Namangan viloyatida

2022-yili 140 milliard so‘m uyushmagan yoshlarni tadbirkorlikka jalb etish maqsadida ajratildi.

6 mingdan ziyod yosh o‘z faoliyatini yo‘lga qo‘ydi.

2,5 ming gektar ekin maydonlari yoshlarga ajratildi.

20 ming nafar yoshning bandligi ta’minlandi.

5 ming yoshga kontrakt pullari to‘lab berildi.

Davlatimiz rahbari Davlatobod tumanidagi “Yangi O‘zbekiston yoshlar ziyo maskani” kutubxonasida namanganlik yoshlar bilan muloqot qildi. Uchrashuvda yoshlar uchun yaratilayotgan imkoniyatlarni kengaytirishga qaratilgan loyiha va tashabbuslar haqida so‘z bordi.

“Yangi O‘zbekiston yoshlar ziyo maskani” kutubxonasi 2021-yili foydalanishga topshirilgan. 70 mingta kitob fondiga ega. Kutubxona jahondagi yirik elektron kutubxonalar tarmog‘iga ulangan. Bu orqali xorijiy adabiyotlardan ham erkin va bepul foydalanish mumkin. Tashrif buyuruvchilar maxsus ID-karta oladi. Barcha jarayonlar elektronlashtirilgan. Birinchi qavatda 12 yoshgacha bo‘lgan bolalar hamda ko‘zi ojiz insonlarga mo‘ljallangan alohida o‘qish zali tashkil etilgan. Ikkinchi va uchinchi qavatlarda umumiy o‘quv zallari, yerto‘lada arxiv joylashgan. Shuningdek, bu yerda yoshlar axborot texnologiyalarini o‘rganishi mumkin.

Oybek PO‘LATOV, Davlatobod tumanidagi “Porloq” mahallasi yoshlar yetakchisi:

– Prezidentimiz kutubxonadagi sharoitlar bilan tanishib, qancha kitob borligi bilan qiziqdi. Kitoblar sonini ko‘paytirish kerakligini tushuntirdi. Shu bilan birga, bizning takliflarimizni ham so‘radi. Men kutubxona soat 20:00 gacha ishlashini, ammo ko‘pchilik yoshlarning kechki payt kitob o‘qish uchun bo‘sh vaqtlari bo‘layotganini aytib, soat 20:00 dan keyin ham kutubxonada o‘qish uchun imkon yaratish taklifini bildirdim. Bu fikrim ma’qullanib, “Namangan tajribasi” sifatida kutubxona faoliyatini 24 soatli ish tartibiga o‘tkazish yuzasidan mutasaddilarga topshiriq berildi. Prezidentimiz bu maskanda yoshlar bilan ko‘proq tadbirlar, bayramlar tashkil qilish va yoshlarning eng sevimli maskaniga aylantirish kerakligini ta’kidladi.

Yoshlar ishlari agentligi tashabbusi bilan yo‘lga qo‘yilgan “Ibrat farzandlari” loyihasi yoshlarning xorijiy tillarni o‘rganishi uchun zo‘r imkoniyat bo‘lmoqda. Bu loyiha orqali malakali ustozlardan o‘zbek, ingliz, nemis, ispan, turk va rus tillarini noldan boshlab bepul o‘rganish imkoniyati mavjud. Uchrashuvda davlatimiz rahbari ushbu loyiha taqdimoti bilan tanishdi.

Rustam QORIYEV,  “Ibrat farzandlari” loyihasi rahbari:

– Loyihaning “Ibrat farzandlari” deb nomlanishi jadid bobomiz Is’hoqxon Ibrat bilan bog‘liqdir. Prezidentimiz “Oldimizga qo‘ygan katta marralarga erishmoqchi bo‘lsak, har bir farzand ikkita chet tilini bilishi kerak”, degan taklif berganidan keyin biz bu loyihani yo‘lga qo‘ydik. O‘zbekistonda ilk marotaba chet tilini o‘rgatuvchi professional platforma yaratdik. Maqsadimiz, chekka hududlarda ijtimoiy yordamga muhtoj va shahar markazidagi o‘quv kurslariga qatnash imkoni bo‘lmagan bolalarga xorijiy tillarni o‘rganishga ko‘maklashishdir. Nafaqat bolalar, kattalar ham o‘rganishi mumkin. O‘quvchilarimiz soni ikki oy ichida 113 mingtaga yetdi. Yil yakuniga qadar 1 million, 2025-yilga qadar 3 million tinglovchini qamrab olmoqchimiz. Shu kunga qadar 10 dan ortiq tillarda 200 dan ortiq videolar yuklandi. Bundan tashqari, xitoy, ingliz, turk, yapon, nemis, rus, koreys tillarida video darsliklar tayyorlanmoqda. Barcha darslar o‘zbek tilidagi bepul platformaga joylashtirilmoqda. Boshqa platformalardan bizning farqimiz shundaki, bizda barchasi tizimli ravishda o‘zbek tilida bo‘lyapti.

Prezidentimizga taqdimotimizni namoyish qilganimizdan so‘ng yaxshi fikrlar bildirdilar. Bu loyihani keng targ‘ib etib, aholiga bildirishimiz, imkon qadar ko‘proq tillarni dasturga kiritish, kitoblar chop etish, bog‘cha va maktablarda, boshqa kasb egalari ham o‘rganishi uchun mukammal dastur yaratishimizni va jamoamizni kengaytirish borasida barcha zarur yordamni berishini aytdilar.

Mehrinoz ABBOSOVA, Yoshlar ishlari agentligi direktorining davlat tili masalalari bo‘yicha maslahatchisi:

– Biz, namanganlik yoshlar Prezidentimiz bilan bir soat ichida ta’lim sifatini yaxshilash, migrant yoshlarga yordam berish tizimi, xorijiy tillarni o‘qitish, “Ibrat farzandlari” loyihasini kengaytirish, umuman, yoshlar hayoti va taqdiri uchun muhim bo‘lgan har bir yo‘nalish haqida ochiq, samimiy suhbatlashdik. Davlatimiz rahbari ko‘plab muammolarni, og‘riqli masalalarni tilga oldi, yoshlarning takliflarini sinchkovlik bilan tingladi. Shaxsan mendan “WikiStipendiya” marafoni qanday ketayotgani, internetda o‘zbek tilida sifatli kontentlarni ko‘paytirish uchun yana nimalar qilish kerakligini so‘radi. Iqtisodiyot va moliya vaziriga bu boradagi ishlarni jadallashtirish uchun mablag‘ni ayamaslik lozimligini, o‘zbek tili turkiy tillarning o‘zagi ekani va u hamisha oldinda bo‘lishi muhimligini, qanday yordam kerak bo‘lsa, tayyor ekanliklarini ta’kidladi. Prezidentimiz bilan muloqotda katta kuch va energiya oldim. Hali oldinda qilinadigan ishlar ko‘p. Umid qilamanki, ko‘zlagan maqsadlarimizga jamoamiz bilan yetamiz, albatta.

Oyshaxon QODIROVA, Namangan muhandislik-qurilish instituti 3-bosqich talabasi, Beruniy nomidagi Davlat stipendiyasi sohibasi:

– Uchrashuvda davlatimiz rahbariga bionikani O‘zbekistonda rivojlantirish uchun Innovatsion rivojlanish agentligi qoshida Namangan shahrida laboratoriya tashkil etish taklifini bildirdim. Bu yo‘nalishda yozgan “Bionika” nomli kitobim haqida ham ma’lumot berdim. Prezidentimiz taklifimni qo‘llab-quvvatlab, menga 1,5 milliard so‘mlik grant ajratdi. Bu grantni amalga oshirish uchun 2 oy vaqt berdilar. Ikki oydan keyin Prezidentimizga xat yozib, natijalarimni bo‘lishmoqchiman.

Davlatimiz rahbari yoshlar bilan uchrashuvda ilmiy izlanishlarni qo‘llab-quvvatlash, sportni ommalashtirish, ko‘ngilochar tadbirlar tashkil etish bo‘yicha mutasaddilarga ko‘rsatmalar berdi.

“MEN SIZLARGA ISHONAMAN!”

Mamlakatimizda tadbirkorlarga munosib sharoit yaratish uchun joylarda texnopark va kichik sanoat zonalari tashkil etilmoqda. Namangan viloyatida bunday majmualar soni 73 taga yetdi. “Barkamol avlod” mahallasida ham ishbilarmonlar, hunarmandlar ko‘p. Lekin ular uy sharoitida ishlar, imkoniyatlari cheklangan edi.

Shu bois mahalla yonidagi 10 gektar maydonda zarur infratuzilmaga ega yaxlit majmua barpo etildi. Bu yerga 46 ta loyiha joylashtirilgan. Ularning 18 tasida ishlar yakunlanib, korxonalar faoliyatini boshlab yubordi, 2 mingdan ortiq ish o‘rni ochildi.

Davlatimiz rahbari shu yerdagi “Master klass dizayn”, “Sifat yog‘och sanoat”, “Balans teks” korxonalarining ish jarayonini ko‘zdan kechirdi. Birinchi korxonada yiliga 150 ming dona charm-poyabzal mahsulotlari ishlab chiqarilmoqda. “Sifat yog‘och sanoat” yiliga 1 ming 200 to‘plam mebellar, “Balans teks” 400 ming dona to‘qimachilik tovarlari tayyorlash quvvatiga ega. Ularda qo‘shni mahallalardagi avval ishsiz bo‘lgan yoshlar, xotin-qizlar mehnat qilib, daromad topmoqda.

Kelgusida bu yerda tayyor kiyim-kechak, charm-poyabzal, qurilish materiallari, mebel, qog‘oz, oziq-ovqat va kimyo mahsulotlari ishlab chiqariladi. Natijada shu atrofdagi “Barkamol avlod”, “Yakkatut”, “Yangihayot”, “Objuvoz”, “Lola”, “Chaman” mahallalarida yashovchi 6 mingdan ziyod aholi ish bilan ta’minlanadi.

Rahmatillo OTAMIRZAYEV, Namangan shahridagi “Barkamol avlod” mahallasi yoshlar yetakchisi:

– “Barkamol avlod yoshlar kichik sanoat zonasi” ishsiz yoshlarni ish bilan ta’minladi. Sanoat zonasi 6500 nafar ishchi kuchiga mo‘ljallangan bo‘lib, hozir 1200 nafardan ortiq fuqarolar ish bilan ta’minlandi va ishchilar safi kengaymoqda. Sanoat zonasida tikuvchilik, charm-poyabzal va yog‘ochlardan turli mebellar ishlab chiqarilmoqda. Bu nafaqat bizning mahallamiz, balki shahrimizdagi yoshlar uchun ham keng imkoniyatlar eshigini ochmoqda. Prezidentimiz ilgari surayotgan “Ikki til – bir hunar” tamoyili asosida hududimizdagi 88-maktab bitiruvchilarining 11 nafarini maktabdan tashqari holatda oylik ish haqi hisoblagan holda 9 va 10-sinf o‘quvchilarini esa ustoz va shogird tamoyili asosida hunar o‘rganishlari uchun “Barkamol avlod yoshlar kichik sanoat zonasi”dagi ustozlarga shogirdlikka berdik.

Yoshlar yetakchisi bo‘lib ish boshlaganimdan buyon mahallamizdagi yoshlar uchun turli yordamlar ko‘rsatdik. Prezidentimizga yoshlar davlatimizning ana shunday yordam va ko‘magidan minnatdor ekanini aytganimda “Men sizlarga ishonaman, ishonchimni oqlayapsizlar”, dedi. Bunday so‘zlarni eshitib, kuch-g‘ayratim yanada oshdi!

Asadbek UMARALIYEV, Namangan viloyati Yangiqo‘rg‘on tumanidagi “Gazon” mahallasi yoshlar yetakchisi:

– Kasb-hunar kollejini tamomlaganman. Mutaxassisligim bo‘yicha ish topolmagach, Rossiyaga ishlagani ketdim. U yerda turli og‘ir ishlarni bajarib, ko‘p qiyinchiliklarga uchradim. Shu davrda yurtimizda Prezidentimiz tomonidan yoshlarga berilayotgan imkoniyatlarni ijtimoiy tarmoqlarda ko‘rib, O‘zbekistonga qaytdim. Dastlab yoshlar uchun tashkil etilgan harbiy o‘quv mashg‘ulotlariga bordim. Mashg‘ulotdan qaytgach, vatanparvarlik tuyg‘ulari yanada jo‘sh urib, o‘zimga bo‘lgan ishonchim, shijoatim ortdi. Oldimga ulkan maqsadlarni qo‘ydim. Bir oylik harbiy safarbarlik chaqiruvi rezerviga borib keldim. Namangan davlat universitetining jismoniy madaniyat fakultetiga o‘qishga kirdim va talabalik baxtiga muyassar bo‘ldim. Buni qarangki, orzular maqsadga, maqsadlar harakatga undadi.

O‘tgan yili mahalladagi yoshlar yetakchisi lavozimiga tayinlandim. Iqtidorli yoshlarni topib, ularni “Besh tashabbus olimpiadasi”ning tuman, viloyat, respublika bosqichlarigacha olib chiqdim. Umumiy hisobda mahallamiz yoshlari 21 ta o‘rinni qo‘lga kiritdi. Muammoli yoshlarimizni o‘rganib, ularni “Yoshlar daftari”ga kiritdim va 6 nafar yoshning kontrakt pulini to‘lashga ko‘mak berdim. 11 nafar yosh “Kelajak kasblari” loyihasi doirasida o‘qidi.

Ish faoliyatim doirasida Prezidentimiz bilan uchrashishga muvaffaq bo‘ldim. Davlatimiz rahbari amalga oshirgan ishlarimdan juda quvondi. “Bu men izlayotgan yoshlardan ekan. O‘ziga o‘xshab ishsiz, maqsadsiz bo‘lgan yoshlar davlat xizmatchisi bo‘lishi mumkin ekanini isbotlab berdi. Bugun u Prezident bilan ko‘rishib turibdi. U o‘zining tarixini yozdi. Bu Prezidentning Yangi O‘zbekistondagi chinakam islohotchisi”, deya e’tirof etganlarida qalbimda o‘zgacha g‘urur, iftixor tuyg‘ulari jo‘sh urdi. Va menga joylarda yurib, yoshlar bilan uchrashib, kecha kim edim-u, bugun qanday inson bo‘lganimni, imkoniyatlardan to‘g‘ri foydalanishni bilish kerakligini yoshlarga tushuntirishni vazifa qilib yukladi hamda meni “Yangi O‘zbekiston islohotchisi” ko‘krak nishoni bilan mukofotlashni tavsiya etdilar.

Prezidentimiz shu yerda Namanganda ishlab chiqarilayotgan sanoat mahsulotlari ko‘rgazmasi bilan ham tanishdi. Mavjud tarmoqlarga qo‘shimcha asalarichilik, zargarlik, meva-sabzavotchilikni rivojlantirish bo‘yicha ko‘rsatmalar berildi.