2276ta natija
17.5.2024 54
2024-yilning I choragida mahallada yoshlar siyosatini samarali amalga oshirishda yuqori natijadorlikka erishgan yoshlar yetakchilarining TOP-100 reytingi e’lon qilingan edi. Bugun shu ro‘yxatdan joy olgan fidoyi yoshlar yetakchisi Shahzod Husenov faoliyati haqida so‘z yuritamiz. Shahzod Husenov 2022-yildan Buxoro shahridagi “Otbozor” mahallasi yoshlar yetakchisi. “Yilning eng namunali mahalla yoshlar yetakchisi” tanlovining respublika bosqichida “Yoshlarning bandligini ta’minlash va tadbirkorlik g‘oyalarini amalga oshirish” yo‘nalishida 3-o‘rinni qo‘lga kiritgan. Shahzod Husenov: O‘zbekiston Respublikasi Prezidenti huzuridagi Davlat boshqaruvi akademiyasi tinglovchisi; Milliy kadrlar zaxirasiga olingan. “Otbozor” mahallasi balansi: Aholi soni: 15 933 nafar; Xonadonlar: 2 600 ta; Yoshlar: 3 280 nafar; Ayol-qizlar: 1 450 nafar; “Yashil” toifa: 2 910 nafar; “Sariq” toifa: 350 nafar; “Qizil” toifa: 20 nafar. Salomatlik tashabbusi – Barcha huquqbuzarlik va yomon illatlar bekorchilikdan kelib chiqadi, – deydi Shahzod Husenov. – Jamiyatning eng qudratli kuchi bu uning yoshlaridir. Shunday ekan, yoshlarni yot g‘oyalar ta’siriga tushib qolishdan asrash, jinoyatchilik va huquqbuzarlikning oldini olish maqsadida mahallamdagi yoshlarning bandligini ta’minlash, ularni sevimli mashg‘uloti bilan band qilishni asosiy vazifa qilib belgilab olganman. Shahzod tongni yugurishdan boshlaydi. Bolalikdan sportga oshno yetakchi hududida sportni ommalashtirishga e’tibor qaratgan. U mahalladagi sportsevar yoshlar bilan birgalikda har tong mahallaning asosiy ko‘chasi bo‘ylab yuguradi. Shahzodga ergashadiganlar soni esa kun sayin ortib bormoqda. “Dastlab bir necha yosh menga qo‘shilgan bo‘lsa, hozir mahallaning katta yoshli erkaklari ham bizga hamrohlik qilyapti”, deydi Shahzod Husenov. Namunali yetakchi Mahalla yoshlar yetakchisi xatlov jarayonlarini yakunlagach, aniqlangan muammo, murojaatlarni hal etish uchun ijtimoiy himoyaga muhtoj, ishsiz yoshlarni “Yoshlar daftari”ga kiritdi. Bugungi kunga qadar “Yoshlar daftari” tizimi orqali: – 25 nafar talaba-yoshning kontrakt puli to‘lab berildi; – 5 nafar yoshning davolanish xarajatlariga pul ajratildi; – 7 nafarining harbiy xizmat badali qoplandi; – 6 nafariga ijara to‘lovi uchun pul va 1 martalik moddiy yordam berildi; – 36 nafari asbob-uskuna bilan ta’minlandi; – 16 nafari kelajak kasblariga o‘qitildi; – 12 nafari haydovchilik kurslarida o‘qitildi; – 105 nafar yoshga imtiyozli kreditlar ajratildi; – 45 nafari kasb-hunarga o‘qitilib, bandligiga erishildi. “Otbozor” mahallasida yoshlarning bo‘sh vaqtni mazmunli o‘tkazish maqsadida homiylar yordamida shaxmat va shashka klubi, futbol, kurash to‘garaklari tashkil etildi. – Shaxsiy tashabbusim bilan mahallada Davlat xizmatlari markazi filialini ochdik, – deydi yoshlar yetakchisi. – Bu filialda 3 nafar ishsiz yoshimiz bandligini ta’minlashga erishdim. Amalga tatbiq etgan loyihamiz samarasi o‘laroq, mahalla drayveridan kelib chiqib, yoshlar bandligini ta’minlash va o‘zini o‘zi band qilish yo‘nalishi bo‘yicha Respublikada namuna qilib ko‘rsatilib, e’tirof etildim. 20 nafar yosh “og‘ir” toifada hisobga olingan bo‘lib, mas’ul rahbarlarga biriktirilgan. Muntazam dars qoldiruvchi yoshning xonadoniga maktab o‘qituvchisi va mahalla yoshlar yetakchisi borib, uning ota-onasi bilan tushuntirish ishlari olib borildi. Bezorilik qilishga moyil, agressiv xulq-atvorli 7 nafar yoshga psixolog biriktirilib, ular bilan muntazam mashg‘ulotlar olib boryapti, yoshlarning o‘zi esa kibersportga jalb etilgan. 3 nafar notinch oila farzandlari va 1 nafar ajrim yoqasidagi yosh bilan mahalla xotin-qizlar faoli va mahalla yoshlar yetakchisi doimiy suhbatlar o‘tkazib kelmoqda. Bir nuroniyga 10 nafar yosh “Bir nuroniy 10 yoshga mas’ul” tamoyili asosida haftaning har juma kuni yoshlar hamda nuroniylar o‘rtasida suhbatlar tashkil etilmoqda. Shahzod Husenov tashabbusi bilan homiylik mablag‘lari asosida keksalar va yoshlar birgalikda Buxoro shahrining qadimiy va diqqatga sazovor joylariga sayohatlarga chiqmoqda. – Men mahallamda kreativ loyihalarni amalga oshirishga bel bog‘laganman, – deydi Shahzod Husenov. – Bizga belgilab berilgan 9 ta asosiy vazifani sidqidildan bajarib, yoshlarni to‘gri yo‘lga yo‘naltirishga, loyiha va g‘oyalarini amalga oshirishida yelkama-yelka turib, qo‘llab quvvatlashga intilaman. 156 nafar yosh sertifikatga ega Joriy yil 4 nafar migratsiyadagi yosh vataniga qaytarildi, 35 nafar ishsiz yoshga yer ajratib berildi, 14 nafar yosh korxona va zavodlarga ishga joylashtirilib, bandligi ta’minlanishiga erishildi, 7 nafar tadbirkorlik faoliyatini boshlash istagida bo‘lgan yoshlarga imtiyozli kreditlar ajratildi, 5 nafar yoshning kontrakt to‘lovlariga ko‘maklashildi, 4 nafari zamonaviy kasblarda o‘qitilmoqda. Migratsiyadagi yoshlar bilan doimiy suhbat olib borilmoqda. Xorijdagi yoshlarning qiziqishi va imkoniyatlaridan kelib chiqqan holda ularni yurtga qaytarish choralari ko‘rilyapti. “Ibrat farzandlari” va “Mutolaa” loyihalari bo‘yicha mahalla yoshlariga, maktablarga taqdimot qilinib, barcha yoshlar qamrab olinyapti. Bugungi kunga kelib 450 nafar yosh “Ibrat Academy” ilovasi orqali ro‘yxatdan o‘tgan. 156 nafari til bilish darajasi sertifikatiga ega bo‘ldi. “Mutolaa” loyihasidan 685 nafar mahalla yoshlari foydalanmoqda. Bandlikni ta’minlash tajribasi qanday? Yoshlarning bandligini ta’minlash va tadbirkorlik g‘oyalarini qo‘llab-quvvatlash uchun jami 158 yoshga 4,8 milliard so‘m imtiyozli kredit ajratilgan. Buning natijasini yo‘nalishlar kesimida tahlil etsak, e’tibordan qancha yosh bahramand bo‘lgani oydinlashadi: – xizmat ko‘rsatish sohasida 6 nafar yosh – 10 ta ish o‘rni yaratildi; – muravey uchun 18 nafar yosh – 18 nafar yoshning bandligi ta’minlandi; – tikuv mashinasi olish uchun 17 nafar yosh – 8 ta tikuv sexi ishga tushirildi, 25 nafar yosh band qilindi; – motokultivator uchun 11 nafar yosh; – parrandachilikda 14 nafar yosh – 6 ta YTT ishga tushirilib, 22 nafar yosh ishli bo‘ldi; – chorvachilik va asalarichilikda 29 nafar yosh; – suv filtrlash nasoslari xarid qilish va xizmat ko‘rsatishda 8 nafar yosh – 8 ta YTT ishga tushirilib, 12 nafar yosh ishga ega bo‘ldi; – issiqxona yo‘nalishida 32 nafar yosh – 32 ta oila bandligi ta’minlandi; – novvoychilik uskunlari xaridi uchun 6 nafar yosh – 6 ta YTT ishga tushirilib, 25 nafar fuqaro o‘z ishiga ega bo‘ldi; – boshqa turdagi jihozlar va asbob-uskunalar xarid qilish uchun 17 nafar yosh – 20 dan ortiq yoshlar bandligi ta’minlandi. Shahzod Husenov tashabbusi bilan mahalla yoshlari o‘rtasida “O‘zbekiston uchun 100 g‘oya” va “Mahallaning ishbilarmon tadbirkori” tanlovlari, “Biznesga birinchi qadam” grant loyihasi hamda muvaffaqiyatga erishgan tadbirkorlar bilan mahalla yoshlarining uchrashuvlari tashkil etib kelinmoqda. “Otbozor” mahallasidagi 18-30 yoshgacha bo‘lgan xotin-qizlar uchun tadbirkorlik sirlari va startap loyihalar bo‘yicha o‘quv tashkil etilib, o‘quv kurslarini muvaffaqiyatli tamomlagan 51 nafar yoshga sertifikatlar berildi.
14.5.2024 161
O‘zbekiston Respublikasi Prezidentining 2022-yil 19-yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari to‘g‘risida”gi qaroriga asosan mahalladagi yoshlar yetakchilarini doimiy ravishda bilim vako‘nikmalarini rivojlantirish belgilangan edi. Shu maqsadda kecha Qashqadaryo, Surxondaryo va Toshkent viloyatidagi mahallalarda faoliyat olib borayotgan 200 nafardan ortiq yoshlar yetakchilari Bo‘stonliq tumanidagi “Yoshlar oromgohi”da jam bo‘lishdi. Ular mazkur oromgohda tashkil etilgan o‘quv-seminarning 1-mavsumida ishtirok etmoqda. Joriy yilning 13-19-may kunlari bo‘lib o‘tadigan seminar jarayonlari belgilangan kun tartibi dasturi bo‘yicha olib boriladi. Xususan, oromgohning faollar zalida mahalla yoshlar yetakchilari va tegishli masʼullar ishtirokida "Yoshlarga yer ajratish", "Liderlik qobiliyatini shakllantirish", "Vaqtdan unumli foydalanish ko‘nikmalarini shakllantirish", "Huquqbuzarlikka moyilligi bor yoshlar bilan tizimli ishlash", "Yoshlar murojaatlari bilan ishlash", "Besh tashabbus loyihalari", "Yoshlar daftari tizimining maqsadi" kabi mavzularda hamda "Ustoz Ai", "Ibrat farzandlari", "Mutolaa", "Uz Chess" loyihalari yuzasidan o‘quv seminarlari bo‘lib o‘tmoqda. Eslatib o‘tamiz, mazkur o‘quv-seminarining 2-mavsumi doirasida 16-19 may kunlari Andijon, Namangan hamda Farg‘ona viloyatlaridagi mahallalardan keladigan 200 nafarga yaqin yoshlar yetakchilari ishtirok etadi. Shuningdek, seminar yakunida sektor koordinatorlaridan tashkil topgan ushbu yoshlar yetakchilaridan zaxira kadrlarni shakllantirish ham reja qilingan.
14.5.2024 93
Yoshlar bilan ishlashning yangicha boshqaruv mexanizmlari va vertikal tizimini yaratish, yoshlar muammolarini bevosita mahallalarda hal etish, taʼlim muassasalarida maʼnaviy-maʼrifiy va tarbiyaviy ishlar samaradorligini oshirish maqsadida yoshlar yetakhilari faoliyati tashkil etildi. Prezident qaroriga muvofiq, har bir shaharcha, qishloq, ovulda, shuningdek, shahar va shaharchalar, qishloqlar hamda ovullardagi har bir mahallada yoshlar yetakchisi lavozimi joriy etilishi belgilangan. Yoshlar to‘g‘risidagi zarur ma’lumotlarni “Yoshlar daftari” va “Yoshlar portali” elektron platformalariga kiritib borish, ular bilan samarali ishlash, yoshlarning bo‘sh vaqtini mazmunli tashkil etish, ijtimoiy faolligini oshirish, iqtidori, iste’dodi va tashabbusini rag‘batlantirish hamda hayotda o‘z o‘rnini topishiga ko‘maklashish yetakchilarning asosiy vazifasi sifatida qayd etildi. Navqiron avlodni vatanparvarlik ruhida tarbiyalash, ularning intellektual jihatdan kamol topishi va ma’naviy rivojlanishini ta’minlash, huquqbuzarlik sodir etishga moyilligi bo‘lgan yoshlar bilan tizimli ishlash vazifasi yuklatildi. Shuningdek, yetakchilarning o‘ziga biriktirilgan mahallalarda maqom, baxshichilik va estrada bo‘yicha tanlovlar, “Salomatlik uchun 5 000 qadam” yurish marafoni hamda “Yosh ekolog” aksiyasini o‘tkazishi, shu bilan birga, mini futbol, voleybol, basketbol, stol tennisi, velosport, yugurish, shaxmat, shashka, badminton, kamondan otish bo‘yicha musobaqalarini tashkil etishi zarurligi ta’kidlandi. Bizning Payariq tumani “Toshhovuz” mahallamiz misolida aytadigan bo‘lsam, shu davrga qadar, “Yoshlar daftari” va “Yoshlar dasturi”ning amalga oshirilishi natijasida 46 nafar yoshning bandligi ta’minlandi, 16 nafar imkoniyati cheklangan va tibbiy yordamga muhtoj yoshlar doimiy nazoratga olindi. “Yoshlar daftari” jamg‘armalarida mahalliy byudjetning orttirilgan qismining 15 foizi va ijro hujjatlariga oid undiruvlar hisobidan mablag‘ shakllantirildi. Bu mablag‘lar hisobidan 79 nafar yoshga ijtimoiy-moddiy yordam hamda bandligini ta’minlash maqsadida mehnat qurollari va boshqa turdagi yordamlar ko‘rsatildi. 2022-yil “Yoshlar daftari”dan yordam olgan yoshlar soni 25 nafar, ya’ni 4,58 foizni tashkil etgan bo‘lsa, bu ko‘rsatkich 2023-yil 10,6 foizga oshdi. Yoshlarning tadbirkorlik faoliyatini rivojlantirish, yangi g‘oyalar asosida ishlab chiqilgan innovatsion, startap va biznes loyihalarini moliyalashtirish maqsadida 550 million so‘m miqdoridagi mablag‘larni yo‘naltirish orqali 25 nafar yoshga imtiyozli kreditlar ajratildi. 2022-yilda mahallamizdan 66 nafar yosh tashqi migratsiga chiqib ketgan bo‘lsa, o‘tgan vaqt davomida ularning 50 nafarini mamlakatimizga qaytarish, ish bilan ta’minlashga muvaffaq bo‘ldik. Ayni paytda 16 nafar yosh chet elda ishlamoqda. Ularni ham yurtimizga qaytarish harakatidamiz. Bugun mahalla yoshlar yetakchisi Prezident va yoshlar o‘rtasida chin ma’nodagi vositachi, vakilga aylandi. Yoshlar muammolari mahalla yoshlar yetakchilari tomonidan mahallaning o‘zida hal etilmoqda.
10.5.2024 133
Shahboz Qo‘chqorov – 2022-yil 21-yanvardan buyon Sharof Rashidov tumani “Yoshlik” mahallasi yoshlar yetakchisi lavozimida faoliyat yuritib kelmoqda. Ziyolilar oilasida tug‘ilgan Shahboz bolalikdan ilm olishga, yangiliklar yaratishga qiziqqan. Tarix va siyosat uning eng sevimli mashg‘uloti bo‘lgan. Ishga jiddiy yondashishi va mas’uliyatliligi bilan ajralib turadi. O‘tgan davr mobaynida ijtimoiy himoyaga muhtoj yoshlar bilan tizimli ishlar olib borib, 83 nafar yoshning mummosini “Yoshlar daftari” jamg‘armasi orqali joyida hal qilgan. Davlatning himoyasiga muhtoj bo‘lgan 22 nafar yoshga homiylar tomonidan ko‘mak ko‘rsatgan. Yoshlarning bo‘sh vaqtini mazmunli tashkil etish maqsadida muntazam ravishda sport tadbirlari, kitobxonlik kechasi, “Zakovat” o‘yini va turli estafetalar tashkil qilib kelmoqda. Jinoyatchilikning oldini olish va huquqbuzarlikka qarshi kurashish maqsadida yoshlar bilan individual va organ tashkilotlari bilan ishlar olib boryapti. Yoshlarning bandligini ta’minlash dasturi orqali yoshlarning bandligi ta’minlanib, alohida e’tiborga muhtoj bo‘lgan yoshlar bilan tizimli ishlandi va ijobiy natijaga erishildi. Shahboz “TOP – 100” yetakchi safiga kiritilib, milliy kadrlar zaxirasiga olingan. “Yoshlik” mahallasi balansi: Tashkil etilgan sana: 2017-yil 2-noyabr; Yer maydoni: 42,3 g; Aholi soni: 3 874 nafar; Xonadonlar soni 668 ta; Ko‘chalar soni: 24 ta; Yoshlar: 1034 nafar (14-30 yosh); Ayollar: 489 nafar. Bandlikni ta’minlash tajribasi Yoshlar yetakchisi o‘tkazgan xatlovda “Yoshlar daftari” elektron platformasiga 2022-yilda 50 nafar, 2023-yilda 33 nafar ijtimoiy, iqtisodiy, huquqiy, psixologik qo‘llab-quvvatlashga, bilim va kasb-hunar o‘rganishga ehtiyoji va ishtiyoqi bo‘lgan yoshlar kiritildi, ularning muammolari o‘z yechimini topdi. “Yoshlik” mahallasida ishsiz yoshlar soni 46 nafar bo‘lib, yoshlar yetakchisi tashabbusi bilan yoshlarning 12 nafariga subsidiya asosida o‘zini o‘zi band qilishi, tadbirkorlik faoliyatini boshlashi uchun asbob-uskuna va mehnat qurollari taqdim etildi. 37 nafar ishsiz yoshga ijara huquqi asosida 10 yil muddatdan 30 yil muddatgacha dehqonchilik qilishi uchun yer maydonlari foydalanishga topshirildi. 15 nafar oliy va professional ta’lim muassasalarida o‘qiyotgan talaba yoshlar kontrakt to‘lovlarining bir qismi qoplandi. 9 nafar moddiy ahvoli qiyin bo‘lgan yoshlarning davolanish va dori-darmon xarid qilishi uchun bir martalik moddiy yordamlar ko‘rsatildi. 15 nafar ijtimoiy himoyaga muhtoj oila farzandlariga homiylik mablag‘lari hisobidan maktab formalari olib berildi. 18 nafar tadbirkorlik qilish istagidagi yoshlarga hokim yordamchisi bilan hamkorlikda imtiyozli kreditlar ajratildi. 4 nafar yoshning safarbarlik chaqiruv rezervi badali to‘lovlari qoplandi. Hech kim e’tibordan chetda qolmaydi 2023-yil 11-aprel kuni Prezident raisligida yoshlar bilan ishlashning yangicha tizimini joriy etishga bag‘ishlangan yig‘ilishda 14 yoshdan 30 yoshgacha bo‘lgan yoshlar “yashil”, “sariq” va “ahvoli og‘ir” – “qizil” toifalarga ajratilgan edi. “Yoshlik” mahallasida 2023-yilda 17 nafar yosh “og‘ir” (“qizil”) toifaga kiritilgan. Shundan 16 nafari tumandagi sektor va tashkilot rahbarlariga hamda 1 nafari viloyat tashkilot rahbariga individual ishlash maqsadida biriktirilgan edi. Ulardan: – Probatsiya nazoratidagi yosh – 1 nafar; – Profilaktika hisobidagi yosh – 2 nafar; – Oilaviy ajrim yoqasidagi yosh oila – 2 ta; – Xorijiy migratsiyadan qaytgan yosh – 4 nafar; – Nogironligi bor yosh – 8 nafarni tashkil etdi. Rahbarlar o‘zlariga biriktirilgan yoshlar bilan xonadonlariga tashrif buyurib, ularning muammolarini o‘rganib chiqdi. Suhbat davomida aniqlangan muammolar navbat bilan hal etilmoqda. Sharof Rashidov tumani Qishloq xo‘jaligi bo‘limi boshlig‘i Akbar Umarov o‘ziga biriktirilgan 8 nafar nogiron yoshdan 2 nafariga yangi nogironlik aravachasi topshirdi. “Yoshlik” mahallasi qishloq hududida joylashgani bois 1-guruh nogironi Sardor Xudoyberdiyevning istagidan kelib chiqib unga 2 bosh qo‘y olib berildi. “Bir nuroniyga – 10 nafar yosh” Jonibek Karimqulov 17 yoshda, u hamqishlog‘i bilan o‘zaro kelishmovchilik natijasida unga tan jarohati yetkazadi. Natijada Jonibek doimiy probatsiya nazoratiga olingan. Passport olish yoshi kelgan bo‘lsa-da, fuqarolik passportini olishga imkoniyati yo‘q edi. Jonibek Karimqulov o‘ziga biriktirilgan Jizzax viloyati IIBning birinchi o‘rinbosari ko‘magida muddatidan oldin probatsiya nazoratidan chiqarilib, biometrik passport olishiga yordamlashildi. Profilaktika hisobidagi 2 nafar yoshga mahalla nuroniylaridan murabbiy tayinlanib, “Bir nuroniyga – 10 nafar yosh” tamoyili bo‘yicha ishlar yo‘lga qo‘yildi. Ular xulqi yaxshilangani uchun tuman IIB boshlig‘i ko‘magi bilan hisobdan chiqarildi. Ularga “e-auksion” platformasi orqali 10 yillik ijara huquqi asosida yer ajratilib, bandligi ta’minlandi. Oilaviy ajrim yoqasiga kelib qolgan ikki yosh oila tuman hokimining “Oila va xotin qizlar masalalari” bo‘yicha o‘rinbosariga biriktirilgach, ularning xonadoniga mahalla yettiligi, faollari, “Oqila ayollar” va “Nuroniylar kengashi” a’zolari birgalikda borib, ajrim sabablari va ularni murosaga keltirish ishlari olib borildi. Tibbiy muolajaga muhtoj yoshlar tuman tibbiyot birlashmasiga imtiyozli yo‘naltirildi. Xorijdagi mahalladoshlar – “Yoshlik” mahallasida 2024-yil 1-choragi bo‘yicha jami xorijdagi yoshlar soni 25 nafar bo‘lib, ulardan ta’lim olish maqsadida xorijda yurgani 5 nafar, ishlayotgani 20 nafarni tashkil etadi, – deydi “Yoshlik” mahallasi yoshlar yetakchisi Shahboz Qo‘chqorov. – Rossiya Federatsiyasida 11 nafar, Turkiyada 10 nafar, Yaponiyada 2 nafar, Janubiy Koreyada 1 nafar, AQShda 1 nafar mahalla yoshlari yashaydi. Ulardan mehnat migrantlarini vatanga qaytarish va bandligi ta’minlash maqsadida sektor rahbari, mahalla yettiligi bilan ishlar olib borilmoqda. Ijtimoiy tarmoqlarda “Xorijdagi “Yoshlik” yoshlari” nomli guruh ochilib, ularni qamrab olganmiz va ular bilan ham, ularning ota-onalari bilan ham tez tez suhbatlar olib borilmoqda. Migratsiyadan qaytgan 3 nafar yoshga tuman qishloq xo‘jaligi bo‘limi boshlig‘i tomonidan doimiy ish o‘rinlari taklif etildi. Ayrim yoshlarning kasb-hunar o‘rganishga ehtiyoji borligi sababli Jizzax shahridagi “Ishga Marhamat” monomarkazidagi qisqa muddatli o‘quv kurslariga joylashtirildi. 2023-yil “Yoshlik” mahallasi yoshlar yetakchisi va yoshlari uchun juda samarali yil bo‘ldi. Ayrim yoshlar hayotidagi muammolar yechilib, ularning jamiyatga yetuk shaxs bo‘lib kirishlari va mahallada sog‘lom muhit hosil bo‘lganligiga ishonch hosil qilishlariga erishildi. Iqtidorlar kashf etilmoqda “Yoshlik” mahallasi yoshlari an’anaviy tarzda o‘tkazilib kelinayotgan mahalla yoshlari o‘rtasidagi “Besh tashabbus olimpiadasi” musobaqalarida ham o‘zining faolligi bilan ajralib turadi. Xususan, Mo‘minjon Ne’matullayev olimpiadaning 2023-yilgi mavsumida shaxmat bellashuvlarida tumanda 2-o‘rinni, yengil atletika musobaqasida “Yoshlik” mahallasi jamoasi tumanda 3-o‘rinni qo‘lga kiritdi. Yoshlar yetakchisi tashabbusi bilan yoshlar o‘rtasida xorijiy tillarni ommalashtirish va “Ibrat Academy” mobil ilovasini targ‘ib qilish maqsadida har haftada faol til o‘rganayotgan, til bilish sertifikatiga ega yoshlar bilan uchrashuvlar tashkil etilyapti. Mahallada xalqaro til sertifikatini qo‘lga kiritgan yoshlardan Nodirbek Sultonmurodov, Farangiz Sarvarova, Munis Primqulova, Gulnoza Meliboyeva tengdoshlariga na’muna bo‘lib kelmoqda. Mahalladagi iqtidorli yoshlarni izlab topish va ularni to‘g‘ri yo‘lga yo‘naltirish mahalla yoshlar yetakchisining oldiga qo‘ygan asosiy vazifalaridan biridir. “Yoshlik” mahallasi yoshlar yetakchisi Shahboz Qo‘chqorov bu yo‘nalishda ham bir qator ishlar amalga oshirdi. “Xonadonbay” o‘tkazilgan xatlov jarayonlarida mahalladagi sportga, san’atga, she’riyatga iqtidori bor yoshlarni aniqlab, ularni qiziqishi va iqtidoridan kelib chiqib ustozlarga yo‘naltirdi. Birinchi kitobimni chiqaraman – Bolalikdan kitobga, she’riyatga qiziqishim katta, – deydi 24 yoshli Shahboz Tirkashev. – Maktab paytlarda she’rlar yozib turardim. Yoshim katta bo‘lgach, ishga, pul topishga qiziqib ketganimdan she’r yozishni tashlab qo‘ygan edim. Mahallamiz yoshlar yetakchisi Shahboz Qo‘chqorov xonadonimga kelib, xatlov o‘tkazgan jarayonda avvallari she’rlar yozganimni aytgan edim. Yoshlar yetakchisi menga yana ijod qilishim uchun sharoit yaratib berishga va’da bergan edi. Hozir shirinliklar ishlab chiqarish korxonasida ishchi sifatida faoliyat yuritaman. Shahboz Qo‘chqorov korxona boshlig‘i bilan gaplashib ijod qilishim uchun sharoit yaratib berdi va she’riyat yo‘nalishida ta’lim olishim uchun ustoz ham biriktirib berdi. Bir nechta she’rlarim ham tayyor. Nasib qilsa, birinchi kitobimni chiqarish harakatidaman. Kitobim uchun nom ham tayyor: “Uyg‘onish”! Ham tikuvchi, ham dizayner – Yoshim 22 da, Jizzax politexnika institutida o‘qiyman, – deydi Ma’mura Meliboyeva. – Tikuvchilikni mahallamizdagi tikuvchi ayoldan o‘rganganman. Rasm chizishga qiziqish va tikuvchilik uyg‘unlashib dizaynerlikka yetakladi. Institutda dizaynerlik yo‘nalishida tahsil olaman. Kiyimlar uchun yangi ko‘rinish, dizaynlar ishlab chiqaman. Xatlov jarayonlarida mahalla yoshlar yetakchisi tikuv mashinasiga ehtiyojim borligini bilib, subsidiya asosida tikuv mashinasi olib berdi. Biroz soddaroq chizilgan ishlarimni o‘zim tikib ko‘raman. Yangicha ko‘rinishda tikilgan kiyimlar uchun birinchi xaridor har doim opam bo‘ladi. Bir necha yangiliklarim mahallamiz ayol-qizlariga ham ma’qul kelib, buyurtma ham qabul qilamiz. Uyimdan bir xona ajratib, kichik seximni ochdim. Tekstil korxonalaridan ham takliflar bo‘lyapti. Lekin hozir pul topishga emas, dizaynerlik sohasini chuqurroq o‘rganishga harakat qilyapman. Maqsadim xalqaro moda festivallarida namoyishlar o‘tkazish.
24.4.2024 229
Nargiza Gʻafforova – 23 yoshda, Samarqand viloyati Jomboy tumani “Qang‘li” mahallasi yoshlar yetakchisi. Bugungi kungacha tuman IIB matbuot kotibi, tuman hokimligi sektor kotibi yordamchisi, harbiy qism komandirining ma’naviy-ma’rifiy ishlar bo‘yicha maslahatchisi – madaniyat markazi boshlig‘i lavozimlarida ishlagan. “Yilning eng namunali yoshlar yetakchisi” tanlovi respublika bosqichida “Huquqbuzarliklar sodir etishga moyilligi bo‘lgan va jazoni ijro etish muassasalaridan ozod qilingan yoshlar bilan tizimli ishlagan eng namunali mahalla yoshlar yetakchisi” yo‘nalishi bo‘yicha 3-o‘rinni egallagan. Erishgan yutuqlari: “Fidoyi yoshlar yetakchisi” ko‘rik-tanlovining Samarqand viloyati bosqichida 3-o‘rin; “Yilning eng yaxshi yoshlar yetakchisi” tanlovining viloyat bosqichida 2-o‘rin; “Top-100” yoshlar yetakchilaridan biri. Prezident vakiliman! – O‘zbekistondagi eng kuchli 100 yetakchi safida Jomboy tumanidan aynan mening borligim, Prezident vakili ekanligim menga ulkan mas’uliyat yuklaydi, – deydi faxr bilan “Qang‘li” mahallasi yoshlar yetakchisi Nargiza. Uning qanchalik mas’uliyatli inson ekanligini u qilgan ishlar ham ko‘rsatib turibdi. Nargiza G‘afforova “Qang‘li”da yoshlar yetakchisi sifatida 2022-yili 95 nafar, 2023-yili 75 nafar, joriy yilda 8 nafar yoshga amaliy yordam ko‘rsatilishiga erishdi. Jumladan, uch yil mobaynida 178 nafar yoshga qariyb 117 million so‘mlik yordam ko‘rsatilgan. “Besh tashabbus olimpiadasi” 2023-yilgi mavsumida mahalla yoshlari “Street workaut” sport turi bo‘yicha respublikada 3-o‘rinni qo‘lga kiritdi va mahallada zamonaviy sport maydonchasi qurib bitkazildi. “Tashabbusli budjet” loyihasining 2023-yilgi mavsumida “Qang‘li” mahallasi g‘olib bo‘ldi, maktabga qo‘shimcha bino qurilib, mahallaning ichki yo‘llari ta’mirlandi. Jinoyatchilik 70 foizga kamaygan Samarqand viloyati Jomboy tumani “Qang‘li” mahallasida jinoyatchilik o‘tgan yilgiga nisbatan 70 foizga kamaygan. Yoshlar o‘rtasida jinoyatchilik va huquqbuzarliklarning oldini olish maqsadida bir qator tadbirlar amalga oshirilmoqda. Profilaktika inspektori bilan hamkorlikda “xavf” guruhiga kiruvchi yoshlar ro‘yxati shakllantirilib, “Obod va xavfsiz mahalla” qo‘shma qarori asosida jinoyat sodir etishi yoki jinoyatdan jabr ko‘rish ehtimoli mavjud yoshlar bilan individual suhbat olib borib, ularning muammolarini aniqlab, tizimli hal etilmoqda. Amalga oshirilgan ishlar natijasida 10 ga yaqin sodir etilishi mumkin bo‘lgan jinoyatlarning oldi olindi. Yoshlarni harbiy vatanparvarlik ruhida tarbiyalash maqsadida harbiy qismlar bilan hamkorlikda 2023-yil mobaynida 15 ta harbiy vatanparvarlik tadbirlari tashkillashtirildi. Ushbu tadbirlarga 600 dan ortiq yoshlar qamrab olindi. E’tirafga loyiq tajiba Nargiza mahallaning ko‘ngilli yoshlaridan volontyorlar jamoasini shakllantirgan. U o‘z jamoasi bilan mahallasidagi e’tiborga muhtoj aholi holidan xabar olib, ularga qo‘lidan kelgancha yordam berib kelmoqda. – Nafaqat mahallada, balkim tumanda ham e’tibordan chetda qolgan, boquvchisini yo‘qotgan, bemor nuroniylar holidan volontyorlarimiz bilan birgalikda tez-tez xabar olib turamiz, – deya so‘zlab berdi Nargiza G‘afforova. – Ba’zida oziq-ovqat mahsulotlari, ba’zida dori-darmonlar olib borib beramiz. Savobli ishlarimizda bizga tuman hokimi Qayum Sobirov, 2-sektor rahbari Jamshid Ahmedov, tadbirkorlar va homiylarimiz ko‘mak bermoqda. Nargiza G‘afforova jazoni ijro etish muassasasidan ozod etilgan, jazo muddatini o‘tab qaytgan 2 nafar yosh bilan individual mashg‘ulotlarni yo‘lga qo‘ygan. Ularni turli tadbirlarga, sportga jalb etgan. “Besh tashabbus olimpiadasi” esa bu yoshlarsiz o‘tmayapti. – Yoshlar yetakchilarining funksional vazifasiga ko‘ra, jazoni ijro etish muassasalaridan ozod etilgan yoshlar bilan ishlash nazarda tutilgan bo‘lib, men faoliyatim davomida bugungi kunda nafaqat ushbu vazifa bilan, balki jazo muddatini o‘tayotgan yoshlar bilan ham bir qancha tadbirlarni amalga oshirib kelmoqdaman. Jumladan, Jazoni ijro etish departamenti 3-mintaqaviy hudud 37- va 38-manzil koloniyalarda jazo muddatini o‘tayotgan yoshlar bilan davra suhbatlari, sport va madaniy tadbirlar o‘tkazmoqdaman. JIEMdagi yoshlar bizning, O‘zbekistonning yoshlari. Shu sababli, Jomboy tumani yoshlar yetakchilari bilan birgalikda manzil koloniyalarida ham kitobxonlik va sport musobaqalari tashkil qilib, yoshlarga oid davlat siyosati mazmun-mohiyatini ularga ham tushuntirib kelmoqdamiz. Otaliqqa olingan yoshlar “Qang‘li” mahallasida yoshlar yetakchisi mahalladagi yoshlar bilan ishlash chog‘ida ularning qiziqishlari, iqtidori, kelgusidagi rejalaridan kelib chiqqan holda ish tutadi. Shu sababli u mahalla hududida joylashgan 14-maktabning yuqori sinf o‘quvchilari o‘rtasida so‘rovnoma tashkil qilib, shunga ko‘ra tadbir va loyihalar tashkil qiladi. Ichki ishlar sohasiga qiziquvchi va profilaktik nazoratda turuvchi o‘quvchilar bilan Samarqand viloyati Ichki ishlar boshqarmasi “Situatsion markaz”iga, bojxona va uchuvchilik sohasiga qiziquvchi o‘quvchilar bilan Samarqand viloyati Bojxona boshqarmasi, Samarqand xalqaro aeroporti va bojxona postiga, harbiylikka qiziquvchi o‘quvchilar bilan Samarqand viloyati Ichki ishlar boshqarmasi tezkor safarbarlik vazifalarini bajaruvchi otryadi va havo hujumidan mudofaa qo‘shinlari va harbiy havo kuchlariga qarashli harbiy qismlarga sayohatlar tashkil qilib kelmoqda. “Qang‘li” mahallasidan 472 nafar yosh tuman prokurori o‘rinbosari Farrux Doniyorov tomonidan otaliqqa olingan. Bu yoshlarning barchasi bilan individual uchrashib, muammo va takliflari o‘rganib chiqildi. Aniqlangan muammolar “Yo‘l xaritasi”ga kiritilib, hal etib kelinmoqda. Bugungi kungacha 1 nafariga motokultivator uskunasi, 1 nafariga moddiy yordam ajratildi, 2 nafarining kontrakt to‘lovi to‘lab berildi. Mahallada otaliqqa olingan yoshlar ishtirokida “Yoshlar festivali” bo‘lib o‘tdi. Festivalda tuman hokimi, tuman prokurori, tegishli korxona va tashkilot rahbarlari hamda otaliqqa olingan yoshlar va ularning oila a’zolari ishtirok etdi. Festival doirasida turli ko‘rgazmalar, sport musobaqalari, “Zakovat” intellektual o‘yini, kitobxonlik va she’riyat kechasi, bo‘sh ish o‘rinlari yarmarkasi bo‘lib o‘tdi. Huquqiy savodxonlik burchagi tashkil qilinib, tuman adliya bo‘limi tomonidan huquqiy maslahatlar berildi. Otaliqqa olingan yoshlarning barchasi chuqurlashtirilgan tibbiy ko‘rikdan o‘tkazildi. Tadbir ishtirokchilari kasb-hunarga o‘qitish markazi va “Ibrat farzandlari” loyihasi doirasida tashkil etilgan o‘quv markazi faoliyati bilan tanishdi. Mana buni taklif desa bo‘ladi! – Yoshlar yetakchisi sifatida faoliyatimiz endi boshlangan davrda Mahallalarda yoshlar bilan ishlash bo‘yicha Respublika ishchi guruhning Samarqand viloyatiga tashrifi chog‘ida komissiya raisi Qahramon Quronboyevga Jomboy tumanining 3 ta chekka hududiga ko‘chma konteynerli kutubxona tashkil qilish taklifini bildirgan edim, – deydi Nargiza G‘afforova. – Taklifimga ko‘ra, kutubxonalarga 6000 ta kitob olib kelindi. Hozir tumanimizning Qoramo‘yin, Sarqipchoq, Nayman mahallalarida kutubxonalar faoliyat ko‘rsatmoqda. “Tashabbusli byudjet” loyihasining 2022-yilgi mavsumida Jomboy tumanida zamonaviy ko‘rinishga ega axborot kutubxona markazi tashkil etish loyihasi g‘olib deb topildi va tuman markazida zamonaviy, barcha qulayliklarga ega, 16 000 ta kitob jamlangan kutubxona qad rostladi. “Qiyin, ammo sevimli” – Yoshlar yetakchisi va faol yosh sifatida eng asosiy maqsadlarimdan biri yoshlarga oid davlat siyosati har bir xonadonga kirib borishi, har bir yosh ularga yaratilayotgan imkoniyatlardan xabardor bo‘lishi va foydalanishi, ilmga qiziqishi ortib, jamiyatda o‘z o‘rnini topishiga ko‘maklashishdir, – deydi yoshlar yetakchisi. – OTM bitiruvchi kurs talabalari uchun “Yoshlar – kelajak bunyodkorlari” klubi faoliyatni yo‘lga qo‘ymoqchimiz. Klub doirasida onlayn darslar va treninglar, oflayn davra suhbatlari va amaliyotlar bo‘lib o‘tadi. Klubni muvaffaqiyatli tamomlagan iqtidorli yoshlar tuman hokimi boshchiligidagi ishchi guruh suhbatidan o‘tib, mutaxassisligi bo‘yicha ishga qabul qilinadi. Ayrim hamkasblarimiz “yetakchilik qiyin”, deb nolib qolishadi. Tan olaman, qiyin. Ammo o‘z ishini sevgan inson uchun bu qiyinchilik ko‘rinmaydi. Men ishimni yaxshi ko‘raman.
23.4.2024 289
Zarifa Jabborova – 2022-yil yanvardan buyon Surxondaryo viloyati Termiz shahar “Jayhun” mahallasi yoshlar yetakchisi sifatida ishlamoqda. U yetakchilikka kirishgan kundan boshlab, yoshlarga do‘st bo‘ldi, ularning muammolarini o‘zining muammosi deb bildi. Mahallasi yoshlarining yaxshi sharoitlarga ega bo‘lishi uchun barcha imkoniyatlarni ishga solib kelmoqda. Zarifa bilan suhbatlashganimizda “Yoshlar yetakchisi vazifasida ishlar ekanman eng katta maqsadim mahallam yoshlari uchun barcha sharoitlarga ega zamonaviy sport obyekti barpo etish” degan yaxshi tashabbus boshlaganini bildirdi. Qahramonimiz faoliyatini 19 yoshida maktabda kutubxonachilikdan boshlagan. 8 yil davomida kutubxonachi va o‘qituvchi sifatida yoshlar bilan ishladi. 2020-yildan Termiz shahridagi “Farhod” mahallasida rais o‘rinbosari lavozimida faoliyatini davom ettirib, aholi bilan ishlash borasida qimmatli tajriba to‘pladi. Bu tajribalari bugun “Jayhun” mahallasidagi yetakchilik faoliyatida qo‘l kelmoqda. Zarifa Jabborova “Jayhun” mahallasi balansini shakllantirish maqsadida o‘tkazgan xatlov davomida mahalla yoshlarini qiynayotgan ko‘plab muammolarni o‘zi uchun “kashf qildi”. Kimdir ota-ona qaramog‘idan erta mahrum bo‘lgan, boshqasi yetishmovchilik sabab o‘qishini tashlab ketgan, yana biri esa moddiy qiyinchilik sabab salomatligini tiklashga imkon topa olmayapti... “Jayhun” mahallasi balansi: Aholi soni: 4503 nafar Xonadonlar: 1332 ta Koʻchalar: 4 ta Yoshlar: 1098 nafar Ayollar: 546 nafar “Yashil” toifa: 775 nafar “Sariq” toifa: 323 nafar “Qizil” toifa: 19 nafar Yoshlar yetakchisi xatlov davrida barcha yoshni tinglashga harakat qildi. Faoliyatining ilk kunlaridanoq mavjud muammolarni hal etish choralarini izladi. Xususan, yetishmovchilik sabab o‘qishni tashlab ketgan Davron Bobonazarovga homiylar yordamida kompyuter hamda printer olib berilib, Termiz davlat universiteti yaqinidan unga kompyuter xizmatlari markazi ochib berildi. Universitet ma’muriyati bilan kelishgan holda Davron yana o‘qishga qaytarildi. “Besh tashabbus” – katta maydon – Ikki yillik faoliyatim mobaynida mahallam yoshlari bilan juda ko‘p marralarga erishdim, – deydi Termiz shahar “Jayhun” mahallasi yetakchisi Zarifa Jabborova. – “Jayhun”da iqtidorli yoshlar juda ko‘p. Faqat ularni ommaga ko‘rsatish, iqtidorini “ko‘z-ko‘z” qilish kerak. Bu borada bizga “Besh tashabbus olimpiadasi” katta maydon vazifasini o‘tab bermoqda. Olimpiadaning har mavsumida mahallam yoshlari respublikada munosib ishtirok etmoqda. “Jayhun” mahallasida yashovchi Gʻayrat Doniyorov “Besh tashabbus olimpiadasi” 1-mavsumida stol tennis bellashuvlari final bosqichida qatnashib, 4-o‘rinni qo‘lga kiritdi. Olimpiadaning 3-mavsumida “Milliy raqs ijrochiligi” bo‘yicha Dilnoza Normamatova Respublikada g‘oliblikka erishdi. U hozir Surxondaryo viloyati “Barkamol avlod bolalar raqs maktabi”da raqs rahbari sifatida ishlamoqda. 80 dan ortiq shogirdlariga raqs sirlarini o‘rgatib kelmoqda. Bundan tashqari, Dilnoza shahardagi 2 ta bolalar bog‘chasida ham faoliyat olib boryapti. 2022-yil mahalladagi uyushmagan yoshlar o‘rtasida o‘tkazilgan mini futbol bo‘yicha DXX kubogi musobaqasida “Jayhun” mahallasi yoshlari Termiz shaharda birinchi bo‘lishni uddalashdi. 2023-yil “Navro‘z kubogi” mini futbol musobaqasida viloyatda 3-o‘rinni band etishdi. Ehtiyojmand yoshlar “Yoshlar daftari”ga kiritilib, amaliy yordamlar ko‘rsatildi. Masalan: – 21 nafari kasb-hunar va tadbirkorlikka o‘qitildi; – 7 nafariga haydovchilik guvohnomasi olishga ko‘maklashildi; – 19 nafariga zarur texnikalar olindi; – 39 nafarining shartnoma puli to‘landi; – 5 nafari zamonaviy kasblarda o‘qishga yo‘naltirildi; – 12 nafariga davolanish xarajatlari uchun moddiy yordan berildi; – 8 nafarining safarbarlik chaqiruvi badali to‘lab berildi. Hech kim e’tibordan chetda emas Yetakchi tashabbusi bilan mahalla yoshlarining 8 nafari “Amudaryo bolalarni sog‘lomlashtirish oromgohi”da bepul dam olishga, 3 nafari Samarqand va Toshkent shaharlariga sayohatga yuborildi. Jinoyatchilikka moyilligi bor 2 nafar yosh “Jasorat maktabi” o‘quv yig‘inida va ijtimoiy himoyaga muhtoj ishsiz 5 nafar yoshning DXX akamediyasi tashkil etgan o‘quv-yig‘inlarda ishtiroki ta’minlanib, ularni vatanparlik ruhida tarbiyalash borasida samarali ishlar qilindi, migratsiyaga ketishining oldi olindi. Yoshlar o‘rtasida jinoyatchilikning oldini olish bo‘yicha hisobda turgan yoshlarning 3 nafarining bandligi ta’minlandi. Jazoni ijro etish muassasasidan qaytgan yoshlar sport musobaqalariga, qiziqishiga qarab kasb ta’limiga yo‘naltirildi. O‘qishi oxiriga yetmagan chin yetim Jasmina Shaymulina darslarini davom ettirishi uchun unga vasiy tayinlab, boshqa maktabga ko‘chirildi. Birinchi guruh nogironi Zuhra Safarova “og‘ir toifa”ga kiritilib, aravacha bilan ta’minlandi. “Og‘ir toifa”ga kiritilgan Odiljon Jo‘rayevga homiy orqali kompyuter jamlanmasi olib berildi. Mahalla yoshlari qiziqishidan kelib chiqib, til o‘rganishi va sport bilan shug‘ullanishi uchun otaliqqa biriktirilgan Milliy gvardiya harbiy xizmatchilari bilan tizimli ishlar amalga oshirilyapti. Ular uchun maxsus reja ishlab chiqilib, bandligiga erishilmoqda. 8 nafar yosh migratsiyadan qaytarildi 2023-yil boshida Yoshlar ishlari agentligi direktori Alisher Sa’dullayevning talabalarni vaqtinchalik uy-joy bilan ta’minlash borasidagi tashabbusiga javoban Zarifa Jabborova yashash uyida 7 nafar talabani shartnoma asosida kvartira bilan ta’minlagan. “Jayhun” mahallasidan 30 nafar yosh mehnat migrant sifatida chetga chiqib ketgan edi. Yetakchi sa’y-harakatlari natijasida ularning 8 nafari ortga qaytarildi. Migratsiyadan kelgan yoshlarni nemis tili va zamonaviy kasblarga o‘qitishga yordam berilmoqda. Rossiyada ishlab qaytgan Ulug‘bek Shodmonov, Islom Shodmonov va Zafar Eshboyevlar hozir chet tilini o‘rganmoqda. Ularning o‘quv xarajatlari “Yoshlar daftari” jamg‘armasi mablag‘lari hisobidan qoplab berildi. 4 yildan beri xorijiy migratsiyada yurgan yolg‘iz ona 3 nafar voyaga yetmagan farzandini yaqin dugonasiga tashlab ketgani, buning natijasida qizlar qarovsiz qolib, ularning xulqida salbiy o‘zgarishlar borligini aniqlagan yetakchi onani migratsiyadan kaytarishga erishdi. Qizlar uchun esa psixolog biriktirildi. Yoshlarga qanot bo‘lish kerak “Jayhun” mahallasi yetakchisi Zarifa Jabborova bilan suhbatimiz yakunida yoshlar yetakchisi sifatida ishlash davomida o‘zi guvoh bo‘lganlari haqida gapirib berdi: – Mahallada ijtimoiy muhitni yaxshilash va jinoyatchilikning oldini olishga qaratilgan chora-tadbirlar va o‘rganishlarim natijasida shunga amin bo‘ldimki, 60-70 foiz yoshlar o‘rtasidagi jinoyatlar qarovsiz qolgan, ajrashgan, yolg‘iz ota yoki ona bilan yashayotgan, ota-onasi migratsiyaga chiqib ketgan farzandlar o‘rtasida sodir etilmoqda. O‘spirinlik davridagi o‘zgarishlar yosh qizlarga juda qattiq ta’sir etib, ular do‘stlaridan orqada qolishining guvohi bo‘lyapman. Bu borada ota-onalar bilan mahalla xodimlari alohida suhbatlar o‘tkazib, tushuntirish ishlarini olib boryapmiz. Ba’zida yonimga ichkilikga ruju qo‘ygan yoki oilasida doimiy janjal bo‘ladigan yoshlar kelib hissiyotlari, kechinmalari haqida gapiradi. Ularning fikrlashlarini eshitar ekanman, suhbatdoshlarimni uchish istagi bor, ammo qanoatidan ayrilgan qushga o‘xshataman. Ularga ikki og‘iz shirin so‘z, mehr-muhabbat va e’tibor bo‘lsa bas, ular ulkan marralarni zabt eta oladi.