Uzun tumanining chekka qishlog‘ida yashayotgan 17 yoshli Ilhomjon yaqin kungacha uy sharoitida yakka tar­tibda o‘qir edi. Ilhomjon Inklyuziv ta’lim markaziga jalb qilingach tengdoshlari bilan musiqa to‘garagida saboq ola boshladi. Inklyuziv ta’lim jarayonlari uning hamma bo­lalar qatori teng ta’lim olishi, sog‘lom o‘g‘il-qizlar o‘rganishi mumkin bo‘lgan saboqlarni u ham o‘zlashtirishiga ko‘maklashdi, yangi qirralari ochildi.

Inklyuziv ta’lim markazlaridagi ana shunday to‘garaklar nogiron bolalarning rivojlanishiga katta yordam beryapti. Ilhomjon Mux­torov hayotida ham Surxondaryo viloyati Inklyuziv ta’lim markazining o‘rni katta bo‘ldi.

Inklyuziv ta’lim hamma bo­lalar (shu jumladan, nogironlar) ning bir xil maktab va sinfda – bir xil sharoitda ta’lim olishini anglatadi. Ya’ni imkoniyati cheklan­gan bola sog‘lom bolalar bilan bir xil e’tiborda o‘qiy olishi kerak. Lekin shu paytgacha imkoniyati cheklangan bolalarning boshqa sog‘lom bolalar bilan teng sha­roitda o‘qiyotgani haqida maqtanib bo‘lmasdi. Negaki bu bora­da talaygina muammolar bor edi: alohida ta’limga ehtiyoji bo‘lgan bolalar o‘qitiladigan ayrim ta’lim muassasalarida ular uchun to‘siq­siz muhit va imkoniyatlar yaratil­magan, ta’lim muassasalari zarur adabiyotlar, metodik qo‘llanmalar, turli kasblarga o‘qitishga mo‘ljal­langan uskuna va jihozlar bilan to‘liq ta’minlanmagan.

Shu bois respublikamizning barcha hududlarida inklyuziv ta’lim markazlari faoliyati yo‘lga qo‘yil­di. Viloyatimizdagi Inklyuziv ta’lim markazida esa tayanch harakati­da, talaffuzida nuqsoni bor, ehtiyojmand oila farzandlari tikuvchilik, musiqa va matematika to‘garak­lariga jalb qilinmoqda.

Viloyatdagi Inklyuziv ta’lim markazida nafaqat ta’limiy va kas­biy ko‘nikmalar, balki bolalarning iste’dodini yuzaga chiqarishlari uchun ham turli madaniy va sport musobaqalari hamda ko‘rik-tan­lovlar o‘tkazib kelinmoqda. Xususan, “Besh tashabbus olimpia­dasi”ning 1-mavsumida 70 nafar imkoniyati cheklangan yoshlar o‘z imkoniyatlarini sinab ko‘rdi. G‘oliblar Yoshlar ishlari agentligi viloyat boshqarmasi tomonidan esdalik sovg‘alari bilan taqdirlandi.

Aslida jismoniy imkoniyatlari cheklangan bolalar ham boshqa­lar qatori ta’lim olishga va mav­ jud imkoniyatlardan foydalanish­ga haqli. Shu bois Yoshlar ishlari agentligi nogiron shaxslarga mod­diy yordam berib, mehnat qilishi­ga zarur shart-sharoit yaratishga ham alohida e’tibor qaratmoqda. Birgina Surxondaryo viloyati misolida oladigan bo‘lsak, bugungi kun­da viloyatda nogiron yoshlar soni 3 ming 217 nafarni tashkil etadi. Ular­dan ijtimoiy himoyaga muhtoj 556 nafar nogiron yoshga 1 milliard 453 ming so‘m mablag‘ “Yoshlar daftari” jamg‘armasi hisobidan to‘lab berildi.

Bundan tashqari, Vazirlar Mah­kamasining 2022-yil 21-iyundagi “Nogironligi bo‘lgan yoshlarni ijti­moiy qo‘llab-quvvatlash bo‘yicha davlat xizmatlarini ko‘rsatishning ma’muriy reglamentlarni tas­diqlash to‘g‘risida”gi qarori asosi­da nogiron yoshlarga o‘qish, ya­shash va transport xarajatlarini qoplash uchun, shuningdek, as­bob-uskunalar va mehnat qurol­larini xarid qilish uchun subsidiya ajratishning ma’muriy reglament­lari ishlab chiqilib, Yoshlar ishlari agentligining Yoshlarga oid dav­lat siyosatini qo‘llab-quvvatlash jamg‘armasi mablag‘lari hiso­bidan har yili 500 nafargacha no­giron yoshlarga bazaviy hisoblash miqdorining 50 baravarigacha miqdorda subsidiya ajratilishi bel­gilab qo‘yildi.