur muammoga yechim topish, mahalla sardorlari tizimi ishlash prinsipini yoʻlga qoʻyish maqsadida Gʻijduvon tumanidagi barcha mahallalarda yoshlar yetakchilariga chin maʼnoda koʻmakchi, shu bilan birga, yoshlarga haqiqiy oʻrnak va lider boʻla oladigan “Mahalla sardorlari” bilan ishlashning yangicha tizimi – “Gʻijduvon namunasi” ishlab chiqildi. Unga koʻra, eng avvalo, mahallada 7 ta yoʻnalish qayta tashkil etildi. Sardorlar saralandi. Madaniyat va sanʼatni targʻib qilish. Sogʻlom turmush tarzi va sportni targʻib qilish. Axborot texnologiyalaridan samarali foydalanishni tashkil qilish. Maʼnaviyat va kitobxonlikni targʻib qilish. Vatanparvarlik va huquqiy savodxonlikni oshirish. Tadbirkorlik gʻoyalarini qoʻllab-quvvatlash. Xotin-qizlar, yosh oilalar va imkoniyati cheklanganlar bilan ishlash. Tizimning toʻgʻri yoʻlga qoʻyilgani yoshlar yetakchisi, umuman, jamiyat uchun quyidagi ijobiy natijalarni bera boshladi: Profilaktika ishlari samaradorligi ortdi Bunda mahalladagi roʻy berishi mumkin boʻlgan ehtimoliy jinoyatlar, jamiyat ijtimoiy hayoti yoki shaxsning sogʻligi uchun xavf solishi mumkin boʻlgan holatlar sardorlarning samarali faoliyati natijasida mahalla yetakchisi va mahalla beshligi hamkorligida samarali profilaktika ishlari olib boriladigan boʻldi. Yoshlar boshqaruvi va nazorati optimallashdi Uyushmagan yoshlar bilan ishlashda tumanimizdagi har bir yetakchiga mahallaning kattaligi va aholi zichligiga qarab, 500 nafardan 2500 nafargacha yosh toʻgʻri kelardi. Albatta, buncha yoshlar bilan ishlashda yetakchining bir o‘zi qiyinchilikalarga duch kelardi. Yangi tajribaga asosan mahallada tashkil etilgan toʻgaraklarga yoshlarni jalb qilish, ularni qiziqtirish hamda ishtirokini taʼminlashda yetakchiga qoʻshimcha “qoʻllar” berildi. Bu yoshlarning ayni vaqtda nima bilan shugʻullanayotgani va nima bilan bandligini aniqlashda eng optimal va oson yoʻl boʻldi.   Yangi gʻoya va tashabbuslar xilma-xilligi oshdi Mazkur tizim mahallaning eng chekka qishlogʻidagi yoshning qarashlari va tashabbuslari, tengdoshlariga oʻrnak boʻla oladigan jihatlarini hammaga targʻib qilish imkonini berdi. Natijada mahallalarimizda robototexnika, IT va bir qator yoʻnalishlarda toʻgaraklar va mashgʻulotlar faoliyati yoʻlga qoʻyildi.   “Foydali kontentlar joylashtiryapmiz” Bugungi kunda barcha hududlardagi mahalla yoshlari “TikTok”, “Instagram”, “YouTube”, “Telegram” va shu kabi ommabop ijtimoiy tarmoqlarda oʻz akkauntlariga ega. Ular mazkur tarmoqlar orqali vaqtichogʻlik qilish yoki oʻzlarini ayni paytda qiziqtirayotgan voqealar, qiziqishlari, mashgʻulotlari haqida hikoya qiladigan video va postlar joylab borishmoqda. Biz mahalla sardorlari orqali mazkur postlarning haqqoniyligi, qonuniyligi va milliy mentalitetimizga mos kelishini kuzatib, tahlil qilib boryapmiz. Auditoriyasi keng kanallarda yoshlar uchun “IBRAT ACADEMY” ilovasi kabi foydali ma’lumotlarni joylashtirib boryapmiz. *** Yettinchi yo‘nalish asosida xotin-qizlarning ijtimoiy faolligini oshirish, ommaviy tadbirlar va musobaqalarga ularni jalb qilish imkoniyati yaratildi. Sardorlar tizimining eng afzal jihatini mazkur yoʻnalishda koʻrishimiz mumkin. Chunki sardorlarining samarali faoliyati bilan tumanda qizlar koordinatorlari, futbol, yengil atletika, stritbol, voleybol bo‘yicha xotin-qizlar jamoalari tashkil etilganini hamda “Besh tashabbus olimpiadasi” doirasida yoshlar raqs festivalidagi natijalarni misol qilib koʻrsatishimiz mumkin. Mazkur yoʻnalish jamiyatda gender tenglikni roʻyobga chiqarish, xotin-qizlar faolligini oshirish uchun ajoyib imkoniyatlar eshigini ochdi, desak mubolagʻa boʻlmaydi.

10.8.2023 4655

“Olgʻabos” yoshlari qachon olgʻa bosadi?

Hududlar va sektorlar bo‘ylab xizmat safarlarimiz davom etadi. Xabaringiz bor, mamlakatimizda Prezident topshirig‘i bilan davlatning gʻamxoʻrligi va eʼtiborini kutayotgan hamda koʻmakka muhtoj yoshlar ro‘yxati shakllantirildi. Sirdaryo viloyati Sayxunobod tumanidagi “Olgʻabos” mahallasida ana shunday toifadagi 41 nafar yosh rahbar xodimlarning  qoʻllab-quvvatlashiga muhtoj. Ular quydagi sabablar bilan “qizil” toifaga olingan: Profilaktik  hisobda (1); Probatsiya nazoratida (1); Notinch oila farzandi (1); Xorijiy migratsiyadan qaytib kelgan (9); Oilaviy ajrim yoqasida (1); Nogiron (12); Surunkali kasalligi bor (4); Yetim (12). Ular bilan manzilli ishlash maqsadida “Yoʻl xaritasi” ishlab chiqilib, bu yoshlarning muammolarini hal etish viloyat transport boshqarmasi boshligʻi Muhiddin Suyunovga yuklatilgan. Ammo... Zamira Boboyeva, Xorijiy migratsiyadan qaytib kelgan Rustam Boboyevning onasi: – Oʻgʻlim hozir dalada, deyarli har kuni mavsumiy ishga chiqadi. Hovlimizdagi qurilishni davom ettirish uchun yaqinda yana xorijga ishlash uchun ketmoqchi. Men esa buni istamayman. Ko‘z oldimda bo‘lishini xohlayman. Muhiddin Suyunovga oʻgʻlimni biror yerga ishga joylab qoʻyishini iltimos qildim. Ular taklif qilgan ish esa kam haq toʻlarkan, o‘g‘lim u yerda ishlashni istamadi. Endi chet elga yuborishdan boshqa choramiz yoʻq.   Gulbahor Toʻqliyeva, profilaktik hisobda turuvchi Oxun Mahmarajabovning onasi: – Muhiddin Suyunov uyimizga ikki marta keldi. U kishidan oʻgʻlim motokultivator soʻragan edi. Yordam berishini aytgan. Ammo hali berilmadi. Oʻgʻlim ish boshlandi degandan to qishgacha dalada ishlaydi. Unga bitta motakultivator berilsa, qoʻshimcha daromad topardi.   Abdurauf Isroilov, xorijiy migratsiyadan qaytib kelgan yosh: – Ochigʻini aytsam, men Muhiddin akani koʻrmaganman. Agar uchrashganimizda ham u kishidan hech narsa soʻramagan boʻlardim. Chunki biror muammoyimga yordam berolishiga ishonmayman! Oʻzim shu hafta ichida Rossiyaga ketib, yana migratsiyada boʻlaman. Bu men uchun ishonchli chora. Shuningdek, mahalla yoshlari biriktirilgan mutasaddidan 6 million so‘mlik oʻt oʻruvchi qurilma, asbob-uskuna va mehnat qurollari uchun 6 million so‘m subsidiya, 5 million soʻmlik tikuv mashinasini olishda yordam, bandligini taʼminlash maqsadida Toshkent shahridagi “Texnopark” majmuasiga ishga joylashtirib qoʻyish kabi yordamlarni soʻragan. Shu kungacha bu masalalarning birortasi yechimini topmagan. Oqibatda mahalla yoshlari ularga biror inson yordam berishiga unchalik ishonmay qoʻygan. “Olgʻabos”lik yoshlarga qachon yordam beriladi? Shu savol bilan viloyat transport boshqarmasi boshligʻi Muhiddin Suyunovga murojaat qildik. Muhiddin SUYUNOV, Sirdaryo viloyati transport boshqarmasi boshligʻi: – Bizga 50 nafardan biriktirilgan har bir yoshni oʻz farzandimizdek koʻrishimiz tayinlangan. Bilasizmi, men hatto oʻz farzandlarimning ham barcha istaklarini emas, qurbim yetganlarini amalga oshiraman. “Olgʻabos” mahallasida menga biriktirilgan 18 nafar yoshga ikkita mini avtobus ajratib berib Samarqand shahriga aylanib kelishini tashkil qilib berdim. Chunki ayni paytda shunga imkonim boʻldi. Yoshlar soʻrayotgan juda koʻp iltimoslar katta katta mablagʻ evaziga amalga oshadi. Ana shu pul boʻlishi bilan imkonim doirasida ularga yordam beraman. Yana mahalladagi 16 nafar sogʻligida muammosi bor yoshlar uchun 4 turdagi shifokorlarni olib kelib, bepul tibbiy koʻrik ham tashkil qildim.   Shundan so‘ng “Olgʻabos” mahallasiga qoʻshni hudud “Nurobod” mahallasida boʻldik. Sarvar Doniyorov, Sayxunobod tumani “Nurobod” mahallasi yoshlar yetakchisi: – Mahallamizdagi “ogʻir” toifadagi yoshlar bilan manzilli ishlash maqsadida tuzilgan “yoʻl xaritasi”ga jami 81 nafar yosh qamrab olingan boʻlib, ular 10 nafar rahbarga biriktirilgan. Yoshlarning ehtiyoji va soʻragan yordamidan kelib chiqib har bir murojaatni hal etish uchun aniq muddat belgilab olingan. Hozircha 81 nafar yoshning 59 nafarida muammo aniqlangan. 22 nafari har qanday yordamni rad etgan. 29 nafar yordam soʻragan yoshlarning ehtiyoji qondirildi: 1 nafari – ishga joylangan; 4 nafari – tadbirkorlik uchun kredit olgan; 3 nafariga – ekin maydoni ajratilganlar; 7 nafariga – asbob-uskuna ajratilgan; 2 nafarining – davolash xarajaatlari qoplab berilgan; 12 nafariga – bo‘doy va boshqa moddiy yordam berilgan. Artur Umirov, probatsiya nazoratidagi yosh: – Men “qizil” toifaga olinganimni bilganimdan keyin “Xalq banki” Sayxunobod tumani filiali boshqaruvchisi Jahongir Hanjarov uyimizga kelib “nima yordam?”, deb soʻradi. Men dehqonchilik bilan shugʻullanganim uchun 7 millionlik motokultuvator soʻradim. Oradan oz vaqt oʻtib menga motokultuvator va ikkinchi ekin uchun 50 sotix yer ham ajratib berishdi. Yerga mosh ekib, hozir parvarish qilayapman. Nilufar Xolmamatova, nogiron yosh: – Tuman prokurori Sherali Suyunov uyimizga kelib menga nima zarur boʻlayotganligini soʻradi. Tumanimizdagi monomarkazda tikuvchilikni oʻrganganimni, toʻquvchilik va biser toʻqishimni aytdim. Tikuv mashinasi va overlok kerak boʻlayotganini tushuntirdim. Yoshlar yetakchisidan ham shunday yordam soʻraganman. Ular meni “Yoshlar daftari”ga ham roʻyxatga olgan edi. Ikki hafta oʻtib menga “Yoshlar daftari” hisobidan zamonaviy tikuv mashinasi va overlok uskunasi ajratildi. Hozir oyiga 1 million soʻm daromad topyapman. Amirov Fazliddin, nogiron yosh: – Tuman prokurori Sherali Suyunov uyimizga keldi. Men mahalladagi sartaroshxonada oyiga 8 yuz ming ijara puli toʻlab, sartaroshlik bilan shugʻullanayotganligimni, yaxshi daromad topayotganimni aytdim. 10 million soʻmlik imtiyozli kredit olib yana zamonaviy asbob-uskunalar olish istagim borligini bildirdim. Shundan keyin menga imtiyozli kredit ajratildi. Yaqinda oʻz uyim yonidan oʻzimning sartaroshxonamni ochish uchun qurilish ham qilayapman. Hokim yordamchisi va yoshlar yetakchisi koʻmagida menga sartaroshxona jihozlari subsidiya asosida ajratib berilyapti. Ergasheva Dilnoza: – Uchrashuvda men tikuvchilik qilishim uchun tikuv mashinasi ololmayotganimni aytgandim. Koʻp oʻtmay uyimizga tikuv mashinasi olib kelib berishdi. Toʻgʻrisi menga tekinga tikuv mashinasi berilishiga umuman ishonmagandim. Hozir qoʻni-qoʻshnilarimga liboslar tikib, daromad topayapman. Ikki mahallaning yoshlarida ikki xil kayfiyat. Birlari ularga birov yordam bera olishiga ishonmasa, boshqasida buning aksi. Ehtimol “Nurobod” mahallasi yoshlariga bir emas 10 ta masʼul rahbar biriktirilgani, rahbarlar ularning ehtiyojiga qarab tanlangani uchun mahalla yoshlarining orzusi ushalyotgandir? Jahongir HANJAROV, “Xalq banki” Sayxunobod tumani filiali boshqaruvchisi: – Bilasiz, banklar turli tadbirkorlar bilan hamkorlikda ishlaydi. Kredit ajratib berganimizdan keyin ishlari rivojlansa, minnatdorchilik bildirish uchun kelishadi. Men ularga imkoni boʻlsa, muhtoj yoshlarni qoʻllab yuborish taklifini bildiraman. Ularning koʻpchiligi bu taklifni bajonidil qabul qiladi. Va bizdan shunday savobli ishga undaganimiz uchun minnatdor ham boʻlishadi.

2.8.2023 5012

“Yoʻl xaritasi”ning qaysi manzilidamiz? “Ahvoli ogʻir”yoshlarga qachon yordam beriladi?

Davlatimiz rahbarining yoshlar siyosati sohasidagi ishlar natijadorligini oshirish hamda ular bilan ishlash tizimini yanada takomillashtirish bo‘yicha chora-tadbirlariga bag‘ishlangan videoselektor yig‘ilishida bergan topshiriqlari asosida yoshlar bilan ishlash bo‘yicha manzilli, aniq mezonlar asosida “mahalladan vazirlikkacha” tizimi joriy qilindi. Birinchi bosqichda “ahvoli og‘ir” toifasiga kiritilgan, davlatning g‘amxo‘rligi va e’tiboriga muhtoj 396 ming nafar yoshlar vazirlar va vazir o‘rinbosarlari, viloyat, tuman va shahar hokimlari, sektor rahbarlari, rektorlar, Milliy gvardiya va harbiy qism komandirlariga nomma-nom biriktirildi. Ayni paytda ular o‘z himoyasidagi o‘g‘il-qizlarning kasb-hunar o‘rganishiga, kredit, subsidiya va kafillik olish orqali bandligiga ko‘maklashmoqda. Xoʻsh natija qanday? Yunusobod tumandagi “Shayx Shivli” mahallasida boʻldik. Mahallada “ahvoli ogʻir” toifadagi yoshlar bilan manzilli ishlash maqsadida tuzilgan “Yoʻl xaritasi”ga koʻra, 6 nafar yosh roʻyxatga olingan. Ularning 3 nafari profilaktik hisobda bo‘lgani, 3 nafari nogironligi bois ikki nafar rahbarga biriktirilgan. Vaziyatni o‘rganish uchun bu yoshlarning xonadonida bo‘ldik. Ayrimlari bilan telefon orqali bogʻlandik. Muhammadali Hasanov: – Uch oy oldin tuman soliq inspeksiyasi boshligʻi – 4-sektor rahbari Iskandarjon Kadirov xonadonimizga kelib, “qizil” toifaga roʻyxatga olinganimni, qanday yordam kerak boʻlsa u kishiga murojaat qilishim mumkinligini aytgandi. Oʻshanda uyimiz yonidagi bir tadbirkorga tegishli do‘konni ijaraga olib, kiyim-kechak sotish niyatim borligini, faqat ijara puli qimmatlik qilayotganini aytgandim. Yordam beraman, deb ketganicha qaytib kelmadi... Abdulbosit Sharafiddinov: – Uch oy oldin uyimizga kelgan Iskandarjon Kadirov mendan qanday ehtiyojing bor, deb soʻradi. Men u kishidan moddiy yordam berishlarini so‘radim. Ammo “senga moddiy yordam ajratilmaydi, sababi, sen rasman ishlaysan” dedi. Unday bo‘lsa ukamning kontrakt pulini toʻlashga yordam bering deb, iltimos qildim.  Bu masalada mahallamiz yoshlar yetakchisi Sherzod Umarovga murojaat qilishimiz kerakligini tushuntirdi... Mirodil Mirkarimov: – Sektor rahbari uyimizga kelib, qanday ehtiyojing borligini so‘raganda men mebel sexida ishlashimni va hech qanday yordam kerakmasligini aytdim. Aslida ham menga hech qanday yordam kerak emas.   “Shayx Shivli” mahallasida “qizil” toifaga kiritilgan yana bir yosh – ikkinchi guruh nogironi – Sanjar Mahkamov gapira olmagani bois uning onasi bilan bogʻlandik. Onasi Goʻzal Mahkamova shu paytga qadar oʻgʻlini yolgʻiz katta qilgani, hech kimdan yordam soʻramaganini, agar moddiy yordam ajratilsa, yaxshi boʻlishini aytdi. Nikolay Petrekeev ikkinchi guruh nogironi. U tuman qurilish va uy-joy kommunal xoʻjaligi boʻlimi boshligʻi Shuhrat Sharipovga biriktirilgan. Otasining soʻziga koʻra, bundan uch hafta oldin Shuhrat Sharipov ular bilan suhbatlashgan. “U kishi oʻgʻlim uchun nima zarur boʻlayotganini soʻradi. Biz Nikolayning istagi televizor ekanini, deraza romlarini ham almashtirishga koʻmaklashishni soʻradik”, deydi Nikolayning otasi. O‘rganishlarimiz koʻrsatmoqdaki hali birorta yoshga amaliy yordam berilmagan. Va’da qilingan yordamlar qachon yetib keladi, degan savol ochiq qolmoqda. Bu borada masʼul rahbarlarning fikrini bilish maqsadida ular ishlayotgan idoraga yoʻlga oldik. Birinchi manzilimiz tumandagi 4-sektor idorasi boʻldi. Iskandarjon KADIROV, Yunusobod tumani soliq inspeksiyasi boshligʻi, 4-sektor rahbari: – 4-sektorga 16 ta mahalla biriktirilgan boʻlib, ularda 207 nafar yosh “qizil” toifaga olingan. Ularning 34 nafari menga biriktirilgan. Shu kunga qadar 12 nafariga ehtiyojidan kelib chiqib, yordam berdik. 2 nafar yoshga tikuv mashinasi, 6 nafariga moddiy yordam, 2 nafar yosh probatsiya roʻyxatidan chiqishi uchun, 1 nafar yoshga qoʻltiq tayoq, yana bir nafarining xususiy oʻquv markazida oʻqish xarajatlarini qoplab berish uchun yordam ajratdik. Ularning har biriga oziq-ovqat mahsulotlari tarqatib chiqdik. Yana 7 nafari chet elga chiqib ketgan, 7 nafari esa “hech qanday yordam kerak emasligini bildirgan. “Shayx Shivli” mahallasidagi 5 nafar yosh menga biriktirilgan. Ular bilan tanishib, ehtiyojlarini soʻraganman. A.Sharofiddinov moddiy yordam soʻragan edi. U tuman obodonlashtirish boʻlimida rasman ishlayotgani, doimiy ish oʻrniga ega boʻlgani uchun yordam ajratilmasligini, ukasining kontrakt pulini toʻlash masalada mahalladagi yoshlar yetakchisi koʻmaklashishini tushuntirdim. M.Mirkarimov hech qanday yordam kerakmasligini aytgan. M.Hasanov do‘konni ijaraga olish istagi borligini aytmagan edi. Buni hozir eshitdim. Agar shunday yordam kerak boʻlsa, yordam beramiz. Yoshlardan faqat Sanjar Mahkamovga bir martalik yordam berishni belgilab olganmiz. U hozir tadbirkorga koʻmaklashib, daromad olmoqda. Yaʼni daromad manbayi bor. Shunday boʻlsa-da, ehtiyojidan kelib chiqib, unga moddiy yordam ajratib bermoqchimiz. Sektor rahbarining fikridan koʻrinadiki, mahalladagi 5 nafar “ahvoli ogʻir” toifaga olingan yoshlarning faqat bittasi haqiqatdan yordam olishga muhtoj. Qolganlari turli sabablarga koʻra yordam ololmaydi. Shuhrat SHARIPOV, Yunusobod tumani qurilish va uy-joy kommunal xoʻjaligi boʻlimi boshligʻi: –  Yaqinda Nikolay bilan gaplashgan edim, lekin u mendan yotish uchun karavot va moddiy yordam soʻragandi. Deraza romini ta’mirlab berishni ham, televizorni ham aytmagan. Agar shunga ehtiyoji boʻlsa, albatta, qanoatlantiramiz. Bugunning oʻzida moddiy yordam ham beraman. Sherzod Sharipov bilan suhbatimizdan ikki soat oʻtib, Nikolayning dadasi Aleksandr Petrekov qoʻngʻiroq qildi. Uyiga Shuhrat Sharipov kelganini va ikki million so‘m moddiy yordam berib ketganini aytdi. Aslida yordam har bir muhtoj yosh uchun oʻz vaqtida berilishi zarur. Shundagina mahalla yoshlarida ishonch va umid uyg‘onadi. Tumandagi Uvaysiy” mahallasida bunga guvoh bo‘ldik. Gap shundaki, “Uvaysiy” mahallasida 25 nafar yosh “ahvoli ogʻir” toifaga roʻyxatga olingan. Ular manzilli ishlash, hayotda oʻz oʻrnini topishiga ko‘maklashish uchun 11 nafar mutasaddi rahbarga biriktirilgan. Shahnoza SHERMATOVA, Yunusobod tumanidagi “Uvaysiy” mahallasi yoshlar yetakchisi: – “Yoʻl xaritasi”da 6 ta yoʻnalish boʻyicha yoshlar qamrab olindi. Jumladan, probatsiya hisobidagi, profilaktik hisobdagi, migratsiyadan qaytgan, ajrim yoqasidagi yosh oila va ota-ona qarovidan mahrum yoshlarni oʻz ichiga oldi. Aprel oyida 2 nafar nogiron yoshga bir martalik moddiy yordam, noutbuk va tikuv mashinasi hamda overlok  ajratdi. Migratsiyadan qaytgan 1 nafar yoshga “Ayollar sartaroshligi” pullik oʻquv kursida bepul hunar oʻrganishiga ko‘maklashildi. 1 nafar nogiron yoshga zarur dori-darmonlar berildi. Yana 1 yoshga planshet sovgʻa qilinib, tor doiradagi shifokorlar koʻrigidan oilaviy bepul oʻtkazildi. 2 nafar probatsiyadagi yosh IT sohasida bepul oʻqitilib, oʻzini oʻzi band qilishi uchun noutbuk, yana bir nafar probatsiyadagi yoshga tikuv mashinasi sovgʻa qilindi. Kuni kecha yana 2 nafar nogiron yosh Samarqand shahriga bepul sayohat qilib keldi. Yana 5 nafar turli rahbarlar kuratorlarga biriktirilgan yoshlarga ehtiyojiga koʻra, moddiy yordam va oziq-ovqat mahsulotlari tarqatildi. 4 nafar yosh esa har qanday yordamni rad etgan. 3 oy mobaynida 25 nafar yoshdan 20  nafari toʻliq yordam oldi, qolgan yoshlarimiz ehtiyojlari yuqoriligi sababli (uy-joy, yuqori daromadli ish, probatsiya muddatini kamaytirish va hokazo) masala o‘rganish jarayonida. Bir tumandagi ikki mahallada ikki xil manzara. Sizningcha bu vaziyatda kim aybdor?

26.7.2023 5031

BANDLIK – IJTIMOIY HIMOYA ASOSI

2023-yilning olti oyida Chirchiq shahrida yoshlar ishtirokida 49 ta jinoyat sodir etilgan. Ko‘rsatkich oʻtgan yilning shu davriga nisbatan 12 taga yoki 32 foizga oshgan. Sodir etilgan jinoyatlarning turlari boʻyicha oʻrganilganda qotillikdan boshqa barcha jinoyat turlari oʻtgan yilning mos davriga nisbatan koʻpayganini koʻrish mumkin. Jumladan: – nomusga tegish 1 ta (oʻtgan yili – 0); – bosqinchilik 4 ta (oʻtgan yili – 3); – talonchilik 4 ta (oʻtgan yili – 3); – firibgarlik 57 ta (oʻtgan yili – 44); – oʻgʻirlik 14 ta (oʻtgan yili – 10); – bezorilik 3 ta (oʻtgan yili – 1); – transport vositasini olib qochish 3 ta (oʻtgan yili – 1); – oʻrta tan jarohati yetkazish 1 ta (oʻtgan yili – 0); –  boshqa jinoyatlar 19 ta (oʻtgan yili – 17). Oʻrganishlar natijasiga koʻra, hududdagi 44 ta mahallaning 36 tasida jinoiyatchilik kuzatilgan, ularning 20 tasini shu mahallalarda yashovchi yoshlar sodir etgan. Eng koʻpi “Yoshlik” mahallasiga toʻgʻri keladi – 3 ta. Respublika miqyosida yoshlarni jinoyat yoʻlidan qaytarish, to‘g‘ri yo‘lga boshlash bo‘yicha tizimli ishlar amalga oshirilayotganiga qaramay bu raqamlar kamayish oʻrniga ortib borayotganining boisi nimada? Qaysi jihatlar e’tibordan chetda qolmoqda?   “QIZIL” TOIFADAN CHIQA OLMAYAPMIZ Hilola IRISMATOVA, “Yoshlik” mahallasi yoshlar yetakchisi: – Garchi hududimizda 3 ta jinoyat sodir etilgan boʻlsa-da, ularning hech birida mahallamiz yoshlari ishtirok etmagan. Mahallamiz hududida shaharning eng gavjum bozori joylashgan. Tabiiyki bu joyga turli mahallalardan yoshlar ishlash uchun keladi. Ular orasida esa tez-tez tortishuvlar boʻlib turadi. Baʼzan tortishuvlar janjallarga aylanib ketadi. Qachon boʻsh vaqt topsam mahalladagi profilaktika inspektori bilan reydlarga birga chiqaman. Uyma-uy kirib, yoshlarni ogohlantiraman. Shunga qaramay, mahallamiz eng koʻp jinoyat sodir etilgan hudud sifatida “qizil” toifaga aylanib qolgan. Bu vaziyatdan chiqib ketolmayapmiz. Shu oʻrinda bir taklifim bor: mahalladagi jinoyatlar soni shakllantirilayotganda faqat hududni emas, balki jinoyat sodir etgan yosh qaysi mahalladan ekani inobatga olinsa yaxshi bo‘lardi.    Chirchiq shahri nafaqat yoshlar orasidagi jinoyatchilik, balki ishsizlik boʻyicha ham yuqori o‘rinlarda qayd etilgan. Mahallalardagi oʻrganishlar natijasida 400 nafardan ortiq yoshlar bandligini taʼminlash zarurati borligi maʼlum boʻldi. Ishsiz yoshlarning eng koʻp ulishi esa hududning “Baxt” mahallasiga toʻgʻri keladi. Yoshlar bandligini taʼminlashda yetakchilar qanday toʻsiqlarga duch kelmoqda? Ayni savol bilan mahallaning yoshlar yetakchisi Rasim Guseynovga yuzlandik. HAMMA ISH HAM YOSHLARGA YOQAVERMAYDI Rasim GUSEYNOV, “Baxt” mahallasi yoshlar yetakchisi: – Mahallamizda 11 nafar yosh ishsizlar roʻyxatiga olingan. Ularning koʻpchiligi norasmiy boʻlsa-da, daromad manbayiga ega. Shu bois ishsiz yoshlar koʻpincha biz taklif etadigan ishlarni rad etadi. Aslida ularning ham fikrlari toʻgʻri. Sababi Aholi bandligiga ko‘maklashish markazlari  tomonidan taklif etilayotgan koʻplab boʻsh ish oʻrinlarining aksariyatida juda kam ish haqi vaʼda qilinadi. Yaxshi maoshli ish oʻrinlariga borsangiz, “yaqindagina odam olib boʻlganini” aytishadi.   ENG QUYI POG‘ONADAN BOSHLASH KERAK Mahallalardagi yoshlar bandligini ta’minlash, jinoyatchilikning oldini olish, shuningdek, hududlardagi barcha ijtimoiy-iqtisodiy sohadagi muammolarni hal etish sector rahbarlarining ham asosiy vazifasidir. “Baxt” mahallasi biriktirilgan 4 sektor ham ishsiz yoshlar soni boʻyicha eng oldingi pogʻonada. Ammo mazkur mahalladagi birorta ishsiz yoshning ish topishida sektor rahbari ko‘maklashmagani, ishsiz yoshlar holidan xabar olish uchun ham yaqin o‘rtada kelmagani ma’lum bo‘ldi. Sektor rahbari ishsizlik bilan kurashish bo‘yicha qandaydir tajribaga egami, degan savol bilan sektor rahbarining idorasi tomon yoʻl oldik. Abduvali MAXAMMATOV, Chirchiq shahar soliq inspeksiyasi boshligʻi vazifasini vaqtincha bajaruvchi, 4-sektor rahbari: – Bu lavozimga kelganimga koʻp boʻlmadi. Hozir, asosan, “qizil” toifadagi yoshlar bilan ishlayapmiz. Qolaversa, yoshlar hozir taklif etilayotdan rasmiy ishlarni unchalik maʼqul koʻravermaydi. Ular asosan ish haqining kamligidan nolishadi. Toʻgʻri, men yoshlarni oʻzlari xohlayotgan ish oʻrinlariga joylashtirib qoʻyishim mumkin, ammo hamma ishni eng quyi pogʻonadan boshlash kerak deb hisoblayman. Shu bois ular kam ish haqi bilan bo‘lsa ham, sabr bilan sohaning sir-asrorini o‘rganishi, bosqichma-bosqich oʻsib borishi kerak deb hisoblayman. Yil boshidan buyon sektorimizda 168 nafar ishsiz yosh roʻyxatga olingan boʻlsa, hozir ularning 81 nafari rasmiy ish oʻrniga ega boʻldi. 13 nafariga esa shaxsan oʻzim ish topib berdim. Yaqinda chirchiqlik ishsiz yoshlar uchun tashkil etilgan mehnat yarmarkasida 30 dan ortiq tashkilot va korxona uch yarim mingdan ortiq boʻsh ish oʻrinlari bilan ishtirok etdi. Natijada 100 nafardan ortiq yoshlar bilan ish beruvchilar oʻrtasida mehnat shartnomalari imzolandi. Biroq ayrim yetakchilarning ta’killashicha, o‘z hududidagi yoshlar mazkur mehnat yarmarkasida o‘zlariga munosib ish o‘rnini topolmagan. Ammo “Haydar Maqsudov” mahallasi yoshlari uchun ushbu mehnat yarmarkasi yaxshi imkoniyat boʻldi. Mahallada ishsiz sifatida roʻyxatga olingan 8 nafar yoshning 6 nafari yarmarka orqali doimiy ish oʻrniga ega boʻldi. Mahalla yoshlar yetakchisi Nuriddin Mirzayevning yoshlarni ish bilan taʼminlashda yaxshigina tajribasi borligiga ham guvoh boʻldik.   “Men Prezident vakiliman” Nuriddin MIRZAYEV, “Haydar Maqsudov” mahallasi yoshlar yetakchisi: – Mahallamiz yoshlarini qayerda boʻsh ish oʻrni boʻlsa, oʻsha yerga emas, balki ular xohlagan joyga ishga joylashga harakat qilaman. Buning uchun, avvalo, yoshlar qaysi tashkilotga ishga kirishni istasa oʻsha tashkilot yoki korxona rahbarining yoniga borib, oʻzimni “Prezident vakili”man deb tanishtiraman. Kechagi yarmarkada ham deyarli barcha yoshlarimiz ish bilan taʼminlandi. Bir nafar qizimiz Favqulodda vaziyatlar vazirligiga, yana bir qizimiz esa bolalar bogʻchasiga ishga joylashdi. Har birining ish joyi va yaratilgan sharoitlari bilan tanishib chiqdim. Ular bundan juda xursand.   “Orzu qilgan ish joyimga ega boʻldim” Muzaffar OʻSKANOV, “Maxam Chirchiq” OAJ qurilish va taʼmirlash xoʻjaligi texnik xodimi: – Maktabni tamomlaganimdan keyin bir yil ishsiz yurdim. “Maxam Chirchiq” korxonasida ishlashni orzu qilardim. Buni yoshlar yetakchisi Nuriddin akaga aytsam, bunga erishish mumkinligini qat’iy ta’kidladi. Keyin korxona rahbari yoniga kirib, meni ishga joylashtirish masalasida gaplashib chiqdi. Ustoz-shogird an’anasi asosida 3 oy ish oʻrgandim, keyin ishga kirdim. Bir yildan buyon bu yerda 3 millionlik maosh asosida ishlab kelyapman. Aslida har qanday ishni amalga oshirish mumkin deb hisoblaydigan “Haydar Maqsudov” mahallasi yoshlar yetakchisining tajribasini hamma mahallaning yoshlar yetakchisi oʻrganib olsa, ishsiz yoshlarning soni keskin kamaygan boʻlardi. Biz esa shunday tashabbuskor yetakchilar tajribasini sizlarga ulashishda davom etamiz.

12.7.2023 5170

“BOOK CAFE”

– Yoshlarni kitob oʻqishga qiziqtirish ularning boʻsh vaqtini mazmunli tashkil etishning eng samarali usuli. Shu bois mahallamizda kutubxona qurishni xohlardim. Biroq shunchaki kutubxona tashkil etish bilan yoshlarni kitob oʻqitishga qiziqtirib bo‘lmasligini ham anglardim. Bir kuni tadbirkor Shohjahon Boyqoʻziyevning yoshlar uchun o‘tkazayotgan biznes treningida Farruxbek Usmonov dorixona ochish niyati borligini aytdi. Men unga noodatiy kutubxona ochishni taklif qildim. Biznes trener ham mahallada “Book cafe” ochsa, yaxshi daromad olishi mumkinligini tushuntirdi. Shu bilan “Book cafe” ochishga kirishib ketdik. Buning uchun shahar hokimligidan yer ajratildi. Qisqa vaqt ichida yengil konstruksiyali mahsulotlardan “Book cafe” qurib bitkazildi. Kutubxonaga Yoshlar ishlari agentligi tomonidan 2000 nusxa kitob sovgʻa qilindi. Noodatiy kutubxona ishga tushgach, ikki nafar yosh ishga olindi va bu yerda mahallamiz yoshlari bepul kitob oʻqish imkoniyatiga ega boʻldi. “Book cafe”da WI-FIdan bepul foydalanib, dars tayyorlash imkoniyati ham yaratilgan. Hozir bu yer yoshlarning eng sevimli maskaniga aylandi. Farruxbek qoʻshni mahallada ham shunday “Book cafe” ochish niyatida.

7.7.2023 5667

YOSHLARGA IMKONIYATLAR YARATILMOQDA

Mamlakatimizda 30-iyun – Yoshlar kuni sifatida keng nishonlandi. Yoshlar kuni munosabati bilan O‘zbekiston Respublikasi Prezidenti Shavkat Mirziyoyev mamlakatimiz yoshlariga tabrik yo‘lladi. Unda jumladan, shunday so‘zlar bor: “Navqiron avlodimizning huquq va manfaatlarini ta’minlash, o‘g‘il-qizlarimizning bilim olishi, mehnat qilishi, o‘z qobiliyat va iste’dodini ro‘yobga chiqarishi uchun barcha sharoitlarni yaratish so‘nggi yillarda O‘zbekistonda davlat siyosati darajasiga ko‘tarilgani va bu borada ulkan ishlar amalga oshirilayotgani sizlarga yaxshi ma’lum, albatta.O‘tgan qisqa davrda ushbu yo‘nalishda 100 dan ortiq qonun hujjatlari qabul qilinib, izchil amalga oshirilayotgani buni yaqqol tasdiqlaydi. Ayniqsa, yangilangan Konstitusiyamizda yosh avlodning huquq va manfaatlari aniq moddalar bilan muhrlab qo‘yilgani, hech shubhasiz, bu boradagi huquqiy bazani yanada kengaytirish, amaliy ishlarimizni yangi bosqichga ko‘tarish imkonini bermoqda.” Chindan ham yoshlar bilan ishlash Prezidentdan tortib vazirgacha, hokimdan tortib mahalla raisigacha — hammaning eng asosiy ishiga aylangan. Joriy yilning 11-aprel kuni Prezident Shavkat Mirziyoyev raisligida yoshlar siyosati sohasidagi ishlar natijadorligini oshirish chora-tadbirlari yuzasidan videoselektor yig‘ilishi o‘tkazildi. Unda Prezidentimiz nutq so‘zlab yoshlar bandligini ta’minlash, sifatli ta’lim bilan qamrab olish va ularning bo‘sh vaqtlarini mazmunli tashkil etish, ijtimoiy qo‘llab-quvvatlash yuzasidan bir qator takliflarni o‘rtaga tashladi. Jumladan, mamlakatimizda istiqomat qiladigan 14 yoshdan 30 yoshgacha bo‘lgan yigit-qizlarning ijtimoiy ahvoli, qobiliyati va qiziqishi o‘rganilib, ular uch toifaga ajratildi. Ular orasida yaxshi o‘qiyotgan, tadbirkorlikni yo‘lga qo‘ygan, rasmiy sektorda ishlaydigan, qobiliyati bor, ijtimoiy faol bo‘lgan 4,4 million yigit-qiz “yaxshi”, turmush taqozosi bilan rasmiy sektordan ish topa olmagan, lekin iqtisodiy faol 4,6 million yosh “o‘rta”, davlatning g‘amxo‘rligi va e’tiborini kutayotgan hamda ko‘makka muhtoj 396 ming yosh “ahvoli og‘ir” toifaga kiritildi.Har bir vazir, vazir o‘rinbosari, viloyat, tuman va shahar hokimlari, sektor rahbarlari, oliygohlar rektorlari, Milliy gvardiya va harbiy qism komandirlariga uchinchi toifadagi 50 nafardan yigit-qiz biriktirilib, ular bilan manzilli, aniq mezonlar asosida ish tashkil etish ishlari boshlab yuborildi. Bizning Olmazor tumanida joylashgan “Chilto‘g‘on” nomli mahallada ham 18 nafar og‘ir toifadagi yoshlar bor. Ular 11 nafar respublika va tuman darajasidagi rahbarlarga biriktirilgan. Yoshlar yetakchisi hamkorligida ularning har biri bilan bilan dastavval sektor rahbari individual suhbat o‘tkazdi. Unda “og‘ir” toifadagi yoshlarning muammolarini yechish bo‘yicha yo‘l xaritasi ishlab chiqildi va ijroga qaratildi. Tumanimizdagi “Oltinsoy” mahallada istiqomat qiluvchi “og‘ir” toifaga fuqarolar ro‘yxatiga kirgan Diyor ismli yigit kompyuter jamlanmasi olib, unda dasturlash faoliyatini yo‘lga qo‘yish istagini bildirdi. Unga biriktirilgan rahbar homiyligida Diyorga kompyuter jamlanmasi sovg‘a qilindi. Hozirda u o‘zini-o‘zi band qilib, daromad manbaiga ega bo‘ldi. Mahallamiz yoshlari orasida ijodiy va intellektual salohiyati, tanlagan kasb yo‘nalishi va ijtimoiy hayotda erishgan muhim natijalari bilan turli sohalarda yurtimiz ravnaqiga o‘z hissalarini qo‘shib kelmoqdalar. Maktabda hayotga o‘rgatadigan fan o‘qitilmaydi. Demak, bu ishni yo sinf rahbari, yo ota-ona, yoki mahalla yoshlar yetakchilari amalga oshirishlari kerak. Insonni hayotga, yashashga o‘rgatish bu oson ish emas. Buning uchun ana shu ulkan mas’uliyatni o‘z zimmasiga oladigan tarbiyachi juda ko‘p narsalarni bilishi, yuksak fazilatlarga ega bo‘lishi, shaxsi, e’tiqodi va qarashlari metindek mustahkam bo‘lishi kerak. Olmazor tumanida yoshlarni barkamol o‘stirish, jamiyatga yetuk qilib tarbiyalash maqsadida qator loyihalar yo‘lga qo‘yilgan. Jumladan, tumandagi maktablarda robototexnika va nanotexnika sinflari joriy etilgan hamda "DreamSat" loyihasi orqali maktab o‘quvchilarini “O‘zbekistonda kosmosga Olmazordan uchamiz!” shiori ostida birlashtirgan. Har hafta mazkur sinf o‘quvchilari o‘zlari yasagan “NONA yo‘ldosh”ni eng yaqin stratosferaga Navoiy viloyatidan uchirib kelmoqdalar. Bundan tashqari tumanda “Talabaga madad” loyihasi bo‘yicha ishlar amalga oshirilmoqda. Unda maktabni tamomlagan, oliygohga kirish istagida yurgan bitiruvchi yigit-qizlar uchun bepul tayyorlov kurslari yo‘lga qo‘yilgan bo‘lib, besh yuzdan ortiq bitruvchilar oliygohga kirish uchun tayyorlanmoqdalar. Shuningdek, IELTS bepul o‘quv kurslari ham tashkil etilgani ham yoshlarning xalqaro sertifikatlarni qo‘lga kiritishlarida qo‘l kelmoqda. Maktabni a’lo bahoga tamomlagan, xorijiy sertifikatlarni qo‘lga kiritgan har bir olmazorlik o‘quvchiga tuman hokimi tomonidan noutbuk va planshetlar sovg‘a qilindi. Olmazor tumani yoshlar chinakam orzu-istaklarini ro‘yobga chiquvchi makoniga aylangan. Joriy yilning 18 mart kuni “Yangi Toshkent” shahri qurilishiga tamal toshi qo‘yildi. Unda ishtirok etgan va nutq so‘zlagan O‘zbekiston Respublikasi Pezidenti Shavkat Mirziyoyev davlat va jamoat arboblari, ziyolilar va nuroniylar bilan bir qatorda yoshlar bilan ham suhbat o‘tkazgani kechagiday yodimda. O‘shanda Prezidentimiz Zulfiya nomli davlat mukofoti sovrindori Iroda Berdiyevaning gaplarini qunt bilan tinglab, uning ko‘p yillik orzu-istaklarini amalga oshirishda yordam bergan edi. Iroda Berdiyeva Tayanch doktoranturaga grand asosida o‘qishga qabul qilindi, hamda unga zamonaviy tikuv syexi tashkil etishda amaliy yordam ko‘rsatildi. Mana buni Prezidentimizning biz, yoshlarga ko‘rsatayotgan e'tibor desam, mubolag‘a bo‘lmaydi.