NAVOIYLIK QIZLAR PESHQADAM
Urganch shahridagi “Yoshlik” sport majmuasida bo‘lib o‘tgan “Besh tashabbus olimpiadasi” doirasidagi “streetball” bo‘yicha qizlar o‘rtasidagi musobaqaning respublika bosqichiga mamlakatimizning 14 ta hududidan 210 nafar, Toshkent shahri mezbonlik qilgan yigitlar o‘rtasidagi bellashuvga 245 nafar mahalla yoshlari yetib keldi.
An’anaga muvofiq, 3 ta (16-21, 22-26, 27-30) yosh toifasida g‘oliblik uchun kurashgan 14 jamoa 4 guruhga bo‘lingan holda guruhlardagi saralash bosqichlarida 90 dan ortiq o‘yin o‘tkazdi. Guruhlarda dastlabki ikki o‘rinni band etgan jamoalar yarim final va final bahslarida maydonga tushdi.
Yakuniy natijalarga ko‘ra, Toshkent shahar Olmazor tumanidagi “G‘alaba” mahallasi, Sirdaryo viloyati Boyovut tumanidagi “Markaz” mahallasi, Jizzax viloyati Sharof Rashidov tumanidagi “Uchko‘prik” mahallasi yigitlari o‘z yosh toifasi bo‘yicha g‘oliblikni qo‘lga kiritdi. Qizlar o‘rtasida esa Xorazm viloyati Qo‘shko‘pir tumanidagi “Ayronko‘l” mahallasi, Navoiy viloyati Xatirchi tumanidagi “Jaloyir” mahallasi va Navbahor tumanidagi “Qo‘xron” mahallasi jamoasi 1-o‘rinni egallab, musobaqa g‘olibiga aylandi.
– Finalda Farg‘ona jamoasiga qarshi maydonga tushdik, – deydi 16-21 yosh toifasida musobaqa g‘olibi, “Ayronko‘l” mahallasi jamoasi a’zosi Dinora Abdullayeva. – Vodiy jamoasida juda kuchli qizlar o‘ynaydi. O‘yindan oldin katta hadik bilan maydonga tushgan bo‘lsak-da, o‘zimizga ishonch bor edi. Sababi biz o‘z uyimizda, hamshaharlarimiz qatorida o‘ynayapmiz. Va yakunda bizga bildirilgan ishonchni oqladik. Farg‘onaliklarni 14:7 hisobida mag‘lub etdik.
SPORT BILAN HAMNAFAS
Andijon viloyatida bo‘lib o‘tgan “street workout” musobaqalarining respublika bosqichida Qoraqalpog‘iston Respublikasi, Toshkent shahri va viloyat bosqichlarida g‘oliblikni qo‘lga kiritgan 280 nafar ishtirokchi 3 ta yosh (16-21, 22-26, 27-30) toifasida o‘zaro bellashib, o‘z imkoniyatlarini sinab ko‘rdi.
Qizg‘in va keskin kurashlar ostida o‘tgan musobaqalarda Toshkent shahri vakili Hasanboy Nurillayev, andijonlik Nodirbek Teshaboyev, sirdaryolik Bekzodbek Ismoilov o‘z yosh toifasida 1-o‘ringa munosib deb topildi.
Musobaqalarda 1-o‘rinni olgan sportchilar mahallasida universal sport maydonchasi, ikkinchi o‘rinni olgan ishtirokchilar mahallasida “streetball” hamda “street workout” maydonchasi, uchinchi o‘rinni olgan sportchilar mahallasida esa “street workout” maydonchasi qurib beriladi.
– “Street workout” asosan kuchga yo‘naltirilgan kurashdir, – deydi sirdaryolik Bekzodbek Ismoilov. – Anchadan beri turnik va brusda mashq qilaman. Bugun bu mashqlar foydasini ko‘rsatdi. Biz Andijonga kelib Bobur yurtining eng go‘zal maskanlariga sayohat ham qildik. Taassurotlar ajoyib!
AHMAD DONISH MAHALLASIGA 100 MILLION SO‘M
Poytaxtimizdagi “Yoshlar ijod” saroyida Yoshlar ishlari agentligi hamda “Zakovat” intellektual klubi NNT hamkorligida “Besh tashabbus olimpiadasi” doirasida ikkinchi bor tashkil etilgan, sovrin jamg‘armasi 200 million so‘mlik “Zakovat” intellektual o‘yinining final bosqichi bo‘lib o‘tdi.
Unda tanlovning tuman bosqichlarida qatnashgan 17 472 nafar yoshlardan iborat 2496 ta jamoa orasidan saralangan eng kuchli 42 jamoa (294 nafar bilimdon) o‘z bilimini sinab ko‘rdi.
Murosasiz bahslarda Buxoro shahridagi Ahmad Donish mahallasi yoshlari birinchi o‘rinni egallab, 100 million so‘m pul mukofotini qo‘lga kiritdi. Ikkinchi o‘rin va 60 million so‘m pul mukofoti Olmazor tumanidagi “Beruniy” mahallasi jamoasiga, uchinchi o‘rin – 40 million so‘m pul mukofoti esa G‘ijduvon tumanidagi “Sarvari” mahallasi jamoasiga topshirildi.
MAHALLA ATLETLARI
Samarqand shahridagi “Afrosiyob arena” sport majmuasida o‘tkazilgan yengil atletika sport musobaqasining final bosqichi o‘z yakuniga yetdi.
Hududlardan saralanib kelgan 280 nafar ishtirokchi o‘z nomini tarixga yozish uchun harakat qildi. Yakunda Samarqand viloyati Paxtachi tumanidagi “Bog‘oloni” mahallasi, Qashqadaryo viloyati Shahrisabz tumanidagi “Chorshanbi” mahallasi, Xorazm viloyati Xonqa tumanidagi “Obod” mahallasi, Navoiy viloyati Karmana tumanidagi “Jaloyir” mahallasi, Andijon viloyati Jalaquduq tumanidagi “Qizilmozor” mahallasi jamoasi vakillari g‘oliblikni qo‘lga kiritdi.
AL-BERUNIY I XALQARO SHAXMAT TURNIRI
Xiva shahrida Yoshlar ishlari agentligi va O‘zbekiston shaxmat federatsiyasi hamkorligida mukofot jamg‘armasi 50 000 AQSh dollariga teng Al-Beruniy I xalqaro shaxmat turniri bo‘lib o‘tdi. FIDE tomonidan qo‘llab-quvvatlangan ushbu musobaqa 9 turdan iborat bo‘lib, Shveytsarcha tizimda uchta guruh ishtirokida o‘tkazildi.
“A” guruhdan FIDE reytingida 2000 va undan yuqori balga ega ishtirokchilar o‘rin oldi. 1500-2000 reytingga ega bo‘lgan ishtirokchilar “B” guruhda, reytingi 1500 dan past bo‘lgan ishtirokchilar esa “C” guruhda musobaqalarga kirishdi.
Yakuniy natijalarga ko‘ra, “A” guruhida Abdimalik Abdisalimov 7 ochko bilan g‘oliblikni qo‘lga kiritdi. 6 ochko bilan Mirjalol Qosimov “B” guruhda va 8 ochko bilan Vasila Abdujabborova “C” guruhda birinchi o‘rinni band etdi.